ജയം ഉറപ്പിച്ചോ യുഡിഎഫ്? മന്ത്രിമാരുടെ പേഴ്സണല് സ്റ്റാഫിനെ തീരുമാനിക്കാൻ വരട്ടെ, നീക്കവുമായി ലീഗ്
മലപ്പുറം: നിയമസഭാ തിരഞ്ഞെടുപ്പ് ഫലം പുറത്തുവരാൻ ദിവസങ്ങൾ മാത്രം ശേഷിക്കെ മന്ത്രിമാരുടെ പേഴ്സണൽ സ്റ്റാഫിനെ തീരുമാനിക്കുന്നതിൽ ഉൾപ്പെടെ തിരക്കിട്ട മാർഗ നിർദ്ദേശങ്ങളുമായി മുസ്ലീം ലീഗ് രംഗത്ത്. പിണറായി വിജയന്റെ നേതൃത്വത്തിലുള്ള എൽഡിഎഫ് സർക്കാരിനെ താഴെയിറക്കി ഇത്തവണ അധികാരം പിടിച്ചെടുക്കുമെന്ന യുഡിഎഫ് അവകാശവാദം ഊട്ടിയുറപ്പിക്കുന്നതാണ് മുസ്ലീം ലീഗിന്റെ ഇപ്പോഴത്തെ നീക്കം.
മന്ത്രിമാര് ഏകപക്ഷീയമായി സ്റ്റാഫിനെ തീരുമാനിക്കരുതെന്നും മണ്ഡലം കമ്മിറ്റികളുടെയും പോഷക സംഘടനകളുടേയും അഭിപ്രായം തേടണമെന്നും മുസ്ലീം ലീഗ് നിർദ്ദേശിച്ചു. മന്ത്രിമാർ ഉപജാപക സംഘങ്ങളുടെ പിടിയിലാകാതെ ജാഗ്രത പാലിക്കണമെന്നും സംസ്ഥാന കമ്മിറ്റിയില് നിര്ദ്ദേശം നല്കുകയും ചെയ്തിട്ടുണ്ട്. ജയിച്ചാൽ പത്ത് വർഷത്തിന് ശേഷമാണ് ലീഗ് അടങ്ങുന്ന യുഡിഎഫ് അധികാരത്തിലേക്ക് എത്തുന്നത് എന്ന പ്രത്യേകത കൂടിയുണ്ട്.
സംസ്ഥാന കമ്മിറ്റി യോഗത്തിലും, മലപ്പുറം ജില്ലാകമ്മിറ്റി യോഗത്തിലും പ്രധാനപ്പെട്ട നേതാക്കള് ഈ നിർദ്ദേശം മുന്നോട്ട് വച്ചിരുന്നു. യുഡിഎഫിനെ അധികാരത്തിലെത്തിക്കുന്നതില് പോഷക സംഘടനകള്ക്കും അടിത്തട്ടില് പ്രവര്ത്തിക്കുന്നവര്ക്കും വലിയ പങ്കുണ്ടെന്നാണ് ലീഗ് പറഞ്ഞു വയ്ക്കുന്നത്. മെയ് നാലിന് ജയം ഉറപ്പാണെന്ന സൂചനയാണ് ഇതിലൂടെ ലീഗ് രാഷ്ട്രീയ എതിരാളികൾക്ക് മുൻപിൽ വയ്ക്കുന്നതും.
അതേസമയം, നേരത്തെ തിരഞ്ഞെടുപ്പിന് മുൻപ് തന്നെ യുഡിഎഫ് സർക്കാർ അധികാരത്തിൽ വന്നാൽ ഉപമുഖ്യമന്ത്രി സ്ഥാനം വേണമെന്ന ഇന്ത്യൻ യൂണിയൻ മുസ്ലിം ലീഗിന്റെ ആവശ്യം പ്രധാന ചർച്ചാ വിഷയമായി മാറിയിരുന്നു. ഇത് മുന്നണിയിലെ സംവാദങ്ങളെ മാറ്റിയെഴുതുകയും എതിരാളികൾക്ക് പുതിയ വിമർശനങ്ങൾ ഉന്നയിക്കാൻ അവസരം നൽകുകയും ചെയ്തിരുന്നു.
യുഡിഎഫ് അധികാരത്തിൽ തിരിച്ചെത്തിയാൽ ഉപമുഖ്യമന്ത്രി പദവിക്ക് തങ്ങൾക്ക് അർഹതയുണ്ടെന്ന് മുതിർന്ന മുസ്ലിം ലീഗ് നേതാക്കൾ വാദിക്കുന്നത്. കോൺഗ്രസുമായുള്ള തങ്ങളുടെ ദീർഘകാല പങ്കാളിത്തവും മലപ്പുറം ഉൾപ്പെടെ വടക്കൻ കേരളത്തിലെ മണ്ഡലങ്ങളിലുള്ള ശക്തമായ സ്വാധീനവുമാണ് ഈ അവകാശവാദത്തിന് പിന്നിൽ.
മുൻ എംഎൽഎ കെഎൻഎ ഖാദർ പരസ്യമായി ആവശ്യപ്പെട്ടത്, യുഡിഎഫ് ഈ ആവശ്യം കൂടുതൽ ചർച്ചകളില്ലാതെ ലീഗിന് അനുവദിക്കണം എന്നാണ്. സംസ്ഥാനത്തുടനീളമുള്ള മിക്ക നിയമസഭാ തിരഞ്ഞെടുപ്പുകളിലും നിർണായക ന്യൂനപക്ഷ വോട്ടുകളും ഇരട്ട അക്ക സീറ്റുകളും നേടുന്ന ഒരു പാർട്ടിയെ സംബന്ധിച്ചിടത്തോളം ഈ ആവശ്യം സ്വാഭാവികമാണെന്നും അദ്ദേഹം അഭിപ്രായപ്പെട്ടു.
എന്നാൽ, ഈ വിഷയത്തിലെ ചർച്ചകൾ നിയന്ത്രിക്കാൻ പാർട്ടി ഉന്നത നേതൃത്വം അതിവേഗം രംഗത്തുവന്നിരുന്നു. പികെ കുഞ്ഞാലിക്കുട്ടി, പാണക്കാട് മുനവ്വറലി ശിഹാബ് തങ്ങൾ തുടങ്ങിയ നേതാക്കൾ ലീഗിന് അർഹമായ അംഗീകാരം ലഭിക്കണമെന്ന് ഊന്നിപ്പറഞ്ഞുവെങ്കിലും, നിലവിൽ ഉപമുഖ്യമന്ത്രി സ്ഥാനം ഔദ്യോഗികമായി ആവശ്യപ്പെടില്ലെന്ന് വ്യക്തമാക്കി.
തിരഞ്ഞെടുപ്പ് ഫലത്തിന് മുൻപ് ഉന്നത പദവികൾക്കായി പരസ്യമായ വിലപേശൽ യുഡിഎഫിന്റെ വിജയത്തിന് കളങ്കം ഏൽപ്പിക്കുമെന്നാണ് ലീഗ് നേതൃത്വം ചൂണ്ടിക്കാട്ടുന്നത്. ഇത് ഭരണപരമായ വിഷയങ്ങളിൽ നിന്ന് ശ്രദ്ധ മാറ്റുകയും, തൊഴിൽ, വിലക്കയറ്റം, ക്ഷേമം, പ്രാദേശിക വികസനം തുടങ്ങിയ വിഷയങ്ങളിൽ ശ്രദ്ധിക്കാതെ അധികാര പങ്കാളിത്തത്തിന് വേണ്ടി മാത്രം പ്രവർത്തിക്കുന്ന മുന്നണിയായി യുഡിഎഫിനെ ചിത്രീകരിക്കാൻ സഹായിക്കുകയും ചെയ്യുമെന്നാണ് ഉയരുന്ന വിമർശനം.
Click it and Unblock the Notifications
Sign in with Google