സിംസാറുല്‍ ഹഖ് ഹുദവിക്ക് ഓണാശംസകള്‍ നേര്‍ന്ന് അനീസ് സലീം

കൊച്ചി: ഓണം, ക്രിസ്മസ് പോലുള്ള അന്യമതസ്ഥരുടെ ആഘോഷങ്ങളില്‍ നിന്ന് മുസ്ലിംകള്‍ വിട്ടുനില്‍ക്കണമെന്ന മതപ്രഭാഷകന്‍ സിംസാറുല്‍ ഹഖ് ഹുദവിയുടെ പ്രസംഗം വിവാദമാകുന്നു. ഒട്ടേറെ പ്രമുഖരാണ് ഇതിനെതിരെ സോഷ്യല്‍ മീഡിയയില്‍ രംഗത്തുവന്നിരിക്കുന്നത്. സിംസാറുല്‍ ഹഖ് ഹുദവിക്ക് ഓണാശംസകള്‍ നേര്‍ന്നിരിക്കുകയാണ് എഴുത്തുകാരന്‍ അനീസ് സലീം. മുസ്ലിംകള്‍ ഓണം ആഘോഷിക്കരുതെന്ന് പറഞ്ഞ വ്യക്തിക്കും ഓണാശംസകള്‍ എന്നാണ് അദ്ദേഹം ഫേസ്ബുക്കില്‍ കുറിച്ചത്.

കുട്ടിക്കാലത്തെ അയല്‍പ്പക്ക ബന്ധം സൂചിപ്പിച്ചാണ് ശിഹാബുദ്ദീന്‍ പൊയ്ത്തുംകടവ് ഫേസ്ബുക്ക് കുറിപ്പിട്ടത്. പിശാചിന് മതമില്ല. മതരാഷ്ട്രീയ വേഷങ്ങള്‍ ഉണ്ടായേക്കാം. ഏത് മതത്തിലായാലും അപരവെറുപ്പില്‍ നിന്നാണ് ഇത്തരക്കാര്‍ ആഹാരം സമ്പാദിക്കുന്നതെന്ന കൂട്ടിച്ചേര്‍ക്കലോടെയാണ് അദ്ദേഹത്തിന്റെ കുറിപ്പ് അവസാനിക്കുന്നത്.

എംജി സര്‍കാലാശാല മുന്‍ പ്രോ വൈസ് ചാന്‍സലര്‍ ഷീന ഷുക്കൂര്‍ മാവേലിക്കൊപ്പം നില്‍ക്കുന്ന ചിത്രം പങ്കുവച്ചിരിക്കുകയാണ് ഭര്‍ത്താവ് ഷുക്കൂര്‍ വക്കീല്‍. ഇത്തരത്തില്‍ പ്രസംഗിക്കുന്ന വ്യക്തിയെ പണ്ഡിതന്‍ എന്ന് പറയുന്നത് അല്‍പ്പം കടന്ന കൈയ്യല്ലേ സാറേ എന്നാണ് ഷുക്കൂര്‍ വക്കീലിന്റെ പരിഹാസം. നന്‍മകള്‍ കെടുത്താന്‍ ശ്രമിക്കുന്ന ഇത്തരക്കാര്‍ക്കെതിരെ അതിശക്തമായി നമുക്ക് മതിലുകള്‍ പണിയണമെന്നും ഇവര്‍ക്ക് പൂക്കളവും പായസവും ചേര്‍ന്ന ഒന്നാന്തരം ഓണം മുബാറക് എന്നും ഷുക്കൂര്‍ വക്കീല്‍ കുറിക്കുന്നു.

അതേസമയം, വിദ്യാര്‍ഥികളുടെ ചോദ്യത്തിന് സിംസാറുല്‍ ഹഖ് ഹുദവി വര്‍ഷങ്ങള്‍ക്ക് മുമ്പ് നല്‍കിയ മറുപടി ഇപ്പോള്‍ വിവാദമാക്കുന്നതില്‍ ദുരൂഹതയുണ്ട് എന്ന് ചൂണ്ടിക്കാട്ടി സിംസാറുല്‍ ഹഖ് ഹുദവി മീഡിയ വിങിന്റെ പേരില്‍ ഒരു കുറിപ്പ് സോഷ്യല്‍ മീഡിയയില്‍ മറുപടിയായി പ്രത്യക്ഷപ്പെട്ടിട്ടുണ്ട്. പൊതുവേദിയിലെ പൊതു ചോദ്യമായിരുന്നില്ലെന്നും ഇസ്ലാമിക നിലപാടുമായി ബന്ധപ്പെട്ട ചോദ്യങ്ങള്‍ക്കുള്ള മറുപടിയായിരുന്നുവെന്നും അവര്‍ വിശദീകിരക്കുന്നു.

English summary

Onam Celebration; Main Stream Writer against Simsarul Haq Hudavi's Speech