കുറുവാ സംഘം കോഴിക്കോട് ജില്ലയില്, പരിശോധന ശക്തമാക്കി പോലീസ്, ജാഗ്രത പാലിക്കണം
കോഴിക്കോട്: തമിഴ്നാട്ടില് നിന്നുളള കുപ്രസിദ്ധ മോഷണ സംഘമായ കുറുവാ സംഘം കോഴിക്കോട് ജില്ലയില് എത്തിയതായി സ്ഥിരീകരിച്ച് പോലീസ്. ഏലത്തൂര് സ്റ്റേഷന് പരിധിയിലുണ്ടായ രണ്ട് മോഷണക്കേസുകളില് കുറുവാ സംഘത്തിന്റെ സാന്നിധ്യമുളളതായി സംശയിക്കുന്നതായി സിറ്റി പോലീസ് കമ്മീഷണര് എവി ജോര്ജ് വ്യക്തമാക്കി. പാലക്കാട് ജില്ലയിലെ ആലത്തൂരില് കുറുവ സംഘത്തിലെ മൂന്ന് പേരെ പോലീസ് അറസ്റ്റ് ചെയ്തിരുന്നു.
അതീവ അക്രമകാരികളാണ് കുറുവാ സംഘം എന്ന് അറിയപ്പെടുന്ന മോഷ്ടാക്കളുടെ സംഘം. വീടിന്റെ വാതില് തകര്ത്ത് അകത്ത് കടന്ന് മോഷണം നടത്തുന്ന ഇവര് വീട്ടുകാരെ ക്രൂരമായി ആക്രമിക്കുകയും പതിവാണ്. ഈ സാഹചര്യത്തില് ജില്ലയിലെ ജനങ്ങള് അതീവ ജാഗ്രത പാലിക്കണം എന്ന് എവി ജോര്ജ് വ്യക്തമാക്കി. തൂമ്പ, കോടാലി പോലുളളവ വീടിന് വെളിയില് വെയ്ക്കരുതെന്നും പോലീസ് കമ്മീഷണര് പറഞ്ഞു.
കോഴിക്കോട് നഗരത്തില് പോലീസ് രാത്രികാല പരിശോധന ശക്തമാക്കിയിരിക്കുകയാണ്. തക്കതായ കാരണമില്ലാതെ രാത്രി നഗരത്തില് കാണുകയാണ് എങ്കില് നടപടിയെടുക്കാന് സിറ്റി പോലീസ് കമ്മീഷണര് എവി ജോര്ജിന്റെ നേതൃത്വത്തില് ചേര്ന്ന യോഗത്തില് തീരുമാനമായി. മാത്രമല്ല വ്യാപാരികളുടേയും റെസിഡന്സ് അസോസിയേഷനുകളുടേയും സഹകരണത്തോടെ കൂടുതല് നിരീക്ഷണ ക്യാമറകള് നഗരത്തില് സ്ഥാപിക്കാനും തീരുമാനമായിട്ടുണ്ട്. സംശയം തോന്നിക്കുന്ന തരത്തില് ആരെയെങ്കിലും കണ്ടാലോ എന്തെങ്കിലും സംഭവിച്ചാലോ പോലീസിനെ വിവരം അറിയിക്കണം.
Click it and Unblock the Notifications
Sign in with Google