വാടക വീടുകളിൽ താമസിക്കുന്നവർ 18 ശതമാനം ജിഎസ്ടി അടയ്ക്കണോ? വാസ്തവം ഇതാണ്

ജൂലൈ 18 ന് പ്രാബല്യത്തിൽ വന്ന ജിഎസ്ടി ചട്ടങ്ങളിൽ പുതിയ മാറ്റങ്ങൾ വന്നിട്ടുണ്ട്. ഇതനുസരിച്ച് സംരംഭത്തിനും വാണിജ്യ ആവശ്യങ്ങൾക്കുമായി എടുത്തിട്ടുള്ള വാടക വീടുകൾക്കും ഫ്‌ളാറ്റുകൾക്കും ജിഎസ്ടി നിരക്കുകൾ ബാധകമാണ്. ഇതിന് പിന്നാലെ വാടക വീടുകളിൽ താമസിക്കുന്നവർ 18 ശതമാനം ജിഎസ്ടി അടയ്ക്കണം എന്ന രീതിയിൽ ഒരു വാർത്ത സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. എന്നാൽ ഇതിന്റെ വാസ്തവനം എന്താണ്...

വ്യക്തികൾക്ക് വാടക നൽകുമ്പോൾ ജിഎസ്ടി നിരക്ക് ഈടാക്കില്ല. വാടക വീടുകൾക്ക് 18 ശതമാനം ജി.എസ്.ടി ഈടാക്കുമെന്ന വാർത്ത വ്യാജമാണെന്ന് പ്രസ് ഇൻഫർമേഷൻ ബ്യൂറോ അറിയിച്ചിട്ടുണ്ട്. വ്യവസായ സ്ഥാപനത്തിന് വാടകയ്ക്ക് വീട് നൽകുമ്പോൾ മാത്രമാണ് ജി.എസ്.ടി ഈടാക്കുക എന്ന് ബ്യൂറോ വ്യക്തമാക്കുന്നു.

എന്നാൽ നേരത്തെ ഓഫീസുകൾ അടക്കം വാണിജ്യ ആവശ്യത്തിന് പ്രവർത്തിക്കുന്ന കെട്ടിടങ്ങൾക്ക് വാടക കൊടുക്കുന്നുണ്ടെങ്കിൽ മാത്രമേ, ജിഎസ്ടി പരിധിയിൽ വരുമായിരുന്നുള്ളൂ. ഇപ്പോൾ കോർപ്പറേറ്റ് സ്ഥാപനങ്ങളോ സംരംഭകരോ ജീവനക്ക് താമസിക്കാനോ ഉൽപ്പാദന യൂണിറ്റിന്റെ ഭാഗമായോ വാസയോഗ്യമായ കെട്ടിടങ്ങൾ വാടകയ്ക്ക് എടുത്താൽ ജിഎസ്ടി ബാധകമാകും.'

പുതിയ പുതിയ ജിഎസ്ടി ചട്ടം അനുസരിച്ച് വാടകക്കാരൻ 18 ശതമാനം ചരക്കുസേവന നികുതി നൽകണം. അതേസമയം വാടകക്കാരന് ഇൻപുട്ട് ടാക്‌സ് ക്രെഡിറ്റ് വഴി ഇളവിന് അപേക്ഷിക്കാവുന്നതാണ്. സ്വകാര്യ വ്യക്തിക്ക് വ്യക്തിപരമായ ഉപയോഗത്തിന് വീട് നൽകിയാൽ നികുതി ഈടാക്കില്ലെന്നും പ്രസ് ഇൻഫർമേഷൻ ബ്യൂറോ ട്വീറ്റിലൂടെ അറിയിച്ചു.

നേരത്തെ പാക്ക് ചെയ്ത ഭക്ഷ്യവസ്തുക്കൾ ജി.എസ്.ടി ഏർപ്പെടുത്താനുള്ള തീരുമാനം കൗൺസിൽ എടുത്തിരുന്നു. ശ്മശാനങ്ങളിലെ ശവസംസ്‌കാരത്തിനും ആശുപത്രി സേവനത്തിനും അധിക നികുതി ഏർപ്പെടുത്തുമെന്നായിരുന്നു റിപ്പോർട്ടുകൾ. എന്നാൽ, ഇക്കാര്യത്തിൽ വ്യക്തത വരുത്തി ധനമന്ത്രി നിർമ്മല സീതാരാമൻ രംഗത്തെത്തിയിരുന്നു. ശവസംസ്‌കാരത്തിന് നികുതി ഏർപ്പെടുത്തിയിട്ടില്ല എന്നാണ് നിർമല സീതാരാമൻ പറഞ്ഞത്.

English summary

Will all tenants have to pay 18% GST on house rent? here is the answer