ഇറച്ചി മുറിക്കുന്ന യന്ത്രം വഴി സ്വർണക്കടത്ത്; പിന്നിൽ മൂന്നു പേർ: ഒരാൾ സിനിമാ നിർമ്മാതാവ്

കൊച്ചി: ഇറച്ചി മുറിക്കുന്ന യന്ത്രം വഴി സ്വർണക്കടത്ത് നടത്തിയ കേസിൽ കസ്റ്റംസിന്റെ കൂടുതൽ വെളിപ്പെടുത്തൽ. സംഭവത്തിന് പിന്നിൽ മൂന്നംഗ സംഘമാണെന്ന് കസ്റ്റംസ് വ്യക്തമാക്കി. ഇതിൽ ഒരാൾ സിനിമ നിർമ്മാതാവാണ്. മൂവരും ചേർന്ന് ആണ് സ്വർണ കളളക്കടത്തിന് പണം മുടക്കിയത് എന്ന് കസ്റ്റംസ് അന്വേഷണത്തിന് പിന്നാലെ അറിയിച്ചു.

സിനിമാ നിർമാതാവ് സിറാജുദ്ദീൻ, എറണാകുളം സ്വദേശി തുരുത്തുമ്മേൽ സിറാജ് , തൃക്കാക്കര സ്വദേശി ഷാബിൻ എന്നിവരാണ് കസ്റ്റംസിന്റെ പിടിയിൽ ആയത്.

കേസിൽ ഉൾപ്പെടുന്ന തൃക്കാക്കര നഗരസഭാ വൈസ് ചെയർമാന്റെ മകൻ ഷാബിൻ നഗരസഭയിലെ കരാറുകാരൻ ആണ്. ഇതുവഴി കിട്ടിയ പണം വിദേശത്ത് നിന്നും സ്വർണം വാങ്ങുന്നതിന് ഉപയോഗിച്ചു എന്നാണ് കണ്ടെത്താൻ കഴിഞ്ഞത്.

അതേസമയം, ബംഗളൂർ, മുംബൈ എന്നീ വിമാനത്താവളങ്ങളിലേക്കും ഇതിന്റെ അമ്പേഷണം ആരംഭിച്ചു. പ്രതികൾ ഇതിന് മുമ്പും വലിയ യന്ത്രങ്ങളുടെ മറവിൽ സ്വർണം കടത്തിയതായി കസ്റ്റംസ് സംശയിക്കുന്നു. എന്നാൽ, സിനിമാ നിർമ്മാതാവായ സിറാജ്ജുദ്ദിന്റെ വീട്ടിൽ ഇന്നലെ പരിശോധന നടത്തിയിരുന്നു. കസ്റ്റംസ് പ്രിവന്റീവ് സംഘത്തിന്റെ നേതൃത്വത്തിൽ ആയിരുന്നു പരിശോധന. തൃക്കാക്കര മുനിസിപ്പൽ വൈസ് ചെയർമാന്റെ മകനാണ് സിറാജുദ്ദീൻ.

ഇയാൾക്ക് സ്വർണ്ണ കടത്തിയതിൽ പങ്കുണ്ടെന്ന സൂചനയെ തുടർന്നായിരുന്നു വീട്ടിൽ റെയ്ഡ് നടന്നത്. വാങ്ക്, ചാർമിനാർ സിനിമകളുടെ നിർമാതാവാണ് സിറാജുദ്ദീൻ. ഇറച്ചിവെട്ട് യന്ത്രത്തിന് ഉളളിൽ ഒളിപ്പിച്ച് രണ്ട് കിലോയിലേറെ സ്വർണം കടത്തി എന്നാണ് കേസ്. ഈ കേസുമായി ബന്ധപ്പെട്ട് ആയിരുന്നു കസ്റ്റംസിന്റെ റെയ്ഡ് നടന്നത്. ഇക്കഴിഞ്ഞ ദിവസം നെടുമ്പാശ്ശേരിയിൽ ഇറച്ചി കട്ടിംഗ് യന്ത്രത്തിന് ഉള്ളിൽ ഒളിപ്പിച്ച് സ്വർണം കടത്താൻ ശ്രമിച്ചിരുന്നു. ഇതിന് പിന്നാലെ ആണ് ഇബ്രാഹിം കുട്ടിയുടെ വീട്ടിൽ ഇന്നലെ റൈഡ് നടന്നത്.

കസ്റ്റംസിന് ലഭിച്ച വിവരങ്ങളുടെ അടിസ്ഥാനത്തിൽ ആയിരുന്നു പരിശോധന. ഇബ്രഹിം കുട്ടിയുടെ മകന് കള്ളക്കടത്ത് കേസുകളിൽ പങ്കുണ്ടെന്നും കസ്റ്റംസിന് വിവരം ലഭിച്ചിരുന്നു. ഇതിന് പിന്നാലെ കസ്റ്റംസ് ഉടൻ തന്നെ വീട്ടിൽ പരിശോധനയ്ക്ക് വേണ്ടി എത്തി. എന്നാൽ, റെയ്ഡ് റിപ്പോർട്ട് ചെയ്യാൻ എത്തിയ മാധ്യമ പ്രവർത്തകർക്ക് നേരെ ഇബ്രാഹിം കുട്ടിയുടെ ബന്ധുക്കൾ തട്ടിക്കയറി.

പതിവിൽ നിന്നും വിപരീതമായ രീതിയിലെ സ്വർണ്ണക്കടത്തായിരുന്നു സംസ്ഥാനത്ത് കഴിഞ്ഞ ദിവസം റിപ്പോർട്ട് ചെയ്തിരുന്നത്. ഇറച്ചി വെട്ടുന്ന യന്ത്രത്തിന് ഉള്ളിൽ വച്ചാണ് സ്വർണം കടത്താൻ ശ്രമിച്ചത്. നെടുമ്പാശ്ശേരി വിമാനത്താവളത്തിൽ ആയിരുന്നു സംഭവം. പ്രതികളിൽ നിന്നും കസ്റ്റംസ് 232 ഗ്രാം സ്വർണമാണ് പിടിച്ചെടുത്തത്. യന്ത്രം ഇറക്കുമതി ചെയ്ത തുരുത്തുമ്മേല്‍ എന്‍റര്‍ പ്രൈസസിന് എതിരെ കസ്റ്റംസ് അന്വേഷണം നടത്തിയിരുന്നു. ഇത് വാങ്ങാൻ എത്തിയ നകുൽ എന്നയാളുമായും ഈ സ്ഥാപനവുമായും നഗരസഭ വൈസ് ചെയർമാന്റെ മകൻ ഷാബിറിന് ബന്ധമുണ്ടെന്ന് കണ്ടെത്തിയതിന്റെ അടിസ്ഥാനത്തിലായിരുന്നു വീട്ടിൽ പരിശോധന നടന്നത്.

ഈ സ്ഥാപനത്തിന്റെ പേരിൽ നേരത്തെയും സമാനമായ രീതിയിൽ തട്ടിപ്പുണ്ട് ഉണ്ടായതായാണ് കസ്റ്റംസ് വിലയിരുത്തൽ. അതേസമയം, കരിപ്പൂർ വിമാനത്താവളത്തിൽ വൻ സ്വർണ്ണ വേട്ട നടന്നതായി കഴിഞ്ഞ ദിവസം റിപ്പോർട്ട് ചെയ്തിരുന്നു. വിമാനത്താവളത്തിൽ നിന്നും 850 ഗ്രാം സ്വർണം ആയിരുന്നു പിടികൂടിയത്. പ്രതിയെ പൊലീസ് അറസ്റ്റ് ചെയ്തു. കൊണ്ടോട്ടി സ്വദേശി മുഹമ്മദ് ആസിഫ് ആണ് പിടിയിലായത്. എന്നാൽ, അടുത്ത കാലത്തായി നിരവധി കേസുകൾ ആണ് കസ്റ്റംസിന്റെയും പൊലീസിന്റെയും നേതൃത്വത്തിൽ പിടി കൂടുന്നത്.

English summary

Gold Smuggling In Kochi: Customs Says, 3 people were involved in gold smuggling through a meat cutting machine