'കോട്ടയത്തല്ല, ആലപ്പുഴയിലെ ഈ ഗ്രാമത്തിലാണ് മമ്മൂട്ടി പിറന്നത്': മമ്മൂക്ക പാഠപുസ്തകമെന്നും എഎം ആരിഫ് എംപി

ആലപ്പുഴ: മമ്മൂട്ടിയുമായി വർഷങ്ങളായി തുടരുന്ന ആത്മബന്ധത്തിന്റേയും ആലപ്പുഴയിലെ ചന്തിരൂർ എന്ന ഗ്രാമവുമായി അദ്ദേഹത്തിനുള്ള ബന്ധത്തെക്കുറിച്ചും തുറന്നെഴുതി എഎം ആരിഫ് എംപി. ചന്തിരൂർ ഉൾക്കൊള്ളുന്ന അരൂർ മണ്ഡലത്തിൽ മൂന്നുതവണ എംഎൽഎ ആയി പ്രവർത്തിക്കുവാൻ കഴിഞ്ഞപ്പോൾ അദ്ദേഹം നൽകിയിട്ടുള്ള പിന്തുണ ഒരിക്കലും മറക്കുവാൻ ആവില്ലെന്നും വ്യക്തമാക്കുന്ന എംപി , 'ഇനിയും സിനിമാ ലോകത്തേക്ക് കടന്നുവരുന്ന പുതിയ തലമുറയ്ക്ക് പഠിക്കുവാനുള്ള പാഠപുസ്തകമാണ് മമ്മൂക്ക' -എന്നും അഭിപ്രായപ്പെടുന്നു. എംപിയുടെ കുറിപ്പിന്റെ പൂർണ്ണ രൂപം ഇങ്ങനെ..

ചന്തിരൂരിൽ പൂജനീയ കരുണാകര ഗുരുവിൻ്റെ ശാന്തിഗിരി ആശ്രമത്തിൽ സ്ഥാപിക്കാൻ പോകുന്ന ജന്മഗൃഹ സമുച്ചയത്തിന്റെ ശിലാസ്ഥാപനം നിർവഹിക്കുന്നതിനായാണ്‌ മലയാളത്തിന്റെ മഹാ അത്ഭുതം, ഇന്ത്യൻ സിനിമയുടെ അത്ഭുത പ്രതിഭാസം, നമ്മുടെയെല്ലാം പ്രിയപ്പെട്ട മമ്മൂക്ക അദ്ദേഹത്തിൻ്റെ ജന്മനാടായ ചന്തിരൂരിൽ എത്തിച്ചേർന്നത്. ചന്തിരൂർ അദ്ദേഹത്തിൻ്റെ മാതൃ നാടാണ്. അവിടെയാണ് അദ്ദേഹം ജനിച്ചു വീണത്.

ആ ചന്തിരൂർ ഉൾക്കൊള്ളുന്ന അരൂർ മണ്ഡലത്തിൽ മൂന്നുതവണ എംഎൽഎ ആയി പ്രവർത്തിക്കുവാൻ കഴിഞ്ഞപ്പോൾ അദ്ദേഹം നൽകിയിട്ടുള്ള പിന്തുണ ഒരിക്കലും മറക്കുവാൻ ആവില്ല. എൻ്റെ 2007ലെ സ്മാർട്ട് ക്ലാസ് റൂം പദ്ധതി, 2010 ൽ സൗജന്യ എംബിബിഎസ് എൻജിനീയറിങ് എൻട്രൻസ് കോച്ചിംഗ് പദ്ധതി, 2015ൽ അരൂക്കുറ്റിയിൽ സംഘടിപ്പിച്ച അരൂർ അഗ്രി ഫെസ്റ്റ്, ചന്തിരൂർ സ്കൂളിൻ്റെ നൂറാം വാർഷിക ആഘോഷം, എന്നിങ്ങനെ എല്ലാ പരിപാടികളിലും മമ്മൂക്കയുടെ സാന്നിധ്യം അരൂർ മണ്ഡലത്തിൽ ഉണ്ടായിരുന്നു.

ഒരുപക്ഷേ ചലച്ചിത്ര താരങ്ങൾ ആയിട്ടുള്ള മലയാള സിനിമയിലെ എല്ലാവരെയും അരൂരിലെ ജനങ്ങൾക്ക്‌ പരിചയപ്പെടുത്തി കൊടുക്കുവാൻ ആ പതിമൂന്നര വർഷത്തിലെ എംഎൽഎ ആയിരുന്ന കാലയളവിൽ എനിക്ക് കഴിഞ്ഞു. 2019ൽ പാർലമെൻറ് മണ്ഡലത്തിലേക്ക് മത്സരിക്കുന്നതിന് തൊട്ടുമുമ്പ്‌ മാതൃഭൂമി, ദേശാഭിമാനി, മലയാള മനോരമ, കലാകൗമുദി തുടങ്ങി വിവിധ പ്രസിദ്ധീകരണങ്ങളിൽ ഞാൻ എഴുതിയ ലേഖനങ്ങൾ സമാഹരിച്ച്, നിയമസഭയിൽ പതിമൂന്നര വർഷക്കാലം നടത്തിയ പ്രസംഗങ്ങളിൽ ഏതാനും ചില പ്രസംഗങ്ങൾ കൂടി ചേർത്ത് മാതൃഭൂമി ബുക്സ് പ്രസിദ്ധീകരിച്ച "എൻ്റെ നിയമസഭാ പ്രസംഗങ്ങളും മാധ്യമ ഇടപെടലുകളും"എന്ന പുസ്തകത്തിന് അവതാരിക എഴുതി തന്നതും മമ്മൂക്കയായിരുന്നു.

ആ പുസ്തകത്തിൻ്റെ പ്രകാശനം എറണാകുളത്തുള്ള അദ്ദേഹത്തിന്റെ വീട്ടിൽ വച്ച് അദ്ദേഹത്തിൻ്റെ തന്നെ അധ്യാപകനായ മലയാള സാഹിത്യ ലോകത്തെ ഏറ്റവും ശ്രദ്ധേയനായ സാനു മാഷിന് നൽകിക്കൊണ്ടാണ്‌ നിർവഹിച്ചത്. എൻറെ ജീവിതത്തിലെ ഒരിക്കലും മറക്കുവാൻ കഴിയാത്ത വലിയ പിന്തുണ രാഷ്ട്രീയത്തിനതീതമായി ഒട്ടേറെ പ്രമുഖ വ്യക്തികൾ നൽകിയിട്ടുണ്ട്. അതിൽ ഒരിക്കലും മറക്കുവാൻ കഴിയാത്തതാണ്‌ മലയാളികളുടെ ഹൃദയം കവർന്ന മമ്മൂക്കയുടെ സഹായം. അദ്ദേഹത്തോടുള്ള കടപ്പാടും സ്നേഹവും ഇവിടെ പങ്കുവെക്കുകയാണ്.

'ഇനിയും സിനിമാ ലോകത്തേക്ക് കടന്നുവരുന്ന പുതിയ തലമുറയ്ക്ക് പഠിക്കുവാനുള്ള പാഠപുസ്തകമാണ് മമ്മൂക്ക' എന്ന് ചന്തിരൂരിലെ ശാന്തിഗിരി ആശ്രമത്തിൽ ചേർന്ന സമ്മേളനത്തിൽ വച്ച് ഞാൻ പറഞ്ഞു. അതുപോലെതന്നെ ശാന്തിഗിരി ആശ്രമത്തിൽ മമ്മൂക്ക നടത്തിയ പ്രസംഗം വളരെ വളരെ ശ്രദ്ധേയമായ ഒരു പ്രസംഗമായിരുന്നു.

ശാന്തിഗിരി ആശ്രമം ഓർഗനൈസേഷൻ സെക്രട്ടറി സ്വാമി ഗുരുരത്ന ജ്ഞാന തപസ്വിയും മമ്മൂക്കയും തമ്മിലുള്ള ഒരു ഹൃദയബന്ധമാണ് ശാന്തിഗിരി ആശ്രമത്തിലേക്ക് മമ്മൂക്ക വരാൻ ഇട വന്നത്. സ്വാമി ഗുരുരത്ന ജ്ഞാന തപസ്വി ടിവിയിലും സോഷ്യൽ മീഡിയയിലും നടത്തുന്ന പ്രഭാഷണങ്ങൾ എല്ലാം അങ്ങേയറ്റം മനുഷ്യമനസ്സുകളെ തൊട്ടുണർത്തുന്ന, അനേകം ചിന്തകൾ വാരി വിതറുന്ന പ്രഭാഷണങ്ങളാണ്. അദ്ദേഹവും മമ്മൂക്കയും ഒക്കെ പങ്കെടുത്ത പ്രൗഢഗംഭീരമായ ആ ചടങ്ങിന്റെ ഭാഗമാകാൻ കഴിഞ്ഞത്‌ മറക്കാനാകാത്ത ഒരു അനുഭവമാണ്

English summary

'Mammootty was born not in Kottayam: AM Ariff MP also says Mammookka is a textbook