മൂന്ന് ദിവസത്തേക്ക് കൂടി റേഷൻ കടകൾ തുറക്കില്ല; ഇ പോസ് ക്രമീകരണത്തിന് പിന്നാലെ ഉടമകളുടെ സമരവും

തിരുവനന്തപുരം: സാധാരണക്കാരെ വലച്ച് സംസ്ഥാനത്തെ റേഷൻ കടകൾ ഇന്നടക്കം നാല് ദിവസത്തേക്ക് അടച്ചിടും. ഇ പോസ് ക്രമീകരണം ചൂണ്ടിക്കാട്ടിയാണ് ഇന്ന് റേഷൻ കടകൾ അടച്ചിട്ടത്. സംസ്ഥാനത്തെ പതിനാലായിരത്തോളം റേഷൻ കടകളാണ് തുടർച്ചയായി നാല് ദിവസം അടച്ചിടുന്നത്. നാളെ ഞായറാഴ്‌ച ആയതിനാൽ അവധിയാണ്. എട്ടിനും ഒൻപതിനും റേഷൻ വ്യാപാരി സംഘടനകളുടെ സമരമായതിനാൽ റേഷൻ കടകൾ‌ തുറന്നു പ്രവർത്തിക്കില്ല.

കഴിഞ്ഞ മാസത്തെ റേഷൻ വിതരണം ഈ മാസം അഞ്ച് വരെ നീട്ടിയിരുന്നു. അത് കൊണ്ടുതന്നെ ഈ മാസത്തെ റേഷൻ അഞ്ചാം തീയതി വരെ വാങ്ങാൻ കഴിഞ്ഞിരുന്നില്ല. അതിനിടയിലാണ് നാല് ദിവസത്തോളം കടകൾ അടച്ചിടുന്നത്. റേഷൻ കടകൾ ആശ്രയിക്കുന്ന നിർധന കുടുംബങ്ങൾക്ക് വലിയ ബുദ്ധിമുട്ടാണ് ഇതോടെ ഉണ്ടാവുക. മാസം ആദ്യം തന്നെ റേഷൻ വാങ്ങുന്ന ഇത്തരക്കാർക്ക് ഇനി ജൂലൈ പത്ത് വരെ ഇതിനായി കാത്തിരിക്കേണ്ടി വരും.

അതിനിടെ റേഷൻ വ്യാപാരികളുടെ വേതന പ്രശ്‌നങ്ങളും മറ്റും ചർച്ച ചെയ്യാനായി മന്ത്രിമാരായ കെഎൻ ബാല​ഗോപാൽ‌, ജിആർ അനിൽ എന്നിവർ വിളിച്ചു ചേർത്ത ചർച്ച പരാജയമായിരുന്നു, ഇതിന് പിന്നാലെ വ്യാപാരികൾ സമരത്തിലേക്ക് കടക്കുകയാണ്. വേതന പാക്കേജ് കാലോചിതമായി പരിഷ്‌കരിക്കുക, ക്ഷേമനിധി കാര്യക്ഷമമാക്കുക തുടങ്ങിയവയാണ് ഇവർ ഉന്നയിക്കുന്ന പ്രധാന ആവശ്യങ്ങൾ.

മിനിമം വേതനം 30000 രൂപയാക്കുക, മുഴുവൻ സെയിൽസ്‌മാന്മാരെയും റേഷൻ ലൈസൻസികളെയും സ്ഥിരപ്പെടുത്തുക തുടങ്ങിയ ആവശ്യങ്ങൾ ഉന്നയിച്ച് കേരള റേഷൻ എംപ്ലോയീസ് ഫെഡറേഷൻ (കെആർഇഎഫ്) എഐടിയുസിയുടെ നേതൃത്വത്തിൽ 8ന് സെക്രട്ടേറിയറ്റ് മാർച്ചും ധർണയും നടത്താനും തീരുമാനിച്ചിട്ടുണ്ട്.

അതേസമയം, സംസ്ഥാനത്തെ പൊതുവിതരണ സംവിധാനം കാര്യമായ പ്രതിസന്ധി നേരിടുന്ന ഘട്ടത്തിലാണ് റേഷൻ കടയുടമകളുടെ സമരം വരുന്നത്. വിലവർധന പിടിച്ചുനിർത്തേണ്ട പൊതുവിതരണ സംവിധാനങ്ങൾ ക്ഷാമത്തിലും സമരഭീഷണിയിലും കുടുങ്ങി കിടക്കുന്നത് സാധാരണക്കാരെ സംബന്ധിച്ച് വലിയ വെല്ലുവിളിയാണ് സൃഷ്‌ടിക്കുന്നത്.

റേഷൻ കടയുടമയുടെ പ്രശ്‌നങ്ങൾ പരിഹരിച്ചില്ലെങ്കിൽ ഓണക്കാലത്ത് അനിശ്ചിതകാല സമരം തുടങ്ങാനാണ് അവരുടെ ആലോചന. നേരത്തെ കുറച്ചു ദിവസം മുൻപ് റേഷൻ വിതരണക്കാരുടെ സമരം മൂലം മിക്കയിടത്തും സാധനങ്ങളുടെ വിതരണം മുടങ്ങിയിരുന്നു. 78 കരാറുകാർക്കായി മൂന്നുമാസത്തെ പണമായ 75 കോടിയാണ് നൽകാനുണ്ടായിരുന്നത്. ഒരു മാസത്തെ തുക നൽകിയാണ് ഈ സമരം അവസാനിപ്പിച്ചത്.

English summary

Ration Shops Will Not Open For Three More Days; Owners Strike After E POS Arrangement.