'വൈദ്യുതി വാങ്ങുന്നതിന് 8 സംസ്ഥാനങ്ങളുമായി ബന്ധപ്പെട്ടു'; ഒരാഴ്ചക്കുള്ളിൽ പ്രതിസന്ധി തീരുമെന്ന് മുഖ്യമന്ത്രി
തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി പരിഹരിക്കുന്നതിനായി ഊർജിത ശ്രമം നടക്കുന്നതായി മുഖ്യമന്ത്രി വിഡി സതീശൻ. വൈദ്യുതി പ്രതിസന്ധി പരിഹരിക്കുന്നതിനായി ലഭിക്കുന്ന എല്ലായിടത്ത് നിന്നും വൈദ്യുതി വാങ്ങിക്കൊണ്ടിരിക്കുകയാണ്. സര്ക്കാര് ഇത് ഏകോപിപ്പിക്കുന്നുണ്ട്. കഴിഞ്ഞ ദിവസം 150 മെഗാവാട്ട് വൈദ്യുതി ഒഡീഷയില് നിന്നും വാങ്ങിയിരുന്നു. 150 മെഗാവാട്ട് ന്യൂക്ലിയര് പവര് കോര്പ്പറേഷനില് നിന്നും വാങ്ങി. വൈദ്യുതി വാങ്ങുന്നതിന് എട്ട് സംസ്ഥാനങ്ങളുമായി ബന്ധപ്പെട്ടിട്ടുണ്ടെന്നും മുഖ്യമന്ത്രി പറഞ്ഞു.
വൈദ്യുതി പ്രതിസന്ധി പരിഹരിക്കുന്നതിന് ഹ്രസ്വകാലത്തേക്കും ദീര്ഘകാലവുമായ പദ്ധതികളാണ് സര്ക്കാര് ആവിഷ്കരിക്കുന്നത്. യഥാര്ത്ഥത്തില് മഴക്കുറവ് മാത്രമല്ല, വര്ധിച്ച ഉപഭോഗം, സ്വന്തം ഉത്പാദനത്തിലെ പരിമിതി, രാത്രിയിലെ ഉയര്ന്ന ഡിമാന്റ് എല്ലാം ബാധിച്ചു. നമുക്ക് സ്റ്റോറേജ് ഫെസിലിറ്റി ഇല്ല. 2500 മെഗാവാട്ട് റിന്യൂവിബള് എനര്ജി, സോളാര് എനര്ജി ഉത്പാദിപ്പിക്കുന്നുണ്ട്. പക്ഷേ സ്റ്റോറേജ് ഫെസിലിറ്റി ഇല്ല. പകല് മാത്രമേ ഉപയോഗിക്കാന് കഴിയൂ. ഇത് വൈദ്യുതി ബോര്ഡിന് കൊടുക്കുകയാണ്. ബോര്ഡ് പീക്ക് അവറില് പകരം വൈദ്യുതി വീടുകളിലേക്ക് നല്കുകയാണ്; അദ്ദേഹം പറഞ്ഞു.
2500 മെഗാവാട്ട് സോളാര് എനര്ജി ഉത്പാദിപ്പിച്ചിട്ടും സ്റ്റോറേജ് ഫെസിലിറ്റി ഇല്ലാത്തതിനാല് പീക്ക് അവറില് വൈദ്യുതി കിട്ടുന്നില്ല. കഴിഞ്ഞ വര്ഷം സെപ്റ്റംബറിനേക്കാള് 925 മെഗാവാട്ട് വൈദ്യുതി ഉപഭോഗം ഈ സെപ്റ്റംബറില് പല കാരണങ്ങള് കൊണ്ട് കൂടിയിട്ടുണ്ട്. അതിനനുസരിച്ചുള്ള പ്ലാനിംഗ് കഴിഞ്ഞ വര്ഷം മുതല് ഉണ്ടായില്ല. ലോംഗ് ടൈം പര്ച്ചേസും ഇല്ല. ഒരു യൂണിറ്റ് വൈദ്യുതി 4 രൂപ 29 പൈസയ്ക്ക് ലഭ്യമാകുന്ന ലോംഗ് ടൈം പര്ച്ചേസിന്റെ 25 വര്ഷത്തേക്കുള്ള കരാര് കഴിഞ്ഞ സര്ക്കാര് റദ്ദാക്കി. പകരം എഗ്രിമെന്റ് വച്ചില്ല. ദീര്ഘകാലത്തേയ്ക്ക് കരാര് വയ്ക്കുന്നതിന് ഞങ്ങള് ഗൗരവമായി ആലോചിച്ചു കൊണ്ടിരിക്കുകയാണ്; മുഖ്യമന്ത്രി ചൂണ്ടിക്കാട്ടി.
ന്യൂക്ലിയര് പവര് കോര്പ്പറേഷനുമായി ഞങ്ങള് ബന്ധപ്പെട്ടു. 85 ശതമാനം വൈദ്യുതി അവരുടെ സ്ഥാപനങ്ങളിലുളളത് സ്റ്റേറ്റുകള്ക്ക് കൊടുക്കും. പതിനഞ്ച് ശതമാനം മാത്രമേ അവരുടെ ഉപയോഗത്തിന് എടുക്കുകയുള്ളൂ. 280 മെഗാവാട്ട് അവരുടെ കൈവശമുണ്ട്. ഞങ്ങള് സംസാരിച്ച് നാല് രൂപ അറുപത്തിയഞ്ച് പൈസയ്ക്ക് 150 മെഗാവാട്ട് വൈദ്യുതി വാങ്ങിയിരുന്നു. ഇന്ന് തന്നെ ഒരു ടീം മുംബയില് എത്തി ന്യൂക്ലിയര് പവര് കോര്പ്പറേഷനുമായി ചര്ച്ച നടത്തും. കൂടുതല് വൈദ്യുതി എത്തിക്കാനുള്ള ശ്രമം തുടരും. എന്ടിപിസിയുമായും എല്ലാവരുമായി ചര്ച്ച നടത്തുകയാണ്; വിഡി സതീശൻ വാർത്താ സമ്മേളനത്തിൽ പറഞ്ഞു.
സര്ക്കാര് മുപ്പത് രൂപയ്ക്ക് വൈദ്യുതി വാങ്ങുന്നു എന്ന വാര്ത്തകള് തെറ്റാണ്. ഹിമാചല്പ്രദേശ് ഗവണ്മെന്റുമായി ചര്ച്ച നടത്തിയിരുന്നു. പകല് അവര് 130 മെഗാവാട്ട് വൈദ്യുതി തരാമെന്ന് സമ്മതിച്ചിരുന്നു. പക്ഷേ രാത്രി 80 മെഗാവാട്ട് മാത്രമേ നല്കൂ. രണ്ടിനും ഒരേ റേറ്റാണ്. 13 രൂപയോളം വരും. രാത്രി 80 മെഗാവാട്ട് കിട്ടുന്നതിന് വേണ്ടി പകലും വൈദ്യുതി വാങ്ങേണ്ടി വരും. അങ്ങനെ നോക്കുമ്പോള് മുപ്പത് രൂപയ്ക്ക് അടുത്ത് വരും. പ്രാേയാഗികത നോക്കി മാത്രമേ സര്ക്കാര് തീരുമാനമെടുക്കൂ; മുഖ്യമന്ത്രി പറയുന്നു.
ഇന്ത്യയില് ബിജെപി ഭരിക്കുന്ന സംസ്ഥാനങ്ങളിലുള്പ്പടെ വൈദ്യുതി പ്രതിസന്ധിയുണ്ട്. ബിജെപിക്ക് പറയുമ്പാള് 25 വര്ഷത്തെ മൊത്തത്തിലെടുത്ത് കണക്ക് പറയാം. അതില് കാര്യമില്ല. പവര്കട്ട് കുറച്ചു കൊണ്ടു വരാനാണ് സര്ക്കാര് ശ്രമിക്കുന്നത്. ഒരാഴ്ച കൊണ്ട് പൂര്ണ്ണമായി നിയന്ത്രണത്തിലേക്ക് കൊണ്ട് വരാനാണ് ശ്രമിക്കുന്നത്. എല്നിനോ പ്രതിഭാസം മൂലം ഒക്ടോബര് ഒന്ന് മുതല് അടുത്ത മണ്സൂണ് വരെ ചൂട് കൂടുന്നതിനാല് കൂടുതല് വൈദ്യുതി വേണ്ടി വരും. അതിനുളള പ്ലാന് വേറെ ചെയ്യുന്നുണ്ട്. ഒക്ടോബര് ഒന്ന് മുതല് അടുത്ത മണ്സൂണ് വരെയുള്ള ഒരു ദീര്ഘകാല പ്ലാന് ആണ് വേണ്ടത്. ഒരു പുതുക്കിയ വൈദ്യുതി നയം സര്ക്കാര് പ്രഖ്യാപിക്കുമെന്നും അദ്ദേഹം കൂട്ടിച്ചേർത്തു.
അതേസമയം, സംസ്ഥാനത്ത് വൈദ്യുതി ഉപഭോഗം ഉയർന്ന് തന്നെ നിൽക്കുകയാണ്. 150 മെഗാവാട്ട് കേന്ദ്രത്തിൽ നിന്നുള്ളതും 25 മെഗാവാട്ട് വിപണിയിൽ നിന്നുമുള്ളതായിരുന്നു ഇന്നലത്തെ അധിക വിഹിതം. 22.71 ദശലക്ഷം യൂണിറ്റായിരുന്നു ജല വൈദ്യുതി ഉത്പാദനം. സമാന സ്ഥിതി തുടരുന്നതിനാൽ കൂടുതൽ വൈദ്യുതി നൽകണമെന്ന് അഭ്യര്ഥിച്ച് കെഎസ്ഇബി ചെയര്മാൻ എംജി രാജമാണിക്യം നാളെ ന്യൂക്ലിയര് പവര് കോര്പറേഷൻ ചെയര്മാനെ കാണുമെന്ന് അറിയിച്ചിട്ടുണ്ട്.
Click it and Unblock the Notifications
Sign in with Google
