ഇതാണ് ആ സ്റ്റൈലന്‍ സബ് കലക്ടർ: ആല്‍ഫ്രഡ്, സമാധി വിവാദം സമാധനത്തോടെ കൈകാര്യം ചെയ്തു; കൈയ്യടി

തിരുവനന്തപുരം: നെയ്യാറ്റിന്‍കരയിലെ ഗോപന്‍ സ്വാമിയുടെ കല്ലറ പൊളിക്കുന്നതുമായി ബന്ധപ്പെട്ട് നടത്തിയ ഇടപെടലുകളിലൂടെ ശ്രദ്ധേയനായി മാറിരിക്കുകയാണ് തിരുവനന്തപുരം സബ് കളക്ടർ. ചെറിയ പ്രായമാണെങ്കിലും ഗോപന്‍സ്വാമിയുടെ കുടുംബത്തോടെ സംസാരിക്കുന്നതിലും മാധ്യമങ്ങളോട് നടത്തിയ പ്രതികരണത്തിലുമെല്ലാം അദ്ദേഹം സ്വീകരിച്ച പക്വത സോഷ്യല്‍ മീഡിയയില്‍ ചർച്ചാ വിഷയമാണ്. 'ഈ ചുള്ളൻ കലക്ടറെ പുറത്തെത്തിക്കാൻ സഹായിച്ച സമാധിക്ക് നന്ദി, നല്ല സ്റ്റൈലന്‍ കളക്ടർ, അതുപോലെ നല്ല സ്റ്റൈലന്‍ ഇടപെടല്‍' എന്നൊക്കെയാണ് കല്ലറപൊളിക്കുന്നതുമായി ബന്ധപ്പെട്ട വാർത്തകള്‍ക്ക് ഇടയില്‍ സമൂഹമാധ്യമങ്ങളില്‍ വരുന്ന കമന്റ്.

കണ്ണൂർ ജില്ലക്കാരനായ ആല്‍ഫ്രഡ് ഒ വിയാണ് സൈബർ ലോകത്ത് ചർച്ചാ വിഷയമായിരിക്കുന്ന ആ തിരുവനന്തപുരം സബ് കളക്ടർ. 2022 ബാച്ച് സിവിൽ സർവീസ് ഉദ്യോഗസ്ഥനായ ആല്‍ഫ്രഡ് നേരത്തെ പാലക്കാട് അസിസ്റ്റന്റ് കളക്ടറായിരുന്നു. തന്റെ മൂന്നാമത്തെ ശ്രമത്തിലാണ് ഇദ്ദേഹം സിവില്‍ സർവ്വീസ് പരീക്ഷയില്‍ മികച്ച വിജയം നേടുന്നത്. 57-ാം റാങ്കായിരുന്നു അന്ന് സ്വന്തമാക്കിയത്. ആദ്യ ശ്രമത്തിൽ മെയിൻസ് പരീക്ഷ പാസാകാൻ സാധിച്ചില്ലെങ്കിലും കഠിനാധ്വാനം തുടർന്നു. രണ്ടാം ശ്രമത്തിൽ 310-ാം റാങ്ക് നേടിയ ആൽഫ്രഡിന് ഇന്ത്യന്‍ പോസ്റ്റല്‍ സർവ്വീസും ലഭിച്ചിരുന്നു.

ബെംഗളൂരു ക്രൈസ്റ്റ് സർവകലാശാലയിൽ നിന്നാണ് ആല്‍ഫ്രഡ് കംപ്യൂട്ടർ സയന്‍സില്‍ ബിരുദപഠനം പൂർത്തിയാക്കുന്നത്. പഠനശേഷം ഡല്‍ഹിയില്‍ ഒരു വർഷത്തോളം സോഫ്റ്റ്‌‌വെയർ എൻജിനീയറായി ജോലി ചെയ്തു. ബിരുദ പഠന കാലത്ത് തന്നെ സിവില്‍ സർവ്വീസിനെക്കുറിച്ചുള്ള ചിന്ത മനസ്സിലുണ്ടായിരുന്നു. പഠനത്തില്‍ പൂർണ്ണമായും ശ്രദ്ധകേന്ദ്രീകരിച്ചപ്പോഴും ഇഷ്ട വിനോദങ്ങളായ സിനിമ കാണാനും ടർഫില്‍ ഫുട്ബോള്‍ കളിക്കാനുമൊക്കെ ആല്‍ഫ്രഡ് സമയം കണ്ടെത്തിയിരുന്നു.

അതേസമയം, ഗോപന്‍സ്വാമിയുടെ വിവാദ കല്ലറ തുറന്ന് മൃതദേഹം പുറത്തെടുത്ത് പോസ്റ്റുമോർട്ടം നടത്തി. തിരുവനന്തപുരം മെഡിക്കല്‍ കോളേജ് ആശുപത്രിയില്‍ എത്തിച്ചാണ് പോസ്റ്റുമോർട്ടം നടപടികള്‍ പൂർത്തിയാക്കിയത്. മരണ കാരണം ഇപ്പോൾ കൃത്യമായി പറയാൻ കഴിയില്ലെന്ന് ഫോറൻസിക് സംഘം അറിയിച്ചു.

മൃതദേഹത്തിൽ ക്ഷതങ്ങളോ മുറിവുകളോ ഇല്ല. എന്നാൽ ആന്തരികാവയവങ്ങളുടെ രാസ പരിശോധന റിപ്പോർട്ട് ലഭിച്ച ശേഷം മാത്രമേ മരണകാരണം കൃത്യമായി പറയാന്‍ സാധിക്കുകയുള്ളുവെന്നും ഡോക്ടർമാർ പൊലീസിനെ അറിയിച്ചു. പ്രധാനമായും ശ്വാസകോശത്തില്‍ നിന്നും ശേഖരിച്ച സാമ്പിളിന്റെ ഫലത്തിനായാണ് കാത്തിരിക്കുന്നത്. ഈ ഫലത്തെ ആശ്രയിച്ചായിരിക്കും മരണത്തില്‍ അസ്വാഭാവികതയുണ്ടോ എന്നത് അടക്കമുള്ള കാര്യങ്ങള്‍ കണ്ടെത്താനാകുക.