'പ്രളയാശ്വാസം പകര്‍ന്നോ സര്‍ക്കാര്‍': ദുരിതാശ്വാസ നിധിയിൽ ലഭിച്ചത് എന്ത്? ചിലവിട്ടത് എത്ര? കണക്കുകള്‍

തിരുവനന്തപുരം:സംസ്ഥാനം മറ്റൊരു പ്രളയ സാഹചര്യം നേരിടുമ്പോൾ ദുരിതാശ്വാസ പ്രവർത്തനങ്ങൾക്കായി സമാഹരിച്ച 4912.45 കോടിയിൽ ഇനിയും ചെലവിടാതെ 772.38 കോടി രൂപ.പൊതുജനങ്ങളിൽ നിന്നും സാലറി ചലഞ്ചിലൂടെയും സമാഹരിച്ച തുകയാണിത്.ദുരന്ത സഹായമടക്കം നൽകാനുണ്ടെന്ന ഒട്ടേറെ പരാതികൾ നിലനിൽക്കുമ്പോഴാണ് ചിലവാക്കാത്ത വലിയൊരു തുക മുഖ്യമന്ത്രിയുടെ ദുരിതാശ്വാസ നിധിയിൽ കിടക്കുന്നത്.

കെയർഹോം പദ്ധതിക്കായി സഹകരണവകുപ്പിൽ നിന്ന് ലഭിച്ച 52.69 കോടി മാത്രമാണ് മുഴുവൻ ചെലവഴിച്ചത്.
റീബിൽഡ് കേരളയ്ക്കുൾപ്പെടെയാണ് ദുരിതാശ്വാസനിധിയിലേക്ക് 2018 ജൂലായ് 27 മുതൽ 2020 മാർച്ച് മൂന്നുവരെ ധനസഹായം സ്വീകരിച്ചത്.2018, 20​19 പ്രളയകാലത്ത് 31,​000 കോടിയുടെ നാശനഷ്ടം ഉണ്ടായെന്നാണ് സർക്കാർ കണക്ക്.

റീബിൽഡ് കേരളയ്ക്കായി ലോക ബാങ്കിൽ നിന്നടക്കം സര്‍ക്കാര്‍ ധനസഹാവും തേടിയിരുന്നു.1780 കോടിയാണ് ലോകബാങ്ക് ആദ്യഗഡുവായി നല്‍കിയത്.ഏറ്റെടുത്ത പദ്ധതികളുടെ പ്രോജക്ട് പൂർത്തീകരണ റിപ്പോർട്ട് കൈമാറുന്ന മുറയ്ക്ക് രണ്ടാം ഗഡു നൽകാമെന്ന് ലോകബാങ്ക് അറിയിച്ചിരുന്നു. 5000 കോടിയായിരുന്നു ലോകബാങ്കില്‍ നിന്നുള്ള വാഗ്‌ദാനം. റിപ്പോർട്ട് നൽകാത്തതിനാൽ തുക കിട്ടിയില്ല.പൊതുജനങ്ങളില്‍ നിന്നും 230.93 കോടിയാണ് സമാഹരിച്ചത്.

സർക്കാർ പൊതുസ്ഥാപനങ്ങൾ, പെൻഷൻകാര്‍ എന്നിവടങ്ങളില്‍ നിന്നും 2,​865.4 കോടി രൂപയും , ജീവനക്കാരുടെ സാലറി ചലഞ്ച് വഴി 1,​229.89 കോടി രൂപയും സമാഹരിച്ചു. ഉത്സവബത്ത -117.69 കോടിരൂപ ,സഹകരണവകുപ്പ്. 52.69 കോടിരൂപ ,മദ്യവില്പനയിലെ അധികനികുതി- 308.68 കോടിരൂപ , സംസ്ഥാന ദുരന്തനിവാരണ വിഹിതം-107.17 കോടിരൂപ എന്നിങ്ങനെയാണ് മറ്റ് സമാഹരണ കണക്കുകള്‍. അതായത് ആകെ 4912.45 കോടി രൂപ സമാഹരിച്ചു.

ഇതില്‍ സ്ഥലവും വീടും നഷ്ടപ്പെട്ടവർക്ക് 2,​356.46 കോടി രൂപയാണ് നല്‍കിയത്.ഇത്തരക്കാർക്ക് ട്രഷറി അക്കൗണ്ടിൽ നിന്ന് പ്രത്യേകം 135.85 കോടി രൂപ, കുടുംബത്തിന് (6200രൂപ വീതം) നല്‍കി. അടിയന്തര സഹായം 457.58 കോടി രൂപ, കുടുംബശ്രീ 336.19 കോടി രൂപ, പുനർഗേഹം 250 കോടി രൂപ, തദ്ദേശറോഡ് നിർമ്മാണം 224.34 കോടി രൂപ, കൃഷിവകുപ്പ് മുഖേന കർഷകർക്ക് 85.6 കോടി രൂപ, സൗജന്യ കിറ്റ് 54.46 കോടി രൂപ, അരി 9.4 കോടി രൂപ,കർഷകർക്ക് 54 കോടി രൂപ, കെയർഹോം പ്രോജക്ട് 52.69 കോടി രൂപ,

കെ.എസ്.എഫ്.ഇ ഷെൽട്ടർഹോം 35.99 കോടി രൂപ, സപ്ലൈകോ 30.46 കോടി രൂപ, ചെറുകിട വ്യാപാരികൾക്ക് 20.96 കോടി രൂപ, എൻജിനിയർമാരുടെ ശമ്പളത്തിനും 20.28 കോടി രൂപ, വ്യാപാരി ക്ഷേമനിധി 5.4 കോടി രൂപ, മരുന്ന് 2.87 കോടി രൂപ, ടെക്സ്റ്റ്ബുക്കുകളുടെ നഷ്ടത്തിന് 47ലക്ഷം, വീട് നഷ്ടപ്പെട്ടവർക്ക് അധികധനം 10ലക്ഷം
മത്സ്യബന്ധനവകുപ്പിന് 7ലക്ഷം എന്നിങ്ങനെയാണ് ചിലവാക്കിയ തുകയുടെ കണക്ക്. അതായത് ആകെ 4140.07 കോടിരൂപ.

മുഖ്യമന്ത്രിയുടെ ദുരിതാശ്വാസനിധിയിൽ നിന്ന് തുക അനുവദിക്കുന്നത് ധനകാര്യ അഡി. ചീഫ് സെക്രട്ടറിയുടെ അനുമതിയോടെയാണ്. നടത്തിപ്പ് ചുമതല റവന്യു ദുരന്തനിവാരണ വകുപ്പിന്. ധനസെക്രട്ടറിയുടെ ഇഷ്ടത്തിനനുസരിച്ച് തുക കൈകാര്യം ചെയ്യാനാവില്ല.കൊവിഡ് കാല ദുരിതാശ്വാസത്തിന് ഈ മാസം അഞ്ചുവരെയുള്ള കണക്കിൽ സമാഹരിച്ചതിനെക്കാൾ നൂറുകോടിയിലധികം ചെലവിട്ടു. സമാഹരിച്ചത് 831.67കോടി. ചെലവിട്ടത് 941.07കോടി.

English summary

kerala Chief Minister Disaster Relief Fund for flood damage total amount and expenditure