കേരള കോൺഗ്രസ് എം ബിജെപിയിലേക്കോ? ഓഫർ മുന്നോട്ട് വച്ച് ഷോൺ ജോർജ്, 'തീരുമാനം അവരുടേത്'
കോട്ടയം: കേരള കോൺഗ്രസ് എമ്മിനെ ബിജെപിയിലേക്ക് ക്ഷണിച്ച് ഷോൺ ജോർജ്. നിയമസഭാ തിരഞ്ഞെടുപ്പിന് പിന്നാലെ സംസ്ഥാനത്ത് ഉയർന്നുവന്ന സവിശേഷ രാഷ്ട്രീയ സാഹചര്യങ്ങളുടെ പശ്ചാത്തലത്തിലാണ് ഈ നിർണായക നീക്കം. ബിജെപി ഉപാധ്യക്ഷൻ കൂടിയായ ഷോൺ ജോർജ് ക്രിസ്ത്യൻ വിഭാഗത്തെ പാർട്ടിയിലേക്ക് കൂടുതലായി അടുപ്പിക്കാൻ നിയോഗിക്കപ്പെട്ട നേതാക്കന്മാരിൽ ഒരാളായാണ് കണക്കാക്കുന്നത്.
വാർത്താസമ്മേളനത്തിലാണ് ഷോൺ ജോർജിന്റെ ക്ഷണം. കർഷകരോട് അനുഭാവം പുലർത്തുന്ന പാർട്ടിയാണെങ്കിൽ കേരള കോൺഗ്രസ് എം ബിജെപിക്കൊപ്പം വരണം. ഇക്കാര്യത്തിൽ തീരുമാനമെടുക്കേണ്ടത് അവരുടെ പാർട്ടിയാണെന്നും അവർ തീരുമാനമെടുത്താൽ ബിജെപി നേതൃത്വം ഉചിതമായ തീരുമാനത്തിലെത്തുമെന്നുമാണ് ഷോൺ ജോർജ് പറയുന്നത്.
അതേസമയം, കേരള കോൺഗ്രസ് എം ബിജെപിയോട് അടുക്കുന്നുവെന്ന് നേരത്തെ പല സ്ഥിരീകരിക്കാത്ത റിപ്പോർട്ടുകളും വന്നിരുന്നു. 2024 ലോക്സഭാ തിരഞ്ഞെടുപ്പിന് പിന്നാലെ ക്രിസ്ത്യൻ വിഭാഗത്തെ ചേർത്ത് നിർത്തുന്ന സമീപനമാണ് ബിജെപി മുന്നോട്ട് വച്ചിരുന്നത്. അതിന്റെ ഭാഗമായാണ് മധ്യ-തെക്കൻ കേരളത്തിൽ കാര്യമായ സ്വാധീനം ഉള്ള കേരള കോൺഗ്രസ് എമ്മിനെ മുന്നണിയിൽ എത്തിക്കാൻ ചരടുവലികൾ തുടങ്ങിയത്.
എന്നാൽ ഇടത് മുന്നണിക്കൊപ്പം ഉറച്ചു നിൽക്കാനായിരുന്നു ജോസ് കെ മാണിയുടെ നേതൃത്വത്തിലുള്ള പാർട്ടിയുടെ തീരുമാനം. അതിനിടെ വന്ന തദ്ദേശ- നിയമസഭാ തിരഞ്ഞെടുപ്പിൽ പാർട്ടിക്ക് യാതൊരു വിധ നേട്ടവും ഉണ്ടക്കാൻ സാധിച്ചിരുന്നില്ല. എന്ന് മാത്രമല്ല ജോസ് കെ മാണി, റോഷി അഗസ്റ്റിൻ തുടങ്ങിയ മുൻനിര നേതാക്കൾ പോലും തോൽവിയുടെ കയ്പ്പ് അറിഞ്ഞിരുന്നു.
ഇതോടെ പാർട്ടിക്കുള്ളിൽ നിന്ന് തന്നെ ഇടത് മുന്നണി വിടണമെന്ന ആവശ്യം ശക്തമായി ഉയർന്നിരുന്നു. കോട്ടയത്തെ പ്രബല ശക്തിയായിരുന്ന കേരള കോൺഗ്രസ് എമ്മിന് നിലവിൽ നിയമസഭയിൽ പോലും പ്രാതിനിധ്യം ഇല്ലാത്ത സ്ഥിതിയാണ്. ഇടത് മുന്നണിയിൽ ചേർന്ന ശേഷമാണ് തുടർ തോൽവികൾ പാർട്ടിക്ക് ഉണ്ടായതെന്നും അതുകൊണ്ട് തന്നെ മുന്നണി മാറ്റം അനിവാര്യമെന്നും അഭിപ്രായം ഉയർന്നിരുന്നു.
ഇക്കുറി നിയമസഭാ തിരഞ്ഞെടുപ്പിന് മുൻപ് തന്നെ കേരള കോൺഗ്രസ് എം വലത് മുന്നണിയിലേക്ക് ചേക്കേറുമെന്ന് റിപ്പോർട്ടുകൾ വന്നിരുന്നു. എന്നാൽ അതുണ്ടായില്ല. ഇതിന് ശേഷമാണ് തിരഞ്ഞെടുപ്പ് തോൽവി കഴിഞ്ഞപാടെ ബിജെപിയെ ചേർത്തുകൊണ്ട് ചർച്ചകൾ നടക്കുന്നത്. ആ വേളയിൽ വരുന്ന ഷോൺ ജോർജിന്റെ ക്ഷണം അതീവ ഗൗരവത്തോടെയാണ് രാഷ്ട്രീയ ലോകം നോക്കി കാണുന്നത്.
കേരളത്തിൽ അധികാരം നഷ്ടമായ ഇടത് മുന്നണിയിൽ തുടരുന്നത് കൊണ്ട് പാർട്ടിക്ക് പ്രത്യേകിച്ച് യാതൊരു ഗുണവുമില്ലെന്നാണ് പൊതുവെയുള്ള വിലയിരുത്തൽ. യുഡിഎഫിന് ആവട്ടെ ഇനി കേരള കോൺഗ്രസിനെ കൂടി ഉൾക്കൊള്ളിച്ച് ത്യാഗം സഹിക്കേണ്ട ആവശ്യവുമില്ല. അതിനാൽ എൻഡിഎ മുന്നണിയിലേക്ക് ചേക്കേറിയാൽ രാജ്യസഭാ സീറ്റ് അടക്കമുള്ള ഓഫറുകൾ പാർട്ടിക്ക് ലഭിക്കുമെന്നാണ് കരുതുന്നത്. എന്നാൽ ഇതുവരെയും കേരള കോൺഗ്രസ് എം നേതൃത്വം ഇതിനോട് പ്രതികരിച്ചിട്ടില്ല.
Click it and Unblock the Notifications
Sign in with Google