കൊടുംചൂടിൽ വലഞ്ഞ് കേരളം; യെല്ലോ അലർട്ട് 12 ജില്ലകളിൽ, 3 ഡിഗ്രി വരെ താപനില കൂടും, ജാഗ്രത

തിരുവനന്തപുരം: കേരളത്തിൽ കനത്ത ചൂട് തുടരുന്നു. ഇന്നലെയും ഇന്നും പകൽ സമയത്ത് പുറത്തിറങ്ങാൻ കഴിയാത്ത തരത്തിലുള്ള ചൂടും വെയിലുമാണ് പലയിടത്തും അനുഭവപ്പെടുന്നത്. അതോടെ 12 ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. കഴിഞ്ഞ ദിവസങ്ങളിലും ഈ ജില്ലകളിൽ കടുത്ത ചൂട് തന്നെയാണ് അനുഭവപ്പെട്ടിരുന്നത്. അതിന്റെ തുടർച്ചയാണ് ഇന്നും നാളെയും ചൂട് തുടരുന്നത്.

കൊല്ലം, കോട്ടയം, പാലക്കാട് ജില്ലകളിലാണ് ചൂട് ഏറ്റവും ഉയർന്ന നിലയിൽ തുടരുന്നത്. ഈ ജില്ലകളിൽ താപനില 38°C വരെ ഉയരാൻ സാധ്യതയുണ്ടെന്നാണ് അറിയിപ്പ്. പത്തനംതിട്ട, ആലപ്പുഴ, എറണാകുളം, തൃശൂർ, കോഴിക്കോട്, കണ്ണൂർ ജില്ലകളിൽ 37 ഡിഗ്രി സെൽഷ്യസ് വരെയും, തിരുവനന്തപുരം, മലപ്പുറം, കാസർഗോഡ് ജില്ലകളിൽ 36 ഡിഗ്രി സെൽഷ്യസ് വരെയും ചൂട് വർധിക്കുമെന്നാണ് മുന്നറിയിപ്പ്.

ഉയർന്ന താപനില മുന്നറിയിപ്പ്-മഞ്ഞ അലർട്ട്

2026 മാർച്ച് 26 & 27 തീയതികളിൽ കൊല്ലം, കോട്ടയം, പാലക്കാട് ജില്ലകളിൽ ഉയർന്ന താപനില 38 °C വരെയും പത്തനംതിട്ട, ആലപ്പുഴ, തൃശൂർ, എറണാകുളം, കോഴിക്കോട്, കണ്ണൂർ ജില്ലകളിൽ ഉയർന്ന താപനില 37°C വരെയും; തിരുവനന്തപുരം, മലപ്പുറം, കാസർഗോഡ് ജില്ലകളിൽ ഉയർന്ന താപനില 36°C വരെയും ഉയരാൻ (സാധാരണയെക്കാൾ 2 to 3˚C വരെ കൂടുതൽ) സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.

ഉയർന്ന താപനിലയും ഈർപ്പമുള്ള വായുവും കാരണം ഈ ജില്ലകളിൽ, മലയോര മേഖലകളിലൊഴികെ, 2026 മാർച്ച് 26 മുതൽ 27 വരെ ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യതയുണ്ട്. അതേസമയം, മത്സ്യത്തൊഴിലാളി ജാഗ്രത നിർദേശവും പുറപ്പെടുവിച്ചിട്ടുണ്ട്. കേരള - കർണാടക - ലക്ഷദ്വീപ് തീരങ്ങളിൽ ഇന്ന് (26/03/2026) മത്സ്യബന്ധനത്തിന് തടസമില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.

അതേസമയം, ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി നിരവധി ഗുരുതരമായ ആരോഗ്യപ്രശ്‌നങ്ങൾക്ക് കാരണമാകുമെന്നതിനാൽ പൊതുജനങ്ങൾ ആവശ്യമായ ശ്രദ്ധ പുലർത്തണമെന്നും ജാഗ്രത പാലിക്കണമെന്നും സംസ്ഥാന ദുരന്തനിവാരണ അതോറിറ്റി അറിയിച്ചിട്ടുണ്ട്. ഇതുമായി ബന്ധപ്പെട്ട ജാഗ്രതാ നിർദ്ദേശവും അവർ പങ്കുവച്ചിട്ടുണ്ട്.

താപനില ഉയരാൻ സാധ്യത ഉള്ള സാഹചര്യത്തിൽ പകൽ 11 മണി മുതൽ 3 മണി വരെ നേരിട്ട് വെയിൽ ഏൽക്കുന്നത് ഒഴിവാക്കണമെന്നും ജാഗ്രത പാലിക്കണമെന്നും ദുരന്തനിവാരണ അതോറിറ്റി നിർദ്ദേശിച്ചു. അതുകൂടാതെ 28, 29, 30 തീയതികളിൽ സംസ്ഥാനത്ത് വേനൽ മഴ ലഭിക്കുമെന്നും അറിയിപ്പിലുണ്ട്. നേരിയതോ മിതമായതോ ആയ മഴ എല്ലാ ജില്ലകളിലും പെയ്യുവാൻ സാധ്യത ഉണ്ടെന്നാണ് ദുരന്തനിവാരണ അതോറിറ്റി അറിയിച്ചത്.

English summary

Kerala weather alert; Yellow alert in 12 districts, temperature to rise by up to 3 degrees.