ഫോർട്ട് കൊച്ചിയിലെത്തുന്ന വിനോദ സഞ്ചാരികൾക്കും യാത്രക്കാർക്കും ഗുണം; കമാലക്കടവിൽ ഒഴുകുന്ന ബോട്ട് ജെട്ടി
കൊച്ചി: സംസ്ഥാന ജലഗതാഗത വകുപ്പിന്റെ ബോട്ടുകളിൽ ഫോർട്ട് കൊച്ചി ബീച്ചിലേക്കും മറ്റ് പ്രധാന വിനോദസഞ്ചാര കേന്ദ്രങ്ങളിലേക്കും പോകുന്നവർക് ഇനി യാത്ര എളുപ്പമാവും. കമാലക്കടവിൽ പുതുതായി നിർമ്മിക്കുന്ന ഒഴുകുന്ന ബോട്ട് ജെട്ടി പ്രവർത്തനം ആരംഭിക്കുന്നതോടെ ഈ ബുദ്ധിമുട്ടിന് പരിഹാരമാകുമെന്നാണ് പ്രതീക്ഷ. നിലവിൽ ഇതിനായി ഏറെ ദൂരം നടക്കേണ്ടിവരുന്ന സാഹചര്യമാണ്. അതാണ് പുതിയ ജെട്ടിയുടെ വരവോടെ മാറുക.
റോ-റോ ഫെറി ജെട്ടിക്ക് സമീപമാണ് പുതിയ ഒഴുകുന്ന ബോട്ട് ജെട്ടി നിർമ്മിച്ചിരിക്കുന്നത്. ഓണത്തിന് മുമ്പ് ഇവിടെ നിന്ന് സംസ്ഥാന ജലഗതാഗത വകുപ്പിന്റെ ബോട്ട് സർവീസുകൾ ആരംഭിക്കാനാകുമെന്നാണ് പ്രതീക്ഷ. ജെട്ടിയിലെ അവസാനഘട്ട വൈദ്യുത ജോലികൾ ഇപ്പോൾ പുരോഗമിക്കുകയാണ്. കൊച്ചി കോർപ്പറേഷന്റെ ഉപയോഗം കുറഞ്ഞിരുന്ന കമാലക്കടവ് ബോട്ട് ജെട്ടി പ്രദേശത്താണ് കൊച്ചി സ്മാർട്ട് മിഷൻ ലിമിറ്റഡിന്റെ ധനസഹായത്തോടെ പുതിയ സൗകര്യം ഒരുക്കിയത്.
ഫോർട്ട് കൊച്ചിയുടെ ഈ ഭാഗത്ത് നിലവിൽ സംസ്ഥാന ജലഗതാഗത വകുപ്പിന് ബോട്ടുകൾ നിർത്തുന്നതിനുള്ള പ്രത്യേക സൗകര്യമില്ല. പുതിയ ജെട്ടി വരുന്നതോടെ പ്രധാന കരപ്രദേശത്തുനിന്നും ഫോർട്ട് കൊച്ചിയിലെ പ്രധാന വിനോദസഞ്ചാര മേഖലയിലേക്കും തിരിച്ചും കൂടുതൽ എളുപ്പത്തിൽ എത്താൻ കഴിയുമെന്ന് അധികൃതർ പറഞ്ഞു. നിലവിലെ ഫോർട്ട് കൊച്ചി ബോട്ട് ജെട്ടിയിൽ നിന്ന് ഏകദേശം 12 മിനിറ്റ് നടന്നാലാണ് ബസ് സ്റ്റോപ്പിലെത്താൻ കഴിയുന്നത്.
എന്നാൽ പുതിയ ജെട്ടി പ്രവർത്തനം ആരംഭിക്കുന്നതോടെ ദിവസേന യാത്ര ചെയ്യുന്നവർക്കും വിനോദസഞ്ചാരികൾക്കും കൂടുതൽ സൗകര്യമാകും. സന്ദർശകർക്ക് പോകേണ്ട സ്ഥലങ്ങൾക്ക് കൂടുതൽ അടുത്തായി ഇറങ്ങാനും സാധിക്കും. വെള്ളത്തിന്റെ ഉയർച്ചയും താഴ്ചയും അനുസരിച്ച് ഉയരം ക്രമീകരിക്കാൻ കഴിയുന്ന രീതിയിലാണ് പുതിയ ജെട്ടി നിർമ്മിച്ചിരിക്കുന്നത്. അതിനാൽ വേലിയേറ്റ സമയത്തും വേലിയിറക്ക സമയത്തും ബോട്ടിൽ കയറാനും ഇറങ്ങാനും കൂടുതൽ സൗകര്യമുണ്ടാകും.
ഒരേസമയം നൂറിലധികം ആളുകളെ ഉൾക്കൊള്ളാൻ ജെട്ടിക്ക് കഴിയും. സംസ്ഥാന ജലഗതാഗത വകുപ്പിന്റെ ബോട്ടുകൾ നിർത്തുന്നതിനായി മാത്രമാണ് ഇത് രൂപകൽപ്പന ചെയ്തിരിക്കുന്നത്. എറണാകുളം ജില്ലയിൽ സംസ്ഥാന ജലഗതാഗത വകുപ്പ് ഇപ്പോൾ സർവീസ് നടത്തുന്ന എല്ലാ കാറ്റമരൻ ബോട്ടുകൾക്കും പ്രത്യേക മാറ്റങ്ങളൊന്നും വരുത്താതെ പുതിയ ജെട്ടിയിൽ നിർത്താൻ കഴിയുമെന്ന് അധികൃതർ അറിയിച്ചു.
കൊച്ചി സ്മാർട്ട് മിഷൻ ലിമിറ്റഡ് ജെട്ടി സംസ്ഥാന ജലഗതാഗത വകുപ്പിന് കൈമാറിയ ശേഷം ബോട്ട് സർവീസുകളുടെ സമയക്രമവും യാത്രാക്രമവും അന്തിമമായി തീരുമാനിക്കും. രാവിലെ എട്ട് മുതൽ രാത്രി എട്ട് വരെ സർവീസ് നടത്താനാണ് നിലവിലെ ആലോചന. പഴയ കമാലക്കടവ് ജെട്ടിക്ക് സമീപമുള്ള ടിക്കറ്റ് കൗണ്ടറിൽ നിന്നായിരിക്കും യാത്രക്കാർ ടിക്കറ്റ് എടുക്കുക. തുടർന്ന് ടിക്കറ്റുമായി ഒഴുകുന്ന ജെട്ടിയിലേക്ക് പോയാൽ മതി.
യാത്രക്കാരുടെ സുരക്ഷയ്ക്കായി ജെട്ടിയിൽ രക്ഷാ വളയങ്ങളും റബർ സുരക്ഷാ സംവിധാനങ്ങളും സ്ഥാപിക്കും. കൂടാതെ സുരക്ഷാ ജീവനക്കാരനെയും ഇവിടെ നിയോഗിക്കും. തുടക്കത്തിൽ ഈ മേഖലയിൽ പ്രതിദിനം ഒരു സർവീസ് നടത്താനാണ് ആലോചന. ഫോർട്ട് കൊച്ചിയിൽ വിനോദസഞ്ചാരികളുടെ തിരക്ക് കൂടുതലുള്ള ഞായറാഴ്ചകളിൽ അധിക സർവീസുകൾ നടത്താനും സാധ്യതയുണ്ട്.
ജലഗതാഗത വകുപ്പിന്റെ പുതിയ സർവീസിൽ ഏകദേശം 20 രൂപയായിരിക്കും നിരക്ക്. അതിനാൽ ദിവസേന യാത്ര ചെയ്യുന്നവർക്കും വിനോദസഞ്ചാരികൾക്കും ഇത് ചെലവ് കുറഞ്ഞ യാത്രാമാർഗമായി മാറും. എന്നാൽ വാട്ടർ മെട്രോയിൽ 30 മുതൽ 40 രൂപ വരെയാണ് യാത്രക്കായി നിലവിൽ ഈടാക്കുന്ന ടിക്കറ്റ് നിരക്ക്.
പുതിയ ജെട്ടിയിൽ പ്രതിദിനം കുറഞ്ഞത് 10,000 യാത്രക്കാരെ വരെ കൈകാര്യം ചെയ്യാൻ കഴിയുമെന്നാണ് അധികൃതർ കണക്കുകൂട്ടുന്നത്.
Click it and Unblock the Notifications
Sign in with Google