കുടയെടുക്കാൻ മറക്കണ്ട; കാലവർഷത്തിന് മുൻപേ കേരളത്തിൽ മഴ ശക്തമാവും, കാരണം തെക്കുപടിഞ്ഞാറൻ മൺസൂൺ

തിരുവനന്തപുരം: സംസ്ഥാനത്ത് കാലവർഷം വരുന്നതിന് മുൻപ് തന്നെ മഴ ശക്തമായേക്കുമെന്ന മുന്നറിയിപ്പുമായി കാലാവസ്ഥാ വകുപ്പ്. തെക്കുപടിഞ്ഞാറൻ കാലവർഷം തെക്കൻ ബംഗാൾ ഉൾക്കലിൽ സജീവമായതോടെയാണ് കേരളത്തിൽ ഇക്കുറി മഴ നേരത്തെ എത്താനുള്ള സാധ്യതകൾ തെളിയുന്നത്. അടുത്ത ആഴ്‌ച അവസാനത്തോടെ തന്നെ ഇത് കേരളത്തിലെത്താൻ സാധ്യതയുണ്ടെന്നാണ് മുന്നറിയിപ്പിൽ വ്യക്തമാക്കുന്നത്.

തെക്കുകിഴക്കൻ അറബിക്കടൽ, മാലിദ്വീപ്, കൊമോറിൻ മേഖലയിലും, ആൻഡമാൻ കടൽ, ആൻഡമാൻ ദ്വീപ്, തെക്കൻ ബംഗാൾ ഉൾക്കടൽ, എന്നിവയുടെ ചില ഭാഗങ്ങളിലും കാലവർഷം വ്യാപിച്ചതായാണ് കേന്ദ്ര കാലാവസ്ഥ വകുപ്പിന്റെ ഏറ്റവും പുതിയ അറിയിപ്പിൽ പറയുന്നത്. എന്നാൽ ഈ കാലവർഷം എത്തും മുൻപേ കേരളത്തിൽ മഴ കനക്കുമെന്നാണ് ഇപ്പോഴത്തെ സാഹചര്യത്തിൽ കാലാവസ്ഥാ വകുപ്പ് തന്നെ പറയുന്നത്.

ഇതിന്റെ ഭാഗമായി അടുത്ത ദിവസങ്ങളിൽ കേരളത്തിലെ മഴ മുന്നറിയിപ്പുകൾ മാറ്റിയിട്ടുമുണ്ട്. കനത്ത മഴ പെയ്യാനുള്ള സാഹചര്യത്തിൽ വിവിധ ജില്ലകളിൽ യെല്ലോ, ഓറഞ്ച് അലർട്ടുകൾ പുറപ്പെടുവിച്ചിട്ടുണ്ട്. തെക്കുപടിഞ്ഞാറൻ മൺസൂണിന്റെ സ്വാധീനഫലമായി ചില ജില്ലകളിൽ അടുത്ത ദിവസങ്ങളിൽ അതിശക്തമായ മഴയ്ക്ക് സാധ്യത ഉണ്ടെന്നാണ് പ്രവചനം.

വരുന്ന മെയ് 19 തിങ്കളാഴ്‌ച മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ അതിശക്തമായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഈ സാഹചര്യത്തിൽ അഞ്ച് ജില്ലകളിലും ഓറഞ്ച് അലർട്ട് പ്രഖ്യാപിച്ചു. മലപ്പുറം ഒഴികെ മെയ് 20നും കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ ഓറഞ്ച് അലർട്ടുണ്ട്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് കാലാവസ്ഥാ വകുപ്പ് പ്രവചിക്കുന്നത്.

അടുത്ത ദിവസങ്ങളിലെ മഴ മുന്നറിയിപ്പ്

ഇന്ന് പത്തനംതിട്ട, ഇടുക്കി, എറണാകുളം, പാലക്കാട്, മലപ്പുറം ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്. ഒറ്റപ്പെട്ട ശക്തമായ മഴയ്ക്ക് സാധ്യതയെന്നാണ് ഇതിൽ വ്യക്തമാക്കുന്നത്. മെയ് 17ന് പത്തനംതിട്ട, ഇടുക്കി ജില്ലകളിലും മെയ് 18ന് പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലും യെല്ലോ അലർട്ട് ഏർപ്പെടുത്തിയിട്ടുണ്ട്.

ഇത് കൂടാതെ മെയ് 19ന് ഇടുക്കി, എറണാകുളം, തൃശൂർ, പാലക്കാട് ജില്ലകളിൽ മഞ്ഞ അലർട്ടുണ്ട്. മെയ് 20ന് തൃശൂർ, പാലക്കാട്, മലപ്പുറം എന്നീ ജില്ലകളിലും യെല്ലോ അലർട്ട്. അന്നേ ദിവസത്തെ ഓറഞ്ച് അലർട്ടുകൾ ഏതൊക്കെ ജില്ലകളിലാണെന്ന് നേരത്തെ പറഞ്ഞിരുന്നു. ഇതോടെ കേരളത്തിൽ ഒന്നാകെ അടുത്ത ദിവസങ്ങളിൽ മഴ ശക്തമാകുമെന്നാണ് കാലാവസ്ഥാ വകുപ്പ് പ്രവചിക്കുന്നത്.

English summary

Kerala Weather Updates: Chance Of Heavy Rains In The State Before The Monsoon Arrives, Caution.