ഹജ്ജ് തീർത്ഥാടനം; ഇതുവരെ 98 ഇന്ത്യക്കാർ മരണപ്പെട്ടുവെന്ന് വിദേശകാര്യ മന്ത്രാലയം, വില്ലനായി കൊടുംചൂട്

റിയാദ്: ഈ വർഷം സൗദി അറേബ്യയിൽ അനുഭവപ്പെട്ട കടുത്ത ചൂടിലും മറ്റ് കാരണങ്ങളാലും ഹജ്ജ് തീത്ഥാടനത്തിനെത്തിയ 98 ഇന്ത്യക്കാർ മരണപ്പെട്ടതായി കേന്ദ്ര സർക്കാർ. ഈ വർഷം ഇതുവരെ 1,75,000 ഇന്ത്യക്കാർ ഹജ്ജിനായി സൗദി സന്ദർശിച്ചതായും സർക്കാർ അറിയിച്ചു. അവിടെയുള്ള ഇന്ത്യക്കാർക്കായി തങ്ങളാൽ കഴിയുന്നതെല്ലാം ചെയ്യുമെന്നാണ് സർക്കാർ അറിയിക്കുന്നത്.

തീർത്ഥാടനത്തിനിടെ 10 രാജ്യങ്ങളിൽ നിന്നുള്ള 1081 പേരുടെ മരണം റിപ്പോർട്ട് ചെയ്‌തിട്ടുണ്ട്. ഇത്തവണ കനത്ത ചൂടാണ് രാജ്യത്ത് അനുഭവപ്പെടുന്നത്. 46 ഡിഗ്രി സെൽഷ്യസിലും കൂടുതലായിരുന്നു ഹജ്ജ് കർമ്മങ്ങള്‍ നടക്കുന്ന ആഴ്‌ച രേഖപ്പെടുത്തിയ താപനില. മക്കയിലും മദീനയിലും സാധാരണ താപനിലയേക്കാൾ 1.5 മുതൽ 2 ഡിഗ്രി വരെ വർധിക്കാൻ സാധ്യതയുണ്ടെന്ന മുന്നറിയിപ്പും നിലവിലുണ്ടായിരുന്നു.

'ഈ വർഷം 17.5000 ഇന്ത്യൻ തീർത്ഥാടകരാണ് ഹജ്ജിനായി മക്ക സന്ദർശിച്ചത്. മെയ് 9 മുതൽ ജൂലൈ 22 വരെയാണ് ഹജ്ജ് കാലയളവ്. ഈ വർഷം ഇതുവരെ 98 മരണങ്ങൾ റിപ്പോർട്ട് ചെയ്യപ്പെട്ടിട്ടുണ്ട്," വിദേശകാര്യ മന്ത്രാലയത്തിന്റെ വക്താവ് രൺധീർ ജയ്‌സ്വാൾ പ്രതിവാര പത്രസമ്മേളനത്തിൽ അറിയിച്ചു.

'അറാഫത്ത് ദിനത്തിൽ ആറ് പേർ മരിച്ചു, 4 പേർ അപകട മരണങ്ങളായിരുന്നു. കഴിഞ്ഞ വർഷം, ഹജ്ജ് കാലയളവിൽ ആകെ മരിച്ചവരുടെ എണ്ണം 187 ആയിരുന്നു. എല്ലാ വർഷവും ഇന്ത്യയിൽ നിന്നുള്ള ധാരാളം തീർഥാടകർ ഹജ്ജിൽ പങ്കെടുക്കുന്നുണ്ട്, എന്നാൽ അവരിൽ ചിലർ നിർഭാഗ്യവശാൽ ഹജ്ജ് കാലയളവിൽ മരണപ്പെടുന്നു' അദ്ദേഹം കൂട്ടിച്ചേർത്തു

ഹജ്ജിൽ മരണങ്ങൾ അസാധാരണമായ കാര്യമല്ല. ചില സമയങ്ങളിൽ 2 ദശലക്ഷത്തിലധികം ആളുകൾ സൗദി അറേബ്യയിലേക്ക് ഹജ്ജിനായി യാത്ര ചെയ്‌ത അവസരങ്ങളും ഉണ്ടായിരുന്നു. ഇക്കുറി തീർഥാടനത്തിനിടെ ചൂടിൽ മരിച്ചവരുടെ എണ്ണം സംബന്ധിച്ച് സൗദി അറേബ്യ ഇതുവരെ പ്രതികരണം അറിയിച്ചിട്ടില്ല.

അതേസമയം, ആരോഗ്യ സേവനങ്ങൾക്കുള്ള മാർഗരേഖയും തീർഥാടകർക്ക് ആ സേവനങ്ങൾ എങ്ങനെ പ്രയോജനപ്പെടുത്താമെന്നും വ്യക്തമാക്കുന്ന രേഖ കേന്ദ്ര ആരോഗ്യ മന്ത്രാലയം ഇന്ന് പുറത്തിറക്കിയിട്ടുണ്ട്. ഈ മാർഗരേഖയുടെ സഹായത്തോടെ പ്രവർത്തനങ്ങൾ കൂടുതൽ സുഗമമാക്കാനാണ് കേന്ദ്ര സർക്കാർ ലക്ഷ്യമിടുന്നത്.

ഇന്ത്യയിലെ ഹജ്ജ് തീർത്ഥാടകരുടെ ആരോഗ്യവും ശാരീരികക്ഷമതയും വിലയിരുത്തുന്നതിനുമുള്ള മെഡിക്കൽ സ്ക്രീനിംഗും ഫിറ്റ്നസ് സർട്ടിഫിക്കറ്റും പരിഷ്‌കരിക്കുക, തീർഥാടകരെ അവരുടെ യാത്രയ്ക്കായി തിരഞ്ഞെടുക്കുന്നതിന് ഹെൽത്ത് കാർഡുകൾ നൽകുക, വാക്‌സിനേഷൻ ക്യാമ്പുകൾ സംഘടിപ്പിക്കുന്നതിന് സംസ്ഥാനങ്ങൾക്ക് വാക്‌സിനുകൾ നൽകുക, എംബാർക്കേഷനിൽ ഹെൽത്ത് ഡെസ്‌കുകൾ സ്ഥാപിക്കുക എന്നിവയാണ് സേവനങ്ങൾ.

English summary

Hajj Pilgrimage; Ministry Of External Affairs Says That 98 Indians Have Died In Extreme Heat So Far