മോദി ഭരിച്ചിട്ടും ആദിവാസികളുടെ അവസ്ഥയ്ക്ക് മാറ്റമില്ല; കുറ്റപ്പെടുത്തലുമായി സികെ ജാനു

കോഴിക്കോട്: കേന്ദ്രസര്‍ക്കാരിനെതിരെ രൂക്ഷ വിമര്‍ശനവുമായി ആദിവാസി ഗോത്രസഭാ നേതാവ് സികെ ജാനു. നരേന്ദ്രമോദി സര്‍ക്കാര്‍ അധികാരത്തിലേറിയിട്ടും കേരളത്തിലെ ആദിവാസികളുടെ അവസ്ഥ മാറിയിട്ടില്ലെന്ന് സികെ ജാനു കുറ്റപ്പെടുത്തി. ആദിവാസികള്‍ ഇന്നും കൊടിയ ദുരിതം അനുഭവിക്കുകയാണെന്നും അവര്‍ പറഞ്ഞു.

കേരളത്തിലെ ആദിവാസികളുടെ അവസ്ഥയ്ക്ക് ഒരു മാറ്റവും ഇല്ല. പ്രശ്‌നങ്ങള്‍ പരിഹരിക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്രമോദിക്ക് കത്ത് നല്‍കും. കൂടാതെ മുത്തങ്ങാ കേസില്‍ ഉള്‍പ്പെട്ടിട്ടുളള ആദിവാസികളുടെ കേസുകള്‍ എഴുതി തള്ളണമെന്ന കാര്യവും മോദിയോട് ആവശ്യപ്പെടുമെന്നും ജാനു കോഴിക്കോട് പറഞ്ഞു.

കഴിഞ്ഞ നിയമസഭാ തിരഞ്ഞെടുപ്പില്‍ എന്‍ഡിഎ പിന്തുണയോടെ സുല്‍ത്താന്‍ ബത്തേരിയില്‍ നിന്നും സ്വതന്ത്ര്യ സ്ഥാനാര്‍ത്ഥിയായി സികെ ജാനു മത്സരിച്ച് തോറ്റിരുന്നു. പരാജയത്തെ തുടര്‍ന്ന് ജാനുവും സഹപ്രവര്‍ത്തകരും ചേര്‍ന്ന് രൂപം കൊടുത്ത ജനാധിപത്യ രാഷ്ട്രീയ സഭയെ എന്‍ഡിഎയിലെ ഘടകകക്ഷിയാക്കുന്ന കാര്യത്തില്‍ ബിജെപി നേതൃത്വം തീരുമാനം എടുത്തിരുന്നില്ല. ബിജെപി ദേശീയ സമിതിയോടനുബന്ധിച്ച് നടന്ന കൂടിക്കാഴ്ചയില്‍ ജാനു ഇതിലെ അതൃപ്തി ബിജെപി നേതൃത്വത്തെ അറിയിച്ചു.

ബിജെപി വാഗ്ദാനലംഘനം നടത്തിയെന്നാണ് ജാനുവിനൊപ്പമുളളവരുടെ ആരോപണം. ബിജെപി പറഞ്ഞ് പറ്റിച്ചു. തിരഞ്ഞെടുപ്പിന് ശേഷം അവഗണനയാണുണ്ടായതെന്നും ജാനുവിനോടടുപ്പമുള്ളവര്‍ ആരോപിക്കുന്നു. ബിജെപിയുടെ ദേശീയ കൗണ്‍സില്‍ നടക്കുന്ന സാഹചര്യത്തില്‍ മോഡി ഭരണത്തിന്‍ കീഴിലും തങ്ങള്‍ക്ക് ദുരിതമാണെന്ന ജാനുവിന്റെ കുറ്റപ്പെടുത്തലിന് പിന്നില്‍ രാഷ്ട്രീയ ലക്ഷ്യം കൂടിയുണ്ട്.

വണ്‍ഇന്ത്യയിലേക്ക് നിങ്ങള്‍ക്കും വാര്‍ത്തകളും ഫോട്ടോകളും അയയ്ക്കാം. ഉചിതമായവ പ്രസിദ്ധീകരിക്കും. അയയ്‌ക്കേണ്ട വിലാസം [email protected]

English summary

CK Janu Criticism against Narendra Modi government.