ഫോർട്ട് കൊച്ചി- വൈപ്പിൻ റോ-റോ സർവീസ്; ഭാവി ഉടൻ തീരുമാനിക്കും, ഭൂഗർഭ തുരങ്ക പാത ആവശ്യം ശക്തം!

Published: Monday, March 16, 2026, 7:20 [IST]

കൊച്ചി: നഗരത്തിലും അവിടെ നിന്ന് പുറത്തേക്കും യാത്ര ചെയ്യുന്നവരുടെ പ്രധാന മാർഗമാണ് റോ-റോ സർവീസുകൾ. ഇപ്പോഴിതാ കോർപ്പറേഷൻ റോ-റോ ഫെറി സർവീസുകളുടെ നടത്തിപ്പിൽ നിർണായക മാറ്റങ്ങൾക്ക് ഒരുങ്ങുകയാണ്. നിലവിൽ കേരള ഷിപ്പിംഗ് ആൻഡ് ഇൻലാൻഡ് നാവിഗേഷൻ കോർപ്പറേഷൻ ലിമിറ്റഡുമായുള്ള (കെഎസ്ഐഎൻസി) ദീർഘകാല പങ്കാളിത്തം അവസാനിപ്പിക്കുന്നതിനെക്കുറിച്ചാണ് ആലോചന.

അടുത്തിടെ ഇക്കാര്യത്തിൽ പലവിധ അഭിപ്രായങ്ങൾ വന്നുചേർന്നിരുന്നു. കഴിഞ്ഞ ദിവസം ചേർന്ന കോർപ്പറേഷൻ കൗൺസിൽ യോഗത്തിൽ, നിലവിലെ കരാർ റദ്ദാക്കുന്നതിനുള്ള നിയമസാധുത പരിശോധിക്കാൻ എക്‌സിക്യൂട്ടീവ് എഞ്ചിനീയർക്ക് മേയർ ഔദ്യോഗികമായി നിർദ്ദേശം നൽകിയതോടെ കാര്യങ്ങളുടെ വേഗത കൂടുകയാണ്. ഇത് വിഷയത്തിലെ നയപരമായ ഒരു പ്രധാന നീക്കമായാണ് വിലയിരുത്തപ്പെടുന്നത്.

റിപ്പോർട്ട് ഒരു മാസത്തിനുള്ളിൽ സമർപ്പിക്കണമെന്നാണ് മേയർ നിർദ്ദേശിച്ചിട്ടുള്ളത്. റിപ്പോർട്ട് ലഭിച്ച ശേഷം വിഷയം ചർച്ച ചെയ്യാൻ സർവകക്ഷി യോഗം വിളിച്ചു ചേർക്കും. സുതാര്യത ഉറപ്പാക്കുന്നതിനായി കെഎസ്ഐഎൻസി ഉദ്യോഗസ്ഥരെയും യോഗത്തിലേക്ക് ക്ഷണിക്കും. പുതിയ റോ-റോ കപ്പൽ സർവീസിന് തയ്യാറാകുകയും നിലവിലുള്ള രണ്ടെണ്ണം നിർബന്ധിത ഡ്രൈഡോക്കിങ്ങിനായി പിൻവലിക്കുകയും ചെയ്യുന്നതിന് മുന്നോടിയായാണ് ഈ നീക്കം.

അതിനിടെ റോ-റോ സർവീസുകളുടെ നടത്തിപ്പിനായി കോർപ്പറേഷൻ വിവിധ ബദൽ മാർഗങ്ങൾ സജീവമായി പരിഗണിക്കുന്നുണ്ട്. കൊച്ചി മെട്രോ റെയിൽ ലിമിറ്റഡിന് (കെഎംആർഎൽ) ചുമതല കൈമാറുന്നതിനെക്കുറിച്ചും അല്ലങ്കിൽ ലേലത്തിലൂടെ പുതിയ പങ്കാളിയെ കണ്ടെത്തുന്നതിനെക്കുറിച്ചും ആലോചനയുണ്ട്. അതല്ലെങ്കിൽ ഫെറി നടത്തിപ്പിനായി മാത്രമായി ഒരു സ്പെഷ്യൽ പർപ്പസ് വെഹിക്കിൾ രൂപീകരിക്കുന്നത് അടക്കമുള്ള സാധ്യതകളും കോർപ്പറേഷൻ പരിഗണിക്കുന്നുണ്ട്.

റോ-റോ ഫെറി സർവീസുകളിലെ വലിയ പ്രവർത്തന നഷ്‌ടങ്ങളെയും സാമ്പത്തിക കെടുകാര്യസ്ഥതയെയും ചൂണ്ടിക്കാട്ടി രാഷ്ട്രീയഭേദമന്യേ അംഗങ്ങൾ കെഎസ്ഐഎൻസിക്കെതിരെ രൂക്ഷമായ വിമർശനം ഉന്നയിച്ചിരുന്നു. ഇതോടെയാണ് ചോദ്യമുന അവർക്ക് നേരെ നീളുന്നതും, ഇപ്പോൾ നടപടിയിലേക്ക് അടുക്കുകയാണ്.

കെ.എസ്ഐഎൻസിയുടെ കണക്കുകൾ സംബന്ധിച്ച പലരും ആശങ്ക ഉന്നയിക്കുന്നുണ്ട്. സാങ്കേതിക വിദഗ്‌ധരുടെ സഹായം തേടി എസ്‍പിവി മാതൃകയിൽ സർവീസ് നടത്തുന്നതിനെയാണ് കൂടുതൽ പേരും പിന്തുണയ്ക്കുന്നത്. നിലവിലെ സാഹചര്യത്തിൽ എക്‌സിക്യൂട്ടീവ് എഞ്ചിനീയറുടെ റിപ്പോർട്ടായിരിക്കും ഫോർട്ട് കൊച്ചി-വൈപ്പിൻ പാതയിലെ ഫെറി സർവീസുകളുടെ ഭാവി നടത്തിപ്പ് എന്തെന്നും എങ്ങനെയെന്നും തീരുമാനിക്കുക.

ബദലായി ഭൂഗർഭ തുരങ്കപാത ആവശ്യം ശക്തമാവുന്നു

ഫോർട്ട് കൊച്ചി-വൈപ്പിൻ പാതയിലെ റോ-റോ സർവീസുകളുടെ നഷ്‌ട കണക്കുകൾ വലിയ ചോദ്യങ്ങളിലേക്കാണ് കണ്ണ് തുറക്കുന്നത്. അതിനിടയിലാണ് എല്ലാവരും ഒരുപോലെ കാത്തിരിക്കുന്ന ഫോർട്ട് കൊച്ചി-വൈപ്പിൻ തുരങ്കപാത എന്ന ആവശ്യം കൂടുതൽ ശക്തമാവുന്നത്. ഈ ഭൂഗർഭ പാത വന്നാൽ റോ-റോ സർവീസുകൾ പിന്നെ ആവശ്യമില്ലാതെ വരുമെന്നാണ് പലരും ചൂണ്ടിക്കാണിക്കുന്നത്. എന്നാൽ ഈ പദ്ധതിയുടെ പ്രാഥമിക ഘട്ടത്തിലാണ് ഇപ്പോഴുള്ളത്.

Published On March 16, 2026