കോഴിക്കോട് കൂടുതല് നിയന്ത്രണങ്ങള്, പൊതുപരിപാടികള്ക്ക് നിരോധനം, ടിപിആര് 30 ശതമാനത്തിന് മുകളില്
കോഴിക്കോട്: കൊവിഡ് ടിപിആര് വര്ധിക്കുന്ന സാഹചര്യത്തില് കോഴിക്കോട് ജില്ലയില് നിയന്ത്രണങ്ങള് വര്ധിക്കുന്നു. ജില്ലയില് പൊതു പരിപാടികള്ക്ക് നിരോധനം സംസ്ഥാനത്ത് കോവിഡ് വൈറസ് അതിവേഗം പടര്ന്നുപിടിക്കുന്ന സാഹചര്യത്തില് പ്രതിരോധത്തിന്റെ ഭാഗമായി ജില്ലയില് പൊതുപരിപാടികള്ക്ക് നിരോധനം ഏര്പ്പെടുത്തി. ബീച്ചില് അടക്കം നിയന്ത്രണം കടുപ്പിക്കുമെന്ന് ജില്ലാ കളക്ടര് അറിയിച്ചു. ജില്ലയില് പൊതുയോഗങ്ങള് വിലക്കും. ബസ്സില് നിന്ന് കൊണ്ടുള്ള യാത്ര അനുവദിക്കില്ല. നഗരത്തില് അടക്കം പരിശോധന കര്ശനമാക്കുമെന്നും കളക്ടര് തേജ് ലോഹിത് റെഡ്ഡി അറിയിച്ചു.
ജില്ലയില് മൂന്ന് ദിവസത്തെ ശരാശരി ടെസ്റ്റ് പോസിറ്റിവിറ്റി നിരക്ക് 30 ശതമാനത്തില് കൂടുതലായതിന്റെ അടിസ്ഥാനത്തിലാണ് എല്ലാ വിധത്തിലുള്ള പൊതുപരിപാടികളും നിരോധിച്ചത്. കോഴിക്കോട് ഇന്ന് 2043 പേര്ക്കാണ് കൊവിഡ് സ്ഥിരീകരിച്ചത്. സമ്പര്ക്കം വഴി 1,990 പേര്ക്കും ഉറവിടം വ്യക്തമല്ലാത്ത 22 പേര്ക്കും സംസ്ഥാനത്തിന് പുറത്തു നിന്നെത്തിയ 26 പേര്ക്കും 5 ആരോഗ്യ പരിചരണ പ്രവര്ത്തകര്ക്കുമാണ് രോഗം സ്ഥിരീകരിച്ചത്. 6,355 പേരെ പരിശോധനക്ക് വിധേയരാക്കി. ജില്ലയിലെ കോവിഡ് ആശുപത്രികള്, എഫ്എല്ടിസികള്, വീടുകള് എന്നിവിടങ്ങളില് ചികിത്സയിലായിരുന്ന 513 പേര് കൂടി രോഗമുക്തി നേടി.
32.67 ശതമാനമാണ് ടെസ്റ്റ് പോസിറ്റിവിറ്റി നിരക്ക്. രോഗം സ്ഥിരീകരിച്ച് 12,022 പേരാണ് ചികിത്സയിലുള്ളത്. പുതുതായി വന്ന 1,584 പേര് ഉള്പ്പടെ 23,887 പേര് ഇപ്പോള് നിരീക്ഷണത്തിലുണ്ട് . ഇതുവരെ 12,09,271 പേര് നിരീക്ഷണം പൂര്ത്തിയാക്കി. 4,580 മരണങ്ങളാണ് ഇതുവരെ കോവിഡ് മൂലമെന്ന് റിപ്പോര്ട്ട് ചെയ്യപ്പെട്ടിട്ടുള്ളത്.അതേസമയം മതപരമായ പരിപാടികള്ക്കും ഇത് ബാധകമാണ്. എല്ലാ സര്ക്കാര്, അര്ധസര്ക്കാര് സഹകരണ, പൊതുമേഖലാ, സ്വയംഭരണ സ്ഥാപനങ്ങളും ഓണ്ലൈന് ആയി മാത്രമേ യോഗങ്ങളും പരിപാടികളും ചടങ്ങുകളും നടത്താവൂ. ബീച്ചുകളിലേക്കുള്ള പൊതുജനങ്ങളുടെ പ്രവാഹം നിയന്ത്രിക്കുന്നതിനും ഹോട്ടലുകളിലും മാളുകളിലുമുള്ള പൊതുജനങ്ങളുടെ കൂടിച്ചേരല് നിയന്ത്രിക്കുന്നതിനും നടപടി സ്വീകരിക്കാന് ജില്ലാ പോലീസ് മേധാവികളെ ചുമതലപ്പെടുത്തി.
ഹോട്ടലുകളിലും റസ്റ്റാറന്റുകളിലും സീറ്റിംഗ് കപ്പാസിറ്റിയുടെ 50 ശതമാനത്തില് കൂടുതല് ആളുകളെ പ്രവേശിപ്പിക്കുന്നത് കര്ശനമായി നിയന്ത്രിക്കും. ഇതിനായി സ്ക്വാഡുകള് രൂപീകരിച്ച് പരിശോധന നടത്താന് പോലീസ് ഉദ്യോഗസ്ഥരെ നിയോഗിച്ചു. സീറ്റിംഗ് കപ്പാസിറ്റിയില് കൂടുതല് ആളുകളുമായുള്ള ബസ് യാത്ര അനുവദനീയമല്ല. ടെസ്റ്റ് പോസിറ്റിവിറ്റി ഉയരുന്ന സാഹചര്യത്തില് കൊറോണ വ്യാപനം തടയാന് ഏവരും സഹകരിക്കണമെന്ന് കളക്ടര് പറഞ്ഞു.കോവിഡ് വ്യാപനം അതിവേഗം വര്ദ്ധിക്കുന്ന സാഹചര്യത്തില് പൊതുജനങ്ങള് കോവിഡിനെ പ്രതിരോധിക്കാന് സഹായകമായ ആരോഗ്യശീലങ്ങള് ജീവിതത്തില് കര്ശനമായി പാലിക്കണമെന്ന് ഡിഎംഒ അറിയിച്ചു.
15 വയസ്സിന് മുകളിലുള്ള എല്ലാവരും നിശ്ചിത ഇടവേളയില് രണ്ട് ഡോസ് കോവിഡ് വാക്സിനെടുത്ത് സുരക്ഷിതരാകണം. വാക്സിനെടുത്തവര്ക്ക് രോഗം വന്നാല് പോലും ഗുരുതരമാകാന് സാധ്യതയില്ല. കൂടാതെ ശരിയായ വിധം മാസ്ക് ധരിക്കുക, കൈകകള് ഇടയ്ക്കിടെ അണുവിമുക്തമാക്കുക, സാമൂഹിക അകലം പാലിക്കുകയും ആള്ക്കൂട്ടമുണ്ടാകുന്ന സാഹചര്യങ്ങള് ഒഴിവാക്കുകയും ചെയ്യുക എന്നിവയെല്ലാം പാലിച്ച് കോവിഡിനെതിരെ ശക്തമായ പ്രതിരോധം തീര്ക്കാന് എല്ലാവരും ശ്രദ്ധിക്കണം. കോവിഡ് മുക്തമായ നാടിന് വേണ്ടിയുള്ള പ്രവര്ത്തനങ്ങളില് പൊതുജനങ്ങളുടെ പങ്കാളിത്തവും സഹകരണവുമുണ്ടാകണമെന്ന് ഡിഎംഒ അഭ്യര്ത്ഥിച്ചു.
Click it and Unblock the Notifications
Sign in with Google