ഇനി പ്രിന്റഡ് ലൈസൻസും ആർസിയും വേണ്ട; ഗതാഗത വകുപ്പിന്റെ നിർണായക നീക്കം, പകരം ഇങ്ങനെ ചെയ്യാം

Updated: Tuesday, October 1, 2024, 12:03 [IST]

തിരുവനന്തപുരം: കേരളത്തിൽ പ്രിന്റ് ചെയ്‌ത ലൈസൻസ് ഇനി വേണ്ടെന്ന തീരുമാനവുമായി ഗതാഗത വകുപ്പ്. പ്രിന്റഡ് ലൈസൻസ്, ആർസി എന്നിവയുടെ അച്ചടി പൂർണമായും നിർത്താനാണ് തത്വത്തിൽ തീരുമാനമായിരിക്കുന്നത്. ലൈസൻസിന്റെ പ്രിന്റിങ് നിർത്തി പൂർണമായും ഡിജിറ്റലിലേക്ക് മാറുന്ന രാജ്യത്തെ നാലാമത്തെ മാത്രം സംസ്ഥാനമാവും ഇതോടെ കേരളം. കാലാനുസൃതമായി വരുത്തേണ്ട പരിഷ്‌കാരങ്ങളുടെ ഭാഗമാണ് പുതിയ തീരുമാനം.

നേരത്തെ തന്നെ ഇതുമായി ബന്ധപ്പെട്ട ചർച്ചകൾ ഉയർന്നുവന്നിരുന്നു. സാങ്കേതിക വിദ്യയുടെ ആധുനിക കാലത്ത് ഇനിയും പ്രിന്റഡ് ലൈസൻസുകളുടെയും ആർസി ബുക്കുകളുടെയും ആവശ്യമില്ലെന്നാണ് പൊതുവെ ഉയരുന്ന അഭിപ്രായം. മാത്രമല്ല ഇപ്പോൾ തന്നെ ഡിജിറ്റൽ രേഖകൾ സ്വീകരിക്കപ്പെടുന്നുമുണ്ട്, ഈ സാഹചര്യത്തിലാണ് ഗതാഗത വകുപ്പിന്റെ നിർണായക നീക്കം.

ആദ്യഘട്ടമായി ലൈസൻസിന്റെ പ്രിന്റിംഗ് നിർത്താനാണ് തീരുമാനമെന്ന് ഗതാഗത കമ്മീഷണർ അറിയിച്ചു. തുടർന്ന് രണ്ടാംഘട്ടമായി ആർസി ബുക്കുകളുടെ പ്രിന്റിങും കൂടി നിർത്താനാണ് ആലോചന. ഇനി ആധാർ കാർഡ് ഉപയോഗിക്കുന്നത് പോലെ രേഖകൾ ഡൗൺലോഡ് ചെയ്തെടുക്കാം, ഡിജിലോക്കറിൽ സൂക്ഷിക്കുന്ന രേഖകൾ പരിശോധനാ സമയത്ത് ഹാജരാക്കിയാലും മതി.

പുതിയ സംവിധാനത്തിന് ഒട്ടേറെ ഗുണങ്ങളാണ് ഉണ്ടാവുക. നേരത്തെ ഡ്രൈവിംഗ് ടെസ്‌റ്റ് പാസാകുന്ന ഒരാൾ ലൈസൻസ് കൈയിൽ കിട്ടാൻ ദിവസങ്ങളോളം കാത്തിരിക്കേണ്ട സാഹചര്യമായിരുന്നു. എന്നാൽ ഇനി ടെസ്‌റ്റ് പാസാകുന്ന ദിവസം തന്നെ ലൈസൻസ് പ്രിന്റ് എടുത്ത് ഉപയോഗിക്കാനുള്ള അവസരമാണ് സാധാരണക്കാർ ലഭിക്കുക.

കൂടാതെ ഇനി ഒറിജിനൽ രേഖ എന്ന സംവിധാനം തന്നെ ഇല്ലാതാവും. ഡിജി ലോക്കറിൽ സൂക്ഷിക്കുന്ന രേഖകളുടെ ആധികാരിത ഉദ്യോഗസ്ഥർക്ക് കേവലം ക്യൂആർ കോഡ് സ്‌കാൻ ചെയ്‌ത്‌ മനസിലാക്കാൻ കഴിയും എന്നതാണ് മറ്റൊരു പ്രത്യേകത. പുതിയ സാഹചര്യത്തിൽ നിങ്ങൾക്ക് കൈവശം ഫോൺ മാത്രം ഉണ്ടായാൽ മതി വാഹന രേഖകൾ എല്ലാം അതിൽ ലഭ്യമാവും എന്നതാണ് ശ്രദ്ധേയമായ നേട്ടം.

ഡിജി ലോക്കർ എങ്ങനെ ഉപയോഗിക്കാം?

നമ്മുടെ നിത്യജീവിതത്തിൽ ഉപയോഗിക്കുന്നവ ഉൾപ്പെടെ സുപ്രധാന രേഖകൾ ശേഖരിച്ചു വയ്ക്കാനും വേണ്ടപ്പോൾ ആക്‌സസ് ചെയ്യാനും അനുവദിക്കുന്ന സംവിധാനമാണ് ഡിജി ലോക്കർ. ഇത് നിങ്ങളുടെ വിരൽത്തുമ്പിൽ എല്ലാ രേഖകളെയും എത്തിക്കുന്നു എന്ന് വേണമെങ്കിൽ പറയാം. വിവിധ രേഖകളുടെ നമ്പറുകൾ നൽകിയാൽ അവയുടെ ഡിജിറ്റൽ പകർപ്പുകൾ ഈ ആപ്പിലെത്തും, ആവശ്യം ഉള്ളപ്പോൾ ഉപയോഗിക്കാം.

ആധാർ നമ്പർ, മൊബൈൽ നമ്പർ എന്നിവ ഉപയോഗിച്ച് ഡിജി ലോക്കർ നിങ്ങൾക്ക് ആക്‌സസ് ചെയ്യാവുന്നതാണ്. പിന്നീട് എപ്പോഴും ആവശ്യമുള്ളപ്പോൾ നിങ്ങൾക്ക് ഇതിൽ നിന്നും ബന്ധപ്പെട്ട രേഖകൾ എടുക്കാൻ കഴിയും, ഇതിന് പുറമേ മറ്റ് രേഖകൾ പകർപ്പായി ഇതിൽ സൂക്ഷിക്കാനുള്ള സൗകര്യവും ഒരുക്കിയിട്ടുണ്ട്.