'പ്രധാനമന്ത്രി മോദിയുടേത് അതിരുകവിഞ്ഞ മോഹം', കേരളം പിടിക്കുമെന്നതിന് പിണറായിയുടെ ചുട്ട മറുപടി
തിരുവനന്തപുരം: കേരളത്തിലും ബിജെപി അധികാരം പിടിക്കുമെന്ന പ്രധാനമന്ത്രി നരേന്ദ്ര മോദിയുടെ വാക്കുകളോട് പ്രതികരിച്ച് മുഖ്യമന്ത്രി പിണറായി വിജയന്. കേരളത്തില് സര്ക്കാരുണ്ടാക്കാം എന്നത് മോദിയുടെ അതിരുകവിഞ്ഞ മോഹമാണെന്ന് പിണറായി വിജയന് തുറന്നടിച്ചു. മന്ത്രി മുഹമ്മദ് റിയാസും മോദിക്ക് മറുപടിയുമായി രംഗത്ത് വന്നിട്ടുണ്ട്. പ്രധാനമന്ത്രി പറഞ്ഞത് സംഭവിക്കണമെങ്കില് മതനിരപേക്ഷ കേരളം മരിക്കണം എന്ന് മുഹമ്മദ് റിയാസ് ഫേസ്ബുക്കില് കുറിച്ചു.
മുഖ്യമന്ത്രിയുടെ വാക്കുകൾ: 'കേരളത്തിലും ബിജെപി സര്ക്കാരുണ്ടാക്കുമെന്ന പ്രധാനമന്ത്രി നരേന്ദ്ര മോഡിയുടെ പ്രസ്താവന അതിരുകവിഞ്ഞ മോഹമാണ്. ന്യൂനപക്ഷങ്ങള് എന്തൊക്കെ പ്രയാസങ്ങളനുഭവിക്കുന്നുണ്ടെന്നും അതിനു കാരണക്കാര് ആരാണെന്നും തീവ്രമായ അനുഭവങ്ങളിലൂടെ ബോധ്യമുള്ളവരാണ് ഈ നാട്ടുകാര്. സംഘപരിവാറില് നിന്ന് കൊടിയ പീഡനം നേരിടുന്ന ന്യൂനപക്ഷങ്ങള്ക്ക് ബിജെപി അനുകൂല നിലപാടിലെത്താനാവില്ല.
ചില താല്ക്കാലിക ലാഭങ്ങള്ക്കായി ആരെങ്കിലും നടത്തുന്ന നീക്കുപോക്കുകള് ന്യൂനപക്ഷത്തിന്റെ പൊതുസ്വഭാവമാണെന്ന് കരുതുന്നത് ഭീമാബദ്ധമാണ്. വര്ഗീയ ശക്തികള്ക്ക് കേരളത്തിന്റെ മണ്ണില് സ്ഥാനമുണ്ടാകില്ലെന്ന് ഈ നാട് എക്കാലത്തും വ്യക്തമാക്കിയിട്ടുണ്ട്. മതനിരപേക്ഷതയുടെ കേരളമാതൃക രാജ്യത്താകെ വേരുറപ്പിക്കുന്ന നാളുകളാണ് വരാനുള്ളത്'.
മന്ത്രി മുഹമ്മദ് റിയാസിന്റെ പ്രതികരണം: ' ബഹുമാനപ്പെട്ട പ്രധാനമന്ത്രി, അങ്ങ് പറഞ്ഞത് സംഭവിക്കണമെങ്കിൽ മതനിരപേക്ഷ കേരളം മരിക്കണം..! കേരളത്തിലും ബിജെപി സർക്കാരുണ്ടാക്കുമെന്ന പ്രധാനമന്ത്രി നരേന്ദ്ര മോദിയുടെ പ്രസ്താവനയെ മലയാളികൾ അർഹിക്കുന്ന അവജ്ഞയോടെ തള്ളിക്കളയും. ഈ നാട് രൂപപ്പെട്ടുവന്ന ചരിത്രത്തെപ്പറ്റിയും ഇവിടത്തെ സെക്കുലർ ഫാബ്രിക്കിനെപ്പറ്റിയും അറിയുന്നവരാരും ഈ പ്രസ്താവനയെ പിന്തുണക്കില്ല.
വർഗ്ഗീതയ്ക്കും മതവിദ്വേഷ രാഷ്ട്രീയത്തിനും കേരളത്തിന്റെ മണ്ണിൽ സ്ഥാനമില്ലെന്ന് പലവട്ടം സംഘപരിവാറിനെ ഓർമ്മിപ്പിച്ചവരാണ് മലയാളികൾ. ആർഎസ്എസ്സിന്റെ തീവ്ര വലതുപക്ഷ പ്രതിലോമ രാഷ്ട്രീയത്തിന് കേരളമൊരു ബാലികേറാമലയായി തുടരും. മറിച്ചു സംഭവിക്കണമെങ്കിൽ മതനിരപേക്ഷ കേരളം മരിക്കണം. ഇടതുപക്ഷമുള്ളിടത്തോളം മതനിരപേക്ഷ കേരളത്തിന് മരണമില്ല...'
Health Tips: നിസാരക്കാരല്ല പേരയില.. ഗുണങ്ങള് കേട്ടാല് അമ്പരക്കും
Click it and Unblock the Notifications
Sign in with Google