ചരിത്രം കുറിച്ച് ശുഭാംശു ശുക്ല. അന്താരാഷ്ട്ര ബഹിരാകാശനിലയത്തിൽ പ്രവേശിക്കുന്ന ആദ്യ ഇന്ത്യാക്കാരൻ
ചരിത്രനിമിഷത്തിലേക്ക് ശുഭാംശു, നാല് പതിറ്റാണ്ടിനിപ്പുറം ശൂന്യാകാശത്ത് ഇന്ത്യക്കാരൻ. ആക്സിയം -4 ദൗത്യം ഡോക്കിങ് വിജയകരമായി പൂർത്തിയാക്കി. അതേസമയം, കേരളത്തിൽ ഇന്നും ശക്തമായ മഴ തുടരുമെന്നാണ് കേന്ദ്ര കാലാവസ്ഥാ വകുപ്പ് നൽകുന്ന മുന്നറിയിപ്പ്. കഴിഞ്ഞ ദിവസങ്ങളിൽ എല്ലാം തന്നെ ശക്തമായ മഴയാണ് വിവിധ ജില്ലകളിൽ പെയ്തത്. വടക്കൻ ജില്ലകളിൽ തോരാമഴ വലിയ രീതിയിൽ ജനജീവിതത്തെ ബാധിക്കുകയും ചെയ്തു. അതിതീവ്ര മഴയുടെ സാഹചര്യത്തിൽ ഇന്ന് മൂന്ന് ജില്ലകളിൽ റെഡ് അലർട്ടും പ്രഖ്യാപിച്ചിട്ടുണ്ട്. ഏഴിടത്ത് ഓറഞ്ച് അലർട്ടും ബാക്കിയുള്ള ജില്ലകളിൽ യെല്ലോ അലർട്ടുമുണ്ടാവും. മത്സ്യത്തൊഴിലാളികളോട് കടലിൽ പോവരുതെന്ന നിർദ്ദേശവും പുറപ്പെടുവിച്ചിട്ടുണ്ട്.
അതിനിടെ ഗവർണറുമായി ബന്ധപ്പെട്ട ഭാരതാംബ വിവാദം വീണ്ടും വലിയ രീതിയിൽ ചർച്ചയാവുകയാണ്. കേരള സർവകലാശാല സെനറ്റ് ഹാളിലെ പരിപാടിയിൽ ചിത്രം വച്ചതാണ് ഏറ്റവും ഒടുവിലത്തെ സംഭവം. ഇതോടെ ഗവർണർക്കെതിരെ പ്രതിഷേധം കടുപ്പിക്കാനുള്ള തീരുമാനത്തിലാണ് എസ്എഫ്ഐയും കെഎസ്യുവും. ദേശീയ-അന്തർദേശീയ തലത്തിൽ വേറെയും സംഭവ വികാസങ്ങൾ നടക്കുന്നുണ്ട്. മറ്റ് പ്രധാനവാർത്തകൾ അറിയാം.
പുരസ്കാരം സ്വീകരിക്കില്ല; എം സ്വരാജ്
കേരള സാഹിത്യ അക്കാദമി ഉപന്യാസ വിഭാഗത്തില് പ്രഖ്യാപിച്ച പുരസ്കാരം സ്വീകരിക്കുന്നില്ലെന്ന് എം സ്വരാജ്.ഒരു വിധത്തിലുമുള്ള പുരസ്കാരങ്ങൾ സ്വീകരിക്കില്ല എന്നത് വളരെ
മുൻപുതന്നെയുള്ള നിലപാടാണെന്നും പൊതുപ്രവർത്തനവും സാഹിത്യ പ്രവർത്തനവും ഉൾപ്പെടെ ഒരു കാര്യത്തിനും ജീവിതത്തിലൊരിക്കലും പുരസ്കാരങ്ങൾ സ്വീകരിക്കുന്നതല്ല എന്ന നിലപാട് ആവർത്തിക്കുകയാണെന്നും സ്വരാജ് വ്യക്തമാക്കി.
നിലമ്പൂരിലെ പരാജയത്തെ കുറിച്ച് പഠിക്കണം, ഇല്ലെങ്കിൽ തിരിച്ചടി; പി രാജീവ്
നിലമ്പൂർ ഉപതിരഞ്ഞെടുപ്പിലെ പരാജയത്തെ കുറിച്ച് കൃത്യമായി പഠിച്ചില്ലെങ്കിൽ വരാനിരിക്കുന്ന നിയമസഭ തിരഞ്ഞെടുപ്പിൽ കനത്ത തിരിച്ചടിക്ക് സാധ്യതയുണ്ടെന്ന് മന്ത്രി പി രാജീവ്. സെക്രട്ടറിയേറ്റ് യോഗത്തിലാണ് അദ്ദേഹത്തിന്റെ പ്രതികരണം.
ഡോക്കിങ് കാണാം
LIVE: @Axiom_Space's #Ax4 mission is scheduled to dock with the @Space_Station at approximately 6:30am ET (1030 UTC). Watch with us as the multinational crew starts their two-week stay aboard the orbiting laboratory. https://t.co/NrThYrmRrN
— NASA (@NASA) June 26, 2025
റെയിൽവേ ട്രാക്കിൽ കാർ ഓടിച്ചുകയറ്റി യുവതി; ട്രെയിനുകൾ വഴിതിരിച്ചു വിട്ടു
റെയിൽവെ ട്രാക്കിലേക്ക് കാർ ഓടിച്ച് കയറ്റി. 15 ട്രെയിനുകൾ വഴി തിരിച്ചു വിട്ടു. സ്ത്രീ പിടിയിൽ. സംഭവം തെലങ്കാനയിൽ. ട്രാക്കിലൂടെ കാറോടിച്ചത് 3 കിലോമീറ്ററോളം. ട്രാക്കിൽ നിന്ന് കാർ മാറ്റിയത് ഏറെ നേരം പരിശ്രമിച്ച്. സോഫ്റ്റ് വെയർ എഞ്ചിനീയർ രവിക സോണിയെ അതിക്രമത്തിന് പ്രേരിപ്പിച്ചത് എന്തെന്ന് അന്വേഷണം തുടങ്ങി പൊലീസും റെയിൽവെയും. മാനസിക അസ്വസ്ഥതകൾ ഉണ്ടോ, ലഹരിയുടെ സ്വാധീനത്തിലാണോ എന്ന് പരിശോധിക്കുന്നു
കനത്ത മഴ തുടരുന്നു; ഷൊർണൂരിൽ ഭാരതപ്പുഴ കരകവിഞ്ഞു
ശക്തമായ മഴയെ തുടർന്ന് ഷൊർണൂർ ഭാരതപ്പുഴ കരകവിഞ്ഞു. നമ്പ്രം റോഡിലേക്ക് വെള്ളം കയറിയതിനെ തുടർന്ന് റോഡ് അടച്ചിരിക്കുകയാണ്.75 ഓളം കുടുംബങ്ങളാണ് നമ്പ്രം പ്രദേശത്തുള്ളത്. നിലവിൽ വീടുകളിൽ വെള്ളം കയറിയിട്ടില്ലെന്നാണ് വിവരം. ഷോർണൂർ ശാന്തിതീരം പൊതുശ്മശാനത്തിലേക്കുള്ള വാഹനഗതാഗതം തടസപ്പെട്ടിരിക്കുകയാണ്.
കേരളത്തിലെ മഴ മുന്നറിയിപ്പിൽ മാറ്റം; മൂന്നിടത്ത് റെഡ് അലർട്ട്
സംസ്ഥാനത്ത് വീണ്ടും മഴ ശക്തമായതിന് പിന്നാലെ മഴ മുന്നറിയിപ്പിൽ മാറ്റം. ഇടുക്കി, മലപ്പുറം, വയനാട് ജില്ലകളിൽ റെഡ് അലർട്ട് പ്രഖ്യാപിച്ചു. കൂടാതെ 7 ജില്ലകളിൽ ഓറഞ്ച് അലർട്ടും പ്രഖ്യാപിച്ചിട്ടുണ്ട്. കണ്ണൂര്, കോഴിക്കോട്, പാലക്കാട്, തൃശ്ശൂര്, എറണാകുളം, കോട്ടയം, പത്തനംതിട്ട ജില്ലകളിലാണ് ഓറഞ്ച് അലർട്ട് നിലവിലുള്ളത്. മറ്റ് ജില്ലകളില് യെല്ലോ അലര്ട്ടുമുണ്ടാവും.
ഭരണഘടനയാണ് പരമോന്നതം, പാർലമെന്റല്ല; സുപ്രീം കോടതി ചീഫ് ജസ്റ്റിസ്
ഇന്ത്യന് ഭരണഘടനയാണ് പരമോന്നതമെന്നും ജനാധിപത്യത്തിന്റെ മൂന്ന് ഘടകങ്ങളും അതിന്റെ കീഴിലാണ് പ്രവര്ത്തിക്കുന്നതെന്നും വ്യക്തമാക്കി ചീഫ് ജസ്റ്റിസ് ബിആര് ഗവായ്. പാര്ലമെന്റിന് ഭരണഘടന ഭേദഗതി വരുത്താന് അധികാരമുണ്ടെങ്കിലും ഭരണഘടനയുടെ അടിസ്ഥാന ഘടന മാറ്റാന് കഴിയില്ലെന്നും അദ്ദേഹം വ്യക്തമാക്കി. അമരാവതിയില് ബാര് അസോസിയേഷന് സംഘടിപ്പിച്ച പരിപാടിയില് സംസാരിക്കുകയായിരുന്നു ചീഫ് ജസ്റ്റിസ്.
മതം ഭീഷണിയിലാണെന്ന് ആവർത്തിച്ച് അവകാശപ്പെട്ടുകൊണ്ട് ബിജെപിയും എഐഎഡിഎംകെയും ജനങ്ങളെ ഭിന്നിപ്പിക്കാൻ ശ്രമിക്കുകയാണെന്ന് തമിഴ്നാട് മുഖ്യമന്ത്രി എംകെ സ്റ്റാലിൻ. മധുരയിൽ നടന്ന മുരുകൻ സമ്മേളനത്തിന് ദിവസങ്ങൾക്ക് ശേഷമാണ് അദ്ദേഹത്തിന്റെ പരാമർശം. നിരവധി ബിജെപി നേതാക്കൾ നേരത്തെ ഇത് സാധൂകരിക്കുന്ന പ്രസ്താവനകൾ നടത്തിയിരുന്നു.
ഭാരതാംബ വിഷയത്തിൽ മുഖ്യമന്ത്രിയുടെ നടപടി വൈകി; പ്രതിപക്ഷ നേതാവ്
ഭാരതാംബ വിഷയത്തിൽ മുഖ്യമന്ത്രിയുടെ നടപടി വൈകിയെന്ന ആരോപണവുമായി പ്രതിപക്ഷ നേതാവ് വിഡി സതീശൻ. ഇത്രയും നാളും മൗനത്തിന്റെ വാത്മീകത്തിലായിരുന്നു മുഖ്യമന്ത്രിയെന്നും ഗവർണറുടെ ഔദ്യോഗിക പരിപാടികളും രാജ്ഭവനും ആർഎസ്എസ് പരിപാടികൾ ആയി മാറ്റരുതെന്നും സതീശൻ ചൂണ്ടിക്കാട്ടി. ഇത് ഗവർണറെ ബോധ്യപ്പെടുത്തേണ്ടത് മുഖ്യമന്ത്രിയാണെന്നും പ്രതിപക്ഷ നേതാവ് പറയുന്നു.
തൃശൂരിൽ വാഹനാപകടത്തിൽ യുവാവ് മരിച്ചു; പ്രതിഷേധവുമായി ബിജെപി
തൃശൂർ എംജി റോഡിൽ യുവാവ് ബസ് കയറി മരിച്ചതിൽ ശക്തമായ പ്രതിഷേധവുമായി ബിജെപി. റോഡിലെ കുഴിയിൽ വീഴാതിരിക്കാൻ ബൈക്ക് വെട്ടിച്ചപ്പോഴാണ് അപകടമുണ്ടായത്. ഫാർമസി ജീവനക്കാരൻ വിഷ്ണുദത്ത് (22) ആണ് മരിച്ചത്. പിന്നിൽ നിന്നുവന്ന സ്വകാര്യ ബസ് ശരീരത്തിലേക്ക് ഇടിച്ചുകയറുകയായിരുന്നു. വിഷ്ണുവിന്റെ അമ്മ പത്മിനി ഗുരുതരാവസ്ഥയിൽ ആശുപത്രിയിലാണ്.
നിലമ്പൂർ ഉപതിരഞ്ഞെടുപ്പ് തോൽവി; സിപിഎമ്മിൽ സ്വയം വിമർശനം
നിലമ്പൂര് ഉപതിരഞ്ഞെടുപ്പിലെ എം സ്വരാജിന്റെ അപ്രതീക്ഷിത തോല്വിയില് സിപിഎമ്മിൽ സ്വയം വിമർശനം. നിലമ്പൂരിൽ കണക്കുകൂട്ടല് പിഴച്ചെന്നാണ് സിപിഎം സംസ്ഥാന സെക്രട്ടേറിയറ്റിലെ വിമർശനം. ശരിയായ വിലയിരുത്തൽ ഇല്ലെങ്കിൽ വലിയ തിരിച്ചടി ഉണ്ടാകുമെന്നാണ് മന്ത്രി പി രാജീവ് ഓർമ്മിപ്പിച്ചത്. എംവി ഗോവിന്ദന്റെ ആർഎസ്എസ് ബന്ധ പരാമർശത്തിലും വിമർശനം ഉയർന്നു.
എന്നെയാരും ക്യാപ്റ്റൻ ആക്കിയില്ല; രമേശ് ചെന്നിത്തല
തന്നെയാരും ക്യാപ്റ്റൻ എന്ന് വിളിച്ചില്ലെന്ന് മുതിർന്ന കോൺഗ്രസ് നേതാവ് രമേശ് ചെന്നിത്തല. തന്റെ നേതൃത്വത്തിൽ നേരത്തെ എത്രയോ ഉപതിരഞ്ഞെടുപ്പുകൾ ജയിച്ചിട്ടുണ്ട്. എന്നിട്ടും അന്ന് തന്നെയാരും ക്യാപ്റ്റൻ ആക്കിയില്ലെന്നും കാലാളും ആക്കിയില്ലെന്നും ചെന്നിത്തല പരിഭവം പ്രകടിപ്പിച്ചു. എങ്കിലും പ്രതിപക്ഷ നേതാവ് നന്നായി പ്രവർത്തിച്ചുവെന്നും ചെന്നിത്തല പറയുകയുണ്ടായി.
സെനറ്റ് ഹാൾ സംഘര്ഷം; എസ്എഫ്ഐ-കെഎസ്യു പ്രവര്ത്തകര്ക്കെതിരെ കേസെടുത്തു
കേരള സർവകലാശാല സെനറ്റ് ഹാളിലെ കാവിക്കൊടിയേന്തിയ ഭാരതാംബ വിവാദത്തിനിടെയുണ്ടായ സംഘര്ഷവുമായി ബന്ധപ്പെട്ട് പോലീസ് കേസെടുത്തു. സെനറ്റ് ഹാളിന് പുറത്തുണ്ടായ സംഘര്ഷത്തിലടക്കം രണ്ടു കേസുകളാണ് കന്റോണ്മെന്റ് പോലീസ് സ്വമേധയാ എടുത്തത്. ഇവിടെ പ്രതിഷേധിച്ച എസ്എഫ്ഐ-കെഎസ്യു പ്രവര്ത്തകര്ക്കെതിരെയാണ് കേസ്.
കൽപ്പാത്തിപ്പുഴ, ഭാരതപ്പുഴ തീരങ്ങളിൽ കഴിയുന്നവർ ജാഗ്രത പാലിക്കണം
വൃഷ്ടി പ്രദേശത്തുൾപ്പെടെ ശക്തമായ മഴ തുടരുന്നതിനാൽ മലമ്പുഴ, മീങ്കര ഡാമുകളുടെ ഷട്ടറുകൾ ഇന്നു തുറന്നേക്കുമെന്ന് മുന്നറിയിപ്പ്. ജലനിരപ്പ് ക്രമീകരിക്കുന്നതിനായാണ് ഷട്ടറുകൾ ഉയർത്തുന്നത്. മലമ്പുഴ ഡാമിന്റെ ഷട്ടറുകൾ ഉയർത്തുന്നതിനാൽ കൽപ്പാത്തിപ്പുഴ, ഭാരതപ്പുഴ തീരങ്ങളിൽ താമസിക്കുന്നവർക്ക് കനത്ത ജാഗ്രത നിർദ്ദേശം നല്കിയിട്ടുണ്ട്.
വർഗീയ വാദികളുടെ വോട്ട് വേണ്ടെന്ന നിലപാടാണ് എൽഡിഎഫ് സ്വീകരിച്ചത്; എംവി ഗോവിന്ദൻ
നിലമ്പൂർ ഉപതിരഞ്ഞെടുപ്പ് തോൽവി പാര്ട്ടി തലത്തിലും മുന്നണി തലത്തിലും പരിശോധിക്കുമെന്ന് സിപിഐഎം സംസ്ഥാന സെക്രട്ടറി എംവി ഗോവിന്ദന്. തിരുത്തേണ്ടവയുണ്ടെങ്കില് തിരുത്തി മുന്നോട്ട് പോവും. വര്ഗീയ തീവ്രവാദികളുടെ വോട്ട് വേണ്ടെന്ന അടിയുറച്ച രാഷ്ട്രീയ നിലപാടാണ് എല്ഡിഎഫ് ഉയര്ത്തിപ്പിടിച്ചതെന്നും എംവി ഗോവിന്ദന് ദേശാഭിമാനി പത്രത്തിൽ എഴുതിയ തന്റെ ലേഖനത്തില് പറയുന്നു
ന്യൂനമർദ്ദം ശക്തിപ്രാപിക്കുന്നു; ശക്തമായ കാറ്റിന് സാധ്യത
വടക്കു പടിഞ്ഞാറൻ ബംഗാൾ ഉൾക്കടലിനും വടക്കൻ ആന്ധ്രപ്രദേശിനും തെക്കൻ ഒഡീഷ തീരത്തിനും മുകളിലായി സ്ഥിതി ചെയ്യുന്ന ചക്രവാതച്ചുഴി ന്യൂനമർദമായി ശക്തിപ്രാപിക്കുമെന്ന് കാലാവസ്ഥാ വകുപ്പിന്റെ പ്രവചനം. അതിനാൽ ഒറ്റപ്പെട്ട അതിശക്തമായ മഴയ്ക്കും, ജൂൺ 28 വരെ ഒറ്റപ്പെട്ട ശക്തമായ മഴയ്ക്കും മണിക്കൂറിൽ 50 കിലോമീറ്റർ വരെ വേഗത്തിൽ കാറ്റിനും സാധ്യത.
ശുഭാൻഷുവിന്റെ ബഹിരാകാശ യാത്രയ്ക്കായി ഇന്ത്യ ചിലവഴിച്ചത് 548 കോടി
ആക്സിയം-4 ദൗത്യത്തിനായി ഇന്ത്യ ഏകദേശം 548 കോടി രൂപ ചെലവഴിച്ചു. ഈ പണം ശുക്ല ബഹിരാകാശത്ത് നടത്തിയ പരിശീലനം, വിക്ഷേപണ ക്രമീകരണങ്ങൾ, യാത്ര, ഗവേഷണ പ്രവർത്തനങ്ങൾ എന്നിവയ്ക്കാണ് ഉപയോഗിച്ചത്. 2027ൽ മനുഷ്യരെ ബഹിരാകാശത്തേക്ക് അയയ്ക്കാൻ പദ്ധതിയിടുന്ന ഇന്ത്യയുടെ ഗഗൻയാൻ പദ്ധതിയിലേക്കുള്ള ഒരു വലിയ ചുവടുവയ്പ്പായാണ് ഈ ദൗത്യത്തെ ഇസ്രോ നോക്കി കാണുന്നത്.
മെസ്കിക്കോയിൽ മതപരമായ ആഘോഷ പരിപാടിക്കിടെ വെടിവെപ്പ്; 12 പേർ കൊല്ലപ്പെട്ടു
മെക്സിക്കോയിൽ മതപരമായ ആഘോഷത്തിനിടെ ഉണ്ടായ വെടിവെപ്പിൽ 12 പേർക്ക് ദാരുണാന്ത്യം. മെക്സിക്കൻ സംസ്ഥാനമായ ഗ്വാനജൂവട്ടോയിലെ ഇരാപ്വാട്ടോ നഗരത്തിലാണ് വെടിവെപ്പ് ഉണ്ടായതെന്ന് റിപ്പോർട്ടുകൾ സൂചിപ്പിക്കുന്നു. ആക്രമണത്തിന് പിന്നാലെ ഇരുപത് പേരെ പരിക്കുകളോടെ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തിൽ അന്വേഷണം പുരോഗമിക്കുകയാണ്.
ആശിർനന്ദയുടെ ആത്മഹത്യ; ഇന്ന് രക്ഷിതാക്കളുടെ മൊഴിയെടുക്കും
ശ്രീകൃഷ്ണപുരത്ത് ഒൻപതാം ക്ലാസുകാരി ആശിർ നന്ദ ആത്മഹത്യ ചെയ്ത സംഭവത്തിൽ രക്ഷിതാക്കളുടെ മൊഴി ഇന്ന് പോലീസ് രേഖപ്പെടുത്തും. കുട്ടി പഠിച്ച ശ്രീകൃഷ്ണപുരം സെന്റ് ഡോമിനിക്ക് ഇംഗ്ലീഷ് സ്കൂളിനെതിരെ നാട്ടുകൽ പോലീസിൽ രക്ഷിതാക്കൾ പരാതി നൽകുകയും ചെയ്തിരുന്നു. ആത്മഹത്യയുമായി ബന്ധപ്പെട്ട് അസ്വാഭാവിക മരണത്തിന് നേരത്തെ പോലീസ് കേസെടുത്തിരുന്നു, ഇതിൽ അന്വേഷണം പുരോഗമിക്കുകയാണ്.
സംസ്ഥാനത്ത് ഇന്ന് അതിശക്തമായ മഴയ്ക്ക് സാധ്യത
സംസ്ഥാനത്ത് അതിശക്തമായ മഴയ്ക്ക് സാധ്യത. ഇന്ന് മൂന്ന് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. ഇടുക്കി, മലപ്പുറം, വയനാട് ജില്ലകളിലാണ് ഓറഞ്ച് അലർട്ട് പ്രഖ്യാപിച്ചത്. എട്ട് ജില്ലകളിൽ യെല്ലോ അലർട്ടും പ്രഖ്യാപിച്ചിട്ടുണ്ട്. പത്തനംതിട്ട, കോട്ടയം, എറണാകുളം, തൃശൂർ, പാലക്കാട്, കോഴിക്കോട്, കണ്ണൂർ, കാസർഗോഡ് എന്നീ ജില്ലകളിലാണ് യെല്ലോ അലർട്ട് പ്രഖ്യാപിച്ചിരിക്കുന്നത്
READ MORE
Click it and Unblock the Notifications
Sign in with Google