മധുവിനെ തല്ലിക്കൊന്നത് തന്നെയെന്ന് പോസ്റ്റ്മോര്‍ട്ടം റിപ്പോര്‍ട്ട്, പ്രതികള്‍ക്കെതിരെ കൊലക്കുറ്റം

പ്രതികള്‍ക്കെതിരെ കൊലക്കുറ്റത്തിന് കേസെടുക്കുമെന്ന് തൃശൂര്‍ റേഞ്ച് ഐജി വ്യക്തമാക്കിയിട്ടുണ്ട്.

Updated: Saturday, February 24, 2018, 13:21 [IST]

അഗളി: അട്ടപ്പാടിയില്‍ ആള്‍ക്കൂട്ടം മര്‍ദിച്ച കൊന്ന ആദിവാസി യുവാവ് മധുവിന്റെ പോസ്റ്റ്‌മോര്‍ട്ടം റിപ്പോര്‍ട്ട് പുറത്ത്. പോസ്റ്റ്‌മോര്‍ട്ടം റിപ്പോര്‍ട്ടും മധുവിനെ നാട്ടുകാര്‍ തല്ലിക്കൊന്നതാണെന്ന വാദം ശരിവെക്കുന്നുണ്ട്. മധുവിന്റെ തലയില്‍ ഗുരുതര പരിക്കുണ്ട്. നെഞ്ചില്‍ മര്‍ദനമേറ്റ പാടുകളുമുണ്ട്. മരണകാരണം ആന്തരിക രക്തസ്രാവമാണെന്നാണ് റിപ്പോര്‍ട്ട്. ഇവയെല്ലാം ശരിവെക്കുന്നത് മധു അടിയേറ്റ് തന്നെയാണ് മരിച്ചതെന്നാണ്. ഡോക്ടര്‍മാര്‍ ഇക്കാര്യം ശരിവെക്കുന്നുണ്ട്.

അതേസമയം പ്രതികള്‍ക്കെതിരെ കൊലക്കുറ്റത്തിന് കേസെടുക്കുമെന്ന്് തൃശൂര്‍ റേഞ്ച് ഐജി വ്യക്തമാക്കിയിട്ടുണ്ട്. ഇവര്‍ക്ക് കടുത്ത ശിക്ഷ തന്നെ ലഭിക്കാനുള്ള സാധ്യതയുണ്ട്. നിലവില്‍ അസ്വാഭാവിക മരണത്തിനാണ് പ്രതികള്‍ക്കെതിരെ കേസെടുത്തിരിക്കുന്നത്. കേസ് പ്രത്യേക അന്വേഷണ സംഘമാണ് അന്വേഷിക്കുന്നത്. സര്‍ക്കാരും പ്രതികള്‍ക്കെതിരെ കര്‍ശന നടപടിയെടുക്കണമെന്ന് നിര്‍ദേശം നല്‍കിയിട്ടുണ്ട്..

മധു കടയില്‍ നിന്ന് സാധനങ്ങള്‍ മോഷ്ടിച്ചെന്ന് ആരോപിച്ചായിരുന്നു മര്‍ദനം. ഇയാളെ കാട്ടില്‍ നിന്ന് പിടിച്ചുകൊണ്ടുവന്ന ശേഷമായിരുന്നു മര്‍ദനം. അതേസമയം പോസ്റ്റ്‌മോര്‍ട്ടം റിപ്പോര്‍ട്ട് പുറത്തുവന്നതോടെ മധുവിന്റെ അമ്മയും സഹോദരിയും നടത്തി വന്ന സമരം ശക്തമാക്കാനും സാധ്യതയുണ്ട്. മധുവിന്റെ അമ്മയും സഹോദരിയും പോലീസിനും വനംവകുപ്പ് ഉദ്യോഗസ്ഥര്‍ക്കുമെതിരെ നിരവധി ആരോപണങ്ങളും ഉന്നയിച്ചിട്ടുണ്ട്. കേസില്‍ അന്വേഷണം ഊര്‍ജിതമാക്കാന്‍ പോലീസിന് സമ്മര്‍ദവുമുണ്ട്. വിഷയത്തില്‍ ഷംസുദ്ദീന്‍ എംഎല്‍എയുടെ സഹായിയും കുരുക്കിലാണ്. ഇയാള്‍ക്കും കേസില്‍ പങ്കുണ്ടെന്ന നിഗമനത്തിലാണ് പോലീസ്.