'ബിജെപിക്ക് അനുകൂലമായി എൽഡിഎഫ് വോട്ടുകൾ ചോർന്നു, ന്യൂനപക്ഷ വോട്ട് ഏകീകരണം തിരിച്ചടി'; എംവി ഗോവിന്ദൻ

കോഴിക്കോട്: ബിജെപിക്ക് അനുകൂലമായി പലയിടത്തും എൽഡിഎഫ് വോട്ടുകൾ ചോർന്നുവെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ. ക്ഷേത്രങ്ങൾ വിശ്വാസികളാണ് കൈകാര്യം ചെയ്യേണ്ടതെന്നും അല്ലാതെ വിശ്വാസത്തെ ഉപകരണമാക്കി മാറ്റുന്ന ആർഎസ്എസ് അല്ല അവ കൈകാര്യം ചെയ്യേണ്ടതെന്നും എംവി ഗോവിന്ദൻ തുറന്നടിച്ചു.

ലോക്‌സഭാ തിരഞ്ഞെടുപ്പ് തോൽ‌വിയിൽ ന്യൂനപക്ഷ വോട്ടുകളുടെ ഏകീകരണം തിരിച്ചടിയായെന്ന വിലയിരുത്തൽ തന്നെയാണ് സിപിഎം സംസ്ഥാന സെക്രട്ടറിയും മുന്നോട്ട് വയ്ക്കുന്നത്. കൂടാതെ ഇടതുപക്ഷ വോട്ടുകൾ ബിജെപിയിലേക്ക് കാര്യമായി മറിഞ്ഞുവെന്ന ആശങ്കയും എംവി ഗോവിന്ദൻ ഉയർത്തുന്നുണ്ട് എന്നതാണ് ശ്രദ്ധേയം.

ജയവും തോൽവിയും ഇടകലർന്ന് തന്നെയാണ് ഇടതുപക്ഷം മുന്നോട്ട് പോയിട്ടുള്ളത്. എന്നാൽ ഇപ്രാവശ്യം ഘടകങ്ങൾ അനുകൂലമായിരുന്നില്ല. ബിജെപിയെ താഴെ ഇറക്കാൻ കോൺഗ്രസ് മാത്രമേയുള്ളൂവെന്ന പ്രചാരണം തിരിച്ചടിയായി. കുറഞ്ഞ സീറ്റുകളിൽ മത്സരിക്കുന്ന സിപിഎമ്മും സിപിഐയും ജയിച്ചാൽ നിലവിലെ രാഷ്ട്രീയ സാഹചര്യത്തിന് മാറ്റം വരുമോയെന്ന് ന്യൂനപക്ഷങ്ങൾ ഉൾപ്പെടെ ചിന്തിച്ചുവെന്നും എംവി ഗോവിന്ദൻ ചൂണ്ടിക്കാട്ടി.

സിപിഎം വിശ്വാസത്തിന് എതിരല്ലെന്നും അദ്ദേഹം തീർത്തുപറഞ്ഞു. വിശ്വാസികളോട് ഒപ്പം നിൽക്കുന്ന നിലപാടാണ് സിപിഎമ്മിന്. അവിശ്വാസികൾക്കൊപ്പവും നിൽക്കും. രണ്ടു കൂട്ടർക്കും ജനാധിപത്യ അവകാശങ്ങളുണ്ട്. വിശ്വാസികൾ വർഗീയവാദികളല്ല. വര്‍ഗീയവാദി വിശ്വാസിയുമല്ലെന്നും എംവി ഗോവിന്ദൻ പറഞ്ഞു.

വർഗീയതയെ പ്രതിരോധിക്കാൻ വിശ്വാസികളാണ് നല്ലതെന്നും ക്ഷേത്രങ്ങൾ വിശ്വാസികൾ കൈകാര്യം ചെയ്യണമെന്നും എംവി ഗോവിന്ദൻ ആവശ്യപ്പെട്ടു. ആർഎസ്എസിനെ വിമർശിക്കാനും സിപിഎം സംസ്ഥാന സെക്രട്ടറി മറന്നില്ല. വിശ്വാസത്തെ ഉപകരണമാക്കുന്ന ആർഎസ്എസല്ല ആരാധനാലയങ്ങൾ കൈകാര്യം ചെയ്യേണ്ടത്. ഇന്നല്ലെങ്കിൽ നാളെ വിശ്വാസികളുടെ കൈയ്യിൽ ആരാധനാലയങ്ങൾ വരണമെന്നും അദ്ദേഹം പറഞ്ഞു.

മലബാറിലെ ന്യൂനപക്ഷ വോട്ടുകൾ ഏകീകരിക്കുന്നത് വലിയ പ്രത്യാഘാതങ്ങൾ ഉണ്ടാക്കുമെന്നും അദ്ദേഹം പറഞ്ഞു. വടകരയിലും കോഴിക്കോടും യുഡിഎഫിന്റെ ഭൂരിപക്ഷം ചൂണ്ടിക്കാട്ടിയായിരുന്നു എംവി ഗോവിന്ദന്റെ പ്രതികരണം. മുസ്ലിം വോട്ടുകൾ ഏകീകരിപ്പിക്കാൻ വർഗീയ ശക്തികൾ ഇടപെട്ടു. ഇത് ദൂരവ്യാപകമായ പ്രത്യാഘാതം ഉണ്ടാക്കും. വർഗീയ ശക്തികളെ ഏകോപിപ്പിച്ചു മുന്നോട്ട് പോകാൻ തന്നെയാണ് ലീഗ് ശ്രമമെന്നും അവർ പറഞ്ഞു.

തൃശൂരിലെ ബിജെപി ജയം ഗൗരവമുള്ളതാണെന്നും സിപിഎം സംസ്ഥാന സെക്രട്ടറി പറഞ്ഞു. ക്രിസ്‌ത്യൻ വോട്ടുകളിൽ ഒരു പങ്ക് അവർക്ക് ലഭിച്ചു. കേരളത്തിൽ എൽഡിഎഫ് വോട്ടുകൾ പലയിടത്തും ചോർന്നത് ബിജെപിക്ക് അനുകൂലമായാണ്. പരമ്പരാഗത വോട്ടുകൾ ഉൾപ്പെടെ ചോർന്നു. കുറച്ച് വോട്ടുകൾ യുഡിഎഫിലേക്കും പോയെന്ന് അദ്ദേഹം പറഞ്ഞു.

അതേസമയം, തിരഞ്ഞെടുപ്പ് തോൽ‌വിയിൽ സിപിഐ ഉൾപ്പെടെയുള്ള സംഘടനകൾ പ്രതികൂട്ടിൽ നിർത്തുന്നത് സർക്കാരിനെയും പിണറായി വിജയനെയുമാണ്. നിരന്തരം മുന്നണിയിൽ വിമർശനം ഉയരുകയും ചെയ്യുന്നുണ്ട്. പിണറായിയെ കേന്ദ്രീകരിച്ചുള്ള പ്രചരണം ദോഷമായെന്നായിരുന്നു ഏറ്റവും ഒടുവിൽ സിപിഐ സംസ്ഥാന കൗൺസിലിന്റെ വിമർശനം.

English summary

'Temples Should Be Managed By Believers And Not RSS'; MV Govindan.