മുനമ്പം ഹാർബർ വികസനം അനന്തമായി നീളുന്നു; 700ലധികം ബോട്ടുകൾ, എന്നിട്ടും അടിസ്ഥാന സൗകര്യങ്ങളില്ല
കൊച്ചി: ജില്ലയുടെ പതിറ്റാണ്ടുകളായുള്ള ആവശ്യങ്ങളിലൊന്നായ മുനമ്പം ഹാർബർ വികസനം വീണ്ടും കടലാസിലൊതുങ്ങുന്നുവെന്ന ആശങ്ക ശക്തമാകുന്നു. മത്സ്യബന്ധന മേഖലയുടെയും തീരദേശ ടൂറിസത്തിന്റെയും പ്രധാന കേന്ദ്രമായ മുനമ്പം ഹാർബറിന് ആധുനിക സൗകര്യങ്ങൾ ഒരുക്കുമെന്ന് പലതവണ പ്രഖ്യാപിച്ചെങ്കിലും, പദ്ധതികൾ യാഥാർഥ്യമായിട്ടില്ലെന്ന വിമർശനമാണ് ഉയരുന്നത്.
ഏകദേശം 700-ലധികം മത്സ്യബന്ധന ബോട്ടുകൾ ആശ്രയിക്കുന്ന ഹാർബറിലാണ് ഇന്നും അടിസ്ഥാന സൗകര്യങ്ങളുടെ കുറവ് രൂക്ഷമായി തുടരുന്നത്. പുതിയ ലേല ഹാളുകൾ, നവീകരിച്ച വാർഫ്, മെച്ചപ്പെട്ട ഡോക്കിംഗ് സൗകര്യങ്ങൾ, പാർക്കിംഗ് സംവിധാനങ്ങൾ എന്നിവ ആവശ്യപ്പെട്ട് മത്സ്യത്തൊഴിലാളികൾ നിരന്തരം ആവശ്യങ്ങൾ ഉന്നയിച്ചിട്ടും കാര്യമായ നടപടികളില്ലെന്നാണ് ആക്ഷേപം.
ഹാർബറിലെ സുരക്ഷാ സംവിധാനങ്ങളും ഏറെ പിന്നിലാണ്. വർഷങ്ങൾക്കുമുമ്പ് സിസിടിവി ക്യാമറകൾ സ്ഥാപിക്കാനുള്ള പദ്ധതി മുന്നോട്ടുവച്ചിരുന്നെങ്കിലും അത് ഇന്നും നടപ്പിലായിട്ടില്ല. ഹാർബറിലേക്ക് ആരും എളുപ്പത്തിൽ പ്രവേശിക്കാനാകുന്ന സാഹചര്യമാണുള്ളതെന്നും, സുരക്ഷാ വീഴ്ചകൾ വലിയ ആശങ്കയാണെന്നും മത്സ്യത്തൊഴിലാളികൾ നേരത്തെ തന്നെ മുന്നറിയിപ്പ് നൽകിയിരുന്നു.
അതേസമയം, മുനമ്പം മേഖലയെ കേന്ദ്രീകരിച്ച് വിവിധ വികസന വാഗ്ദാനങ്ങൾ അടുത്തകാലത്തും ഉയർന്നിരുന്നു. വൈപ്പിൻ ബീച്ച് കോറിഡോർ പദ്ധതിയുടെ ഭാഗമായി മുനമ്പം ഉൾപ്പെടെയുള്ള തീരദേശ മേഖലകളിൽ ടൂറിസം വികസനം പ്രഖ്യാപിച്ചെങ്കിലും, പല പദ്ധതികളും ഇപ്പോഴും പ്രാരംഭ ഘട്ടത്തിൽ തന്നെയാണെന്ന് റിപ്പോർട്ടുകൾ സൂചിപ്പിക്കുന്നു. നടപ്പാക്കൽ വൈകുന്നത് പ്രദേശവാസികളിൽ നിരാശ വർധിപ്പിക്കുകയാണ്.
മറ്റൊരു വലിയ വെല്ലുവിളിയാണ് തീരശോഷണം. പഠനങ്ങൾ പ്രകാരം എറണാകുളം തീരത്ത് ഏറ്റവും കൂടുതൽ കടലാക്രമണം നേരിടുന്ന പ്രദേശങ്ങളിൽ ഒന്നാണ് മുനമ്പം. ഹാർബർ വികസനവും തീരസംരക്ഷണവും ഒരുമിച്ച് മുന്നോട്ടുകൊണ്ടുപോകാത്ത പക്ഷം ഭാവിയിൽ സ്ഥിതി കൂടുതൽ ഗുരുതരമാകുമെന്ന ആശങ്ക വിദഗ്ധർ പങ്കുവയ്ക്കുന്നു.
നിലവിൽ ഇവിടെ മൂന്ന് ലേലപ്പുരകൾ മാത്രമാണ് ഉള്ളത്. ഇവിടെ മത്സ്യബന്ധനം കഴിഞ്ഞെത്തുന്ന ബോട്ടുകൾക്ക് മണിക്കൂറുകളോളം കാത്തുകിടക്കേണ്ട അവസ്ഥയാണ് ഉള്ളത്. മത്സ്യത്തിന്റെ വരവിനനുസരിച്ചുള്ള ലേലപ്പുരയുടെ കുറവും ഹാർബറിലെത്തുന്ന വാഹനങ്ങളുടെ പാർക്കിങിനുള്ള അസൗകര്യവും വെല്ലുവിളിയാവുന്നുണ്ട്.
42,546 ടണ്ണോളം മത്സ്യോത്പന്നങ്ങൾ വാർഷികമായി എത്തുന്ന പ്രധാനപ്പെട്ട ഹാർബറായ മുനമ്പത്തിന് കൈകാര്യത്തിലും നടപടികളിലും കാലത്തിന് അനുസരിച്ചുള്ള മാനദണ്ഡങ്ങൾ പാലിക്കാൻ പര്യാപ്തതയില്ലെന്ന് തിരിച്ചറിഞ്ഞ് അടുത്തിടെ 200 കോടിയുടെ പദ്ധതിക്ക് രൂപം നൽകിയിരുന്നു. എന്നാൽ അതൊന്നും പ്രവർത്തികമായില്ല. ഇതോടെയാണ് പുതിയ സർക്കാർ അധികാരമേറ്റെടുത്തതിന് പിന്നാലെ വീണ്ടും തൊഴിലാളികൾ പ്രതിഷേധവുമായി രംഗത്ത് വരുന്നത്.
ഇതിനിടെ, മുനമ്പം മേഖല ഭൂമി തർക്കങ്ങളും രാഷ്ട്രീയ വിവാദങ്ങളും കാരണം നിരന്തരം വാർത്തകളിൽ നിറയുന്നുണ്ട്. ഇതും അടിസ്ഥാന വികസന പദ്ധതികൾക്ക് തിരിച്ചടിയായെന്ന വിമർശനമുണ്ട്. വാഗ്ദാനങ്ങൾക്കപ്പുറം യഥാർത്ഥ വികസനം എപ്പോൾ ഉണ്ടാകുമെന്ന ചോദ്യമാണ് ഇപ്പോൾ മത്സ്യത്തൊഴിലാളികളും പ്രദേശവാസികളും ഉയർത്തുന്നത്. പദ്ധതികൾ പ്രഖ്യാപിക്കപ്പെടുന്നു, പക്ഷേ നടപ്പാകുന്നില്ല എന്ന പരാതിയാണ് വീണ്ടും ശക്തമാകുന്നത്.
Click it and Unblock the Notifications
Sign in with Google