'ഉമ്മാ അവന്‍ എപ്പോള്‍ വരും എന്നാണ് ഇപ്പോഴും ഇക്കമാര്‍ ചോദിക്കുന്നത്..' ജീവിതം പറഞ്ഞ് ഇഷ

കൊച്ചി: ട്രാന്‍സ്ജെന്‍ഡര്‍ ജീവിതത്തില്‍ തനിക്ക് നേരിടേണ്ടി വന്ന പ്രതിസന്ധികളെക്കുറിച്ച് തുറന്നുപറഞ്ഞ് റിയ ഇഷ. ദി ഫോര്‍ത്തിന് നല്‍കിയ അഭിമുഖത്തില്‍ റിയ ഇഷ തന്റെ ജീവിതം പറഞ്ഞത്. ട്രാന്‍സ്‌ജെന്‍ഡര്‍ എന്ന നിലയില്‍ വീട്ടുകാര്‍ ഉഇപ്പോഴും പൂര്‍ണമായി അംഗീകരിച്ചിട്ടില്ല എന്ന് റിയ ഇഷ പറയുന്നു. പണ്ട് കാലത്ത് ഒമ്പത്, ചാന്തുപൊട്ട് എന്നൊക്കെ വിളിച്ചതില്‍ നിന്ന് ഇപ്പോള്‍ ട്രാന്‍സ്‌ജെന്‍ഡര്‍ എന്ന് വിളിക്കപ്പെടുന്നത് നല്ലതാണെന്നും റിയ പറയുന്നു.

റിയയുടെ വാക്കുകള്‍ ഇങ്ങനെയാണ്: ഇപ്പോഴും എന്റെ ഉമ്മ എന്റടുത്ത് വന്ന് തിരിച്ച് പോകുമ്പോള്‍ എന്റെ ഇക്കമാര്‍ ചോദിക്കുന്നത് ഉമ്മാ അവന്‍ എപ്പോള്‍ വരും എന്നാണ്. കംപ്ലീറ്റ് സര്‍ജറി നടത്തി സ്ത്രീ ആയ ഒരാളാണ് ഞാന്‍. അവര്‍ ഓള്‍റെഡി കണ്ടിരിക്കുന്നത് ഒരു ആണ്‍കുട്ടിയുടെ ജന്മത്തില്‍ ആണ്‍കുട്ടിയായി വേഷം ധരിച്ചിരുന്ന ആള്‍ എന്ന രീതിയില്‍ മാത്രമാണ്. അവര്‍ക്ക് ഇതില്‍ നിന്ന് എന്താണ് ട്രാന്‍സ്, അല്ലെങ്കില്‍ അവരുടെ മാനസികാവസ്ഥയൊന്നും മനസിലാക്കാന്‍ പറ്റിയിട്ടില്ല.

ഉമ്മയും ഇത്തയും മാത്രമാണ് എന്നെ മനസിലാക്കി എന്റെ കൂടെ നിന്നിട്ടുള്ളൂ. അവരെ ഞാന്‍ കുറ്റപ്പെടുത്തുകയല്ല. സമൂഹത്തിന്റെ ഒരു കുഴപ്പമാണ്. ആര്‍ക്കും ആരേയും മനസിലാക്കാന്‍ പറ്റുന്നില്ല. മാനസികാവസ്ഥ എന്താണെന്ന് മനസിലാക്കാന്‍ പറ്റുന്നില്ല. ഞാന്‍ ഇത്രയും നാള്‍ എന്താണോ പഠിച്ചത് അത് തന്നെയെ ഇനി അങ്ങോട്ടും തുടരുകയുള്ളൂ എന്നുള്ള അവസ്ഥയാണ്. ഇക്കമാര്‍ക്കൊന്നും സ്വാഭാവികമായിട്ടും ഈ ഒരു അവസ്ഥയില്‍ നിന്ന് മാറ്റം വന്നിട്ടില്ല അവര്‍ക്ക്.

ഞാന്‍ എന്ത് നേടിയാലും അവന്‍ എന്ന രീതിയിലേ അവര്‍ക്ക് കാണാന്‍ കഴിയൂ. ട്രാന്‍സ്‌ജെന്‍ഡര്‍ എന്ന് വിശേഷിപ്പിക്കുന്നത് തന്നെ വലിയൊരു കാര്യമാണ്. പണ്ട് ഒമ്പത്, ചാന്തുപൊട്ട് എന്നൊക്കെ വിളിച്ചിരുന്നിടത്ത് നിന്ന് ഇപ്പോള്‍ ഈ കുറഞ്ഞ കാലഘട്ടം കൊണ്ട് അതൊരു ട്രാന്‍സ്‌ജെന്‍ഡര്‍ അല്ലേ എന്ന് പറയുന്നത് കേള്‍ക്കുമ്പോള്‍ നമുക്കൊരു അഭിമാനമാണ്. കുട്ടിക്കാലം തൊട്ട് ഒരാള്‍ സ്‌ത്രൈണ ഭാവം കാണിക്കുമ്പോള്‍ തന്നെ ചാന്തുപൊട്ട് അല്ലെങ്കില്‍ ഒമ്പത് എന്ന് വിളിക്കും.

വീട്ടില്‍ കയറി കഴിഞ്ഞാല്‍ എന്റെ വയറ്റില്‍ എന്തിനാണ് രണ്ടും കെട്ട നീ ജനിച്ചത്. ഈ തറവാടിന് മോശമായിട്ട് എന്തിനാണ് നീ ഇവിടെ ജീവിക്കുന്നത്. പെണ്‍കുട്ടികളുടെ അടുത്ത് ചെന്നാല്‍ പറയും നീ ആണല്ലേ ഞങ്ങളുടെ അടുത്ത് കഴിക്കേണ്ട, ആണ്‍കുട്ടികളുടെ അടുത്ത് ചെന്ന് കഴിഞ്ഞാല്‍ നിന്റെ ലിംഗം ഏതാണ് അതൊന്ന് കാണിക്ക് ഇങ്ങനെയുള്ള പരിഹാസങ്ങള്‍ മാത്രം കേട്ട് വളരുന്ന ഒരു കുട്ടിയുടെ അവസ്ഥ നോക്കൂ.

ഒരിക്കലും ഒരു ആണ്‍കുട്ടി പെണ്‍കുട്ടിയാകില്ല, പെണ്‍കുട്ടി ആണ്‍കുട്ടിയാകില്ല. അവരുടെ മാനസികാവസ്ഥ കറക്ട്ട് ആയില്ലെങ്കില്‍ മാത്രമാണ് ഇങ്ങനെയാകുക. നാട്ടുകാരും വീട്ടുകാരും പറയുന്നത് കേട്ട് ഞാന്‍ ഒരു പെണ്‍കുട്ടിയെ വിവാഹം കഴിച്ചിരുന്നെങ്കില്‍ ആ കുട്ടിക്ക് അറിയും ഞാന്‍ എങ്ങനെയാണ് പ്രതികരിച്ചിട്ടുള്ളത് എന്നത്. അപ്പോള്‍ ആ കുട്ടി ഡൈവോഴ്‌സിലേക്ക് പോയിട്ടുണ്ടാകും. എന്റെ അവസ്ഥ വീട്ടുകാരോട് പറഞ്ഞിതൊന്നുമല്ല.

പെണ്‍കുട്ടിയെ സെക്‌സില്‍ തൃപ്തിപ്പെടുത്താന്‍ പറ്റില്ല എന്ന് അറിഞ്ഞതിന് ശേഷമാണ് ഞാന്‍ എറണാകുളത്തേക്ക് വന്നത്. ഞാന്‍ ജോലി തിരക്കാണ് എന്ന് പറഞ്ഞിട്ടായിരുന്നു വീട്ടില്‍ നിന്ന് മാറി നിന്നത്. ആ സമയത്തും ഈ സമയത്തും വീട്ടില്‍ നിന്ന് സപ്പോര്‍ട്ട് ഒന്നും ഉണ്ടായിരുന്നില്ല എന്നും റിയ ഇഷ പറയുന്നു.

English summary

Transgender Actress Riya Isha opens up about her life and family, check details inside