വിഷപ്പുകയില് മുങ്ങി നഗരം; ചികിത്സ തേടിയത് 678 പേര്, ആരോഗ്യ സര്വ്വേ നടത്താന് തീരുമാനം
ആശങ്കപ്പെടുന്ന രീതിയില് ആര്ക്കും ആരോഗ്യപ്രശ്നങ്ങള് റിപ്പോര്ട്ട് ചെയ്തിട്ടില്ലെന്നും മന്ത്രി പി.രാജീവ് പറഞ്ഞു.
കൊച്ചി: തീപിടിത്തത്തെ തുടര്ന്ന് വിഷപ്പുകയുണ്ടായ സാഹചര്യത്തില് ആരോഗ്യ സര്വ്വേ നടത്താന് തീരുമാനം. 678 പേരാണ് ഇതിനോടകം തന്നെ ചികിത്സ തേടിയിരിക്കുന്നത്. പുക കാരണം വായു മലീനികരണമുണ്ടായ സ്ഥലങ്ങളില് ആരോഗ്യ സര്വേ നടത്താനാണ് തീരുമാനമായിരിക്കുന്നത്. ദേശീയ ആരോഗ്യ മിഷന് കീഴിലെ ജീവനക്കാരുടെ നേതൃത്വത്തില് ഓരോ വീടുകളിലും കയറി വിവരശേഖരണം നടത്താനാണ് തീരുമാനം. കൂടുതല് മെഡിക്കല് സംഘടിപ്പിക്കുമെന്നും ജില്ലാ കളക്ടര് അറിയിച്ചു.
മന്ത്രിമാരായ പി രാജീവിന്റെയും എം.ബി രാജേഷിന്റെയും വീണാ ജോര്ജിന്റെയും നേതൃത്വത്തില് ഇന്ത്യന് മെഡിക്കല് അസോസിയേഷന്, സ്വകാര്യ ആശുപത്രി പ്രതിനിധികള്, വിദഗ്ധ ഡോക്ടര്മാര് എന്നിവരുമായി കളക്ടറേറ്റില് ചേര്ന്ന യോഗത്തിലാണ് തീരുമാനം. പുക മൂലമുണ്ടായ ആരോഗ്യപ്രശ്നങ്ങള് പരിഹരിക്കാന് ആരോഗ്യ വകുപ്പും സ്വകാര്യ ആശുപത്രികളും ഇന്ത്യന് മെഡിക്കല് അസോസിയേഷനും സഹകരിച്ച് പ്രവര്ത്തിക്കും.
കൂടുതല് മെഡിക്കല് ക്യാമ്പുകള് സംഘടിപ്പിക്കും. ബ്രഹ്മപുരത്തും പരിസര പ്രദേശങ്ങളിലുമായി ഒന്പത് മെഡിക്കല് ക്യാമ്പുകളാണ് ഇതിനോടകം സംഘടിപ്പിച്ചത്. ഓണ്ലൈനില് പങ്കെടുത്ത ആരോഗ്യ മന്ത്രി വീണാ ജോര്ജിന്റെ അഭ്യര്ത്ഥന പ്രകാരമാണ് കൂടുതല് ക്യാമ്പുകള് സംഘടിപ്പിക്കാനുള്ള സഹായ സഹകരണങ്ങള് നല്കാമെന്ന് യോഗത്തില് ഇന്ത്യന് മെഡിക്കല് അസോസിയേഷനും സ്വകാര്യ ആശുപത്രി കളും അറിയിച്ചത്. എല്ലാ ദിവസവും വിവിധ പ്രദേശങ്ങളിലായി ക്യാമ്പ് നടത്താനുള്ള സംവിധാനമാണ് ഒരുക്കുന്നത്. ആരോഗ്യ പ്രവര്ത്തകരുടെ സേവനത്തിന് പുറമേ ആംബുലന്സ് ഉള്പ്പെടെയുള്ള സംവിധാനങ്ങളും ഐ.എം.എ നല്കും.
Travel Tips: ഭൂമിയിലെ സ്വര്ഗം, കാശ്മീര്; യാത്ര പുറപ്പെടുന്ന വിനോദ സഞ്ചാരികള് അറിയേണ്ട കാര്യങ്ങള്
പുകയുമായി ബന്ധപ്പെട്ട ആരോഗ്യപ്രശ്നങ്ങളെ തുടര്ന്ന് വിവിധ സ്വകാര്യ ആശുപത്രികളില് ചികിത്സ തേടിയെത്തിയവരുടെ വിവരങ്ങള് സ്വകാര്യ ആശുപത്രികള് മെഡിക്കല് ഓഫീസുമായി പങ്കുവയ്ക്കണമെന്നും മന്ത്രിമാര് അഭിപ്രായപ്പെട്ടു. ഇതിനായി ആശുപത്രികള്ക്ക് പ്രത്യേക ഫോര്മാറ്റ് നല്കും. പൊതുജനാരോഗ്യ പ്രവര്ത്തനങ്ങള് ശക്തിപ്പെടുത്തുന്നതിന്റെ ഭാഗമായാണ് വിവരങ്ങള് ശേഖരിക്കുന്നത്. ആരോഗ്യ വകുപ്പും ഐ.എം.എയും ചേര്ന്നുള്ള പ്രവര്ത്തനങ്ങള് ഏകോപിപ്പിക്കുന്നതിന് ദേശീയ ആരോഗ്യ മിഷനിലെ ഡോക്ടറായ അതുല് ജോസഫ് മാനുവേലിനെ ചുമതലപ്പെടുത്തി.
ഇതിനോടകം 678 പേരാണ് വിവിധ ആരോഗ്യ പ്രശ്നങ്ങളെ തുടര്ന്ന് ചികിത്സ തേടിയത്. ഇതില് 421 പേര് ക്യാമ്പുകളിലാണ് എത്തിയത്. തീ അണയ്ക്കുന്നതിന് രംഗത്തുള്ള 68 പേര് ഉള്പ്പെടെയാണിത്. ആശങ്കപ്പെടുന്ന രീതിയില് ആര്ക്കും ആരോഗ്യപ്രശ്നങ്ങള് റിപ്പോര്ട്ട് ചെയ്തിട്ടില്ലെന്നും മന്ത്രി പി.രാജീവ് പറഞ്ഞു. കൊച്ചി കോര്പ്പറേഷന് മേയര് അഡ്വ. എം. അനില്കുമാര്, ജില്ലാ കളക്ടര് എന്.എസ്.കെ ഉമേഷ്, ഫോര്ട്ട് കൊച്ചി സബ് കളക്ടര് പി. വിഷ്ണുരാജ്, ദുരന്ത നിവാരണ വിഭാഗം ഡെപ്യൂട്ടി കളക്ടര് കെ. ഉഷ ബിന്ദു മോള് തുടങ്ങിയവര് പങ്കെടുത്തു
Click it and Unblock the Notifications
Sign in with Google