'വീഡിയോ കണ്ടപ്പോൾ പരിഗണിക്കാമായിരുന്നു എന്ന് തോന്നി, ആസിഫ് ഇതുവരെ പ്രതികരിച്ചിട്ടില്ല'; രമേഷ് പിഷാരടി

നടൻ ആസിഫ് അലിയെ പൊതുവേദിയിൽ വച്ച് സംഗീത സംവിധായകൻ രമേശ് നാരായൺ അപമാനിച്ച സംഭവത്തിൽ പ്രതികരിച്ച് രമേഷ്‌ പിഷാരടി. എല്ലാവരും വിഷയത്തിൽ ആവശ്യത്തിന് അഭിപ്രായങ്ങൾ ഒക്കെ പറഞ്ഞുവെന്ന് ചൂണ്ടിക്കാട്ടിയ പിഷാരടി താനും ആ വീഡിയോ കണ്ടുവെന്നും ആസിഫ് അലിയെ രമേശ് നാരായണിന് കുറച്ചുകൂടി പരിഗണിക്കാമായിരുന്നു എന്ന് തോന്നിയെന്നും പിഷാരടി പറയുകയുണ്ടായി.

'രമേശ് നാരായൺ സർ അതിന്റെ പത്രസമ്മേളനം നടത്തി കഴിഞ്ഞു. ആസിഫ് അലി ഇതുവരെ പ്രതികരിച്ചിട്ടുമില്ല. അതൊക്കെ തന്നെയേ ഉള്ളൂ, എല്ലാവരും പറഞ്ഞത് തന്നെയാണ് പറയാനുള്ളത്. രമേശ് നാരായൺ സർ അത് കഴിഞ്ഞു പറഞ്ഞല്ലോ അദ്ദേഹം അത് ശ്രദ്ധിച്ചിരുന്നില്ലെന്ന്. നമ്മൾ ആ വീഡിയോ കാണുമ്പോൾ പരിഗണിക്കാമായിരുന്നു എന്ന് തോന്നി." രമേഷ് പിഷാരടി പറഞ്ഞു.

ആസിഫിനോട് രമേശ് നാരായണിന് ഒന്ന്കൂടി പ്രതികരിക്കാമായിരുന്നു എന്നും താരം പറഞ്ഞു. 'ഒരു സമ്മാനം കൊടുക്കുന്നതല്ലേ, അപ്പോൾ കുറച്ചുകൂടി അതിനോട് റെസ്പോണ്ട് ചെയ്യാമായിരുന്നു എന്ന് എനിക്ക് ആ വീഡിയോ കണ്ടപ്പോൾ തോന്നി. തീർച്ചയായും അത് ചെയ്യേണ്ടതായിരുന്നു.' രമേഷ് പിഷാരടി കൂട്ടിച്ചേർത്തു.

ജൂലൈ 15നായിരുന്നു വിവാദങ്ങള്‍ക്ക് കാരണമായ സംഭവങ്ങള്‍ നടന്നത്. എംടി വാസുദേവൻ നായരുടെ കഥകളെ ആസ്‌പദമാക്കി ഒരുങ്ങുന്ന ആന്തോളജി ചിത്രം 'മനോരഥങ്ങള്‍' ട്രെയിലർ ലോഞ്ചിലായിരുന്നു സംഭവം. ഇതിലൊരു സിനിമയില്‍ രമേഷ് നാരായണ്‍ സംഗീതം നല്‍കിയിരുന്നു. അദ്ദേഹത്തിന് മൊമെന്റോ നൽകാൻ ആസിഫ് അലിയെ ക്ഷണിക്കുകയായിരുന്നു.

എന്നാല്‍ നടന്‍ മൊമന്റോ നല്‍കിയത് നോക്കാനോ ഹസ്‌തദാനം നല്‍കാനോ രമേശ് നാരായൺ തയ്യാറായില്ല. പിന്നീട് സംവിധായകൻ ജയരാജിനെ വിളിച്ചുവരുത്തി രമേശ് നാരായൺ മൊമെന്റോ ഒന്ന് കൂടി കൈപ്പറ്റുകയായിരുന്നു. ഇതിന്റെ വീഡിയോ ദൃശ്യങ്ങൾ ഉൾപ്പെടെ സമൂഹ മാധ്യമങ്ങളിൽ വലിയ രീതിയിൽ പ്രചരിക്കപ്പെട്ടു. ഇതോടെ നിരവധി പേർ ആസിഫ് അലിക്ക് പിന്തുണയുമായി രംഗത്ത് എത്തിയിരുന്നു.

ഇതിന് പിന്നാലെ സംഭവത്തിൽ രമേശ് നാരായണിനോട് ഫെഫ്‌ക മ്യൂസിക് യൂണിയൻ വിശദീകരണം തേടിയിരുന്നു. ഇന്നലെയായിരുന്നു ഫെഫ്‌കയുടെ ഭാഗമായ മ്യൂസിക് യൂണിയൻ രമേശ്‌ നാരായണനോട് വിശദീകരണം തേടിയത്. മാധ്യമങ്ങളോട് പറഞ്ഞത് തന്നെയാണ് സംഗീത സംവിധായകൻ ആവർത്തിച്ചതെന്നാണ് സൂചന.

ആസിഫ് അലിയെ കരുതിക്കൂട്ടി അപമാനിച്ചിട്ടില്ലെന്നായിരുന്നു കഴിഞ്ഞ ദിവസം മാധ്യമങ്ങളോട് സംസാരിക്കവെ രമേശ് നാരായണ്‍ മറുപടി നൽകിയത്. ഇപ്പോള്‍ പ്രചരിക്കുന്ന ദൃശ്യങ്ങളിൽ അങ്ങനെ തോന്നിയെങ്കിൽ താൻ ക്ഷമ ചോദിക്കുന്നുവെന്നും ആസിഫിനെ വിളിച്ചു സംസാരിക്കുമെന്നും അദ്ദേഹം പറഞ്ഞിരുന്നു.

English summary

Actor Ramesh Pisharody Responded To The Questions Of Asif Ali And Ramesh Narayan Controversy