ഓണം ബംപർ നറുക്കെടുപ്പ് നാളെയില്ല: അവസാന നിമിഷം മാറ്റിവെച്ചു: കാരണം ഇത്, പുതിയ തിയതി അറിയാം

25 കോടി രൂപയുടെ ഒന്നാം സമ്മാനം നല്‍കുന്ന തിരുവോണം ബംപർ നറുക്കെടുപ്പ് മാറ്റിവെച്ചു. നാളെ ഉച്ചയ്ക്ക് രണ്ട് മണിക്ക് ശേഷം ലോട്ടറി വകുപ്പ് ആസ്ഥാനായ തിരുവനന്തപുരത്ത് നടത്താനിരുന്ന ബംപർ നറുക്കെടുപ്പാണ് അവസാന മണിക്കൂറില്‍ മാറ്റിവെച്ചിരിക്കുന്നത്. ഇത് സംബന്ധിച്ച അറിപ്പ് സംസ്ഥാന ലോട്ടറി വകുപ്പ് ഔദ്യോഗികമായി പുറത്തിറക്കി.

അടുത്ത മാസം നാലാണ് പുതിയ നറുക്കെടുപ്പ് തിയതി. ജി എസ് ടി മാറ്റവും മഴയും ടിക്കറ്റ് വിൽപനയെ ബാധിച്ചെന്ന് ഏജന്റുമാർ അറിയിച്ചിരുന്നു. ഏജന്റുമാരുടെ അഭ്യർത്ഥന മാനിച്ചാണ് നറുക്കെടുപ്പ് നീട്ടിയതിയെന്നാണ് സംസ്ഥാന ലോട്ടറി വകുപ്പ് അറിയിക്കുന്നത്. ജി എസ് ടി കൂട്ടേണ്ടതില്ലെന്ന് തീരുമാനിച്ചിരുന്നെങ്കിലും പുതിയ നികുതി ഘടന സംബന്ധിച്ച ആശയം നിലനിന്നിരുന്നു. ഇതോടൊപ്പം തന്നെ സംസ്ഥാനത്തിന്റെ വിവിധ ഇടങ്ങളിലുണ്ടായ കനത്ത മഴയും ടിക്കറ്റ് വില്‍പ്പനയെ ബാധിക്കുകയായിരുന്നു.

അച്ചടിച്ച 75 ലക്ഷം ടിക്കറ്റുകളും ഏജന്‍സികള്‍ക്ക് വിറ്റുകഴിഞ്ഞുവെന്ന് ഭാഗ്യക്കുറി വകുപ്പ് അറിയിച്ചിരുന്നു. എന്നാല്‍ ഏജന്‍സികളിലേക്ക് അവസാനമായി എത്തിയ ടിക്കറ്റുകളില്‍ വലിയൊരു വിഭാഗം ഇപ്പോഴും വില്‍ക്കാതെ കിടക്കുന്നുണ്ട്. ഇത് വിറ്റുതീരാന്‍ സമയം അനുവദിക്കണമെന്ന് ഏജന്‍സികള്‍ നേരത്തെ തന്നെ സർക്കാറിനോട് ആവശ്യപ്പെട്ടിരുന്നു. ആ ആവശ്യം പരിഗണിച്ചുകൊണ്ടാണ് നറുക്കെടുപ്പ് നാലാം തിയതിയിലേക്ക് മാറ്റിയിരിക്കുന്നത്.

500 രൂപ വില വരുന്ന ടിക്കറ്റിലൂടെ ആകെ 125.54 കോടി രൂപയാണ് സമ്മാനമായി നല്‍കുന്നത്. ഒന്നാം സമ്മാനത്തിന് അര്‍ഹമായ ടിക്കറ്റ് വില്‍ക്കുന്ന ഏജന്റിന് കമ്മീഷനായി 2.5 കോടി രൂപ നല്‍കുന്നത് കൂടെ പരിഗണിക്കുമ്പോള്‍ 22 പേരാണ് ഓണം ബംപറിലൂടെ കോടീശ്വരന്‍മാരാകുക. ഇത്തവണയും പാലക്കാട് ജില്ലയിലാണ് ഏറ്റഴും കൂടുതല്‍ ടിക്കറ്റ് വിറ്റിരിക്കുന്നത്. 1407100 ടിക്കറ്റുകളാണ് പാലക്കാട് ജില്ലയില്‍ മാത്രം വിറ്റിരിക്കുന്നത്. തൃശൂരില്‍ 9,37,400 ടിക്കറ്റുകളും തിരുവനന്തപുരത്ത് 8,75,900 ടിക്കറ്റുകളും വിറ്റിട്ടുണ്ട്.

തിരുവോണം ബമ്പർ ഭാഗ്യക്കുറിയുടെ ഏറ്റവും വലിയ ആകർഷണം അതിന്റെ ആകർഷകമായ സമ്മാന ഘടനയാണ്. ഒന്നാം സമ്മാനമായി 25 കോടി രൂപ ഒരു ഭാഗ്യവാന് ലഭിക്കും. ഇതിനു പുറമേ, രണ്ടാം സമ്മാനമായി 20 പേർക്ക് ഓരോരുത്തർക്കും 1 കോടി രൂപ വീതവും, മൂന്നാം സമ്മാനമായി 20 പേർക്ക് 50 ലക്ഷം രൂപ വീതവും നൽകുന്നു. നാലാം സമ്മാനമായി 10 പരമ്പരകൾക്ക് 5 ലക്ഷം രൂപ വീതവും, അഞ്ചാം സമ്മാനമായി 10 പരമ്പരകൾക്ക് 2 ലക്ഷം രൂപ വീതവുമാണ് സമ്മാനം. കൂടാതെ, 5,000 രൂപ മുതൽ 500 രൂപ വരെയുള്ള വിവിധ ചെറിയ സമ്മാനങ്ങളും ഭാഗ്യക്കുറി വാഗ്ദാനം ചെയ്യുന്നു.