പോലീസ് ചുമത്തിയ പിഴ മാലയാക്കി ഒറ്റയാള്‍ പ്രതിഷേധം... 250 രൂപ മുതല്‍ 10000 വരെ, വീഡിയോ വൈറല്‍

മലപ്പുറം: മുഖ്യമന്ത്രിയുടെ ശ്രദ്ധയിലേക്ക്... ഈ വാചകത്തില്‍ തുടങ്ങുന്ന പ്ലക്കാര്‍ഡുമായി മഞ്ചേരി നഗരത്തില്‍ ഒറ്റയാള്‍ പ്രതിഷേധം. ചെങ്കല്ല് കൊണ്ടുപോകുന്ന ലോറി ഡ്രൈവര്‍ പുല്‍പ്പറ്റ സ്വദേശി വരിക്കാടന്‍ റിയാസ് ആണ് പ്രതിഷേധിച്ചത്. തനിക്കും ക്വാറിയിലെ മറ്റു ലോറി ഡ്രൈവര്‍മാര്‍ക്കും പോലീസും റവന്യൂ ഉദ്യോഗസ്ഥരും ചുമത്തിയ പിഴ രശീത് മാലയാക്കി കഴുത്തിലിട്ടാണ് റിയാസിന്റെ വേറിട്ട പ്രതിഷേധം. ഇതിന്റെ വീഡിയോ സോഷ്യല്‍ മീഡിയയില്‍ വൈറലാണ്.

ചെങ്കല്ല് സര്‍വീസിന് സര്‍ക്കാര്‍ അനുമതി നല്‍കിയിട്ടുണ്ടെങ്കിലും വഴി നീളെ ചെക്കിങും പിഴ ചുമത്തലുമാണ് എന്ന് റിയാസ് പറയുന്നു. 250 രൂപ മുതല്‍ 10000 രൂപ വരെ പിഴ കിട്ടിയ രശീത് റിയാസ് മാലയാക്കി അണിഞ്ഞിട്ടുണ്ട്. വേറിട്ട പ്രതിഷേധത്തിന് നിരവധി പേരാണ് പിന്തുണയുമായി രംഗത്തുവന്നിട്ടുള്ളത്. പോലീസ് നടത്തുന്ന ചെക്കിങിലും പിഴ ഈടാക്കലിലും മനംമടുത്ത നിരവധി പേരുണ്ട് എന്ന് തെളിയിക്കുന്നതാണ് വീഡിയോയ്ക്ക് ലഭിക്കുന്ന പ്രതികരണങ്ങള്‍.

ഉദ്യോഗസ്ഥര്‍ ജീവിക്കാന്‍ അനുവദിക്കുന്നില്ലെന്ന് റിയാസ് ആരോപിക്കുന്നു. മുഖ്യമന്ത്രിയുടെ ശ്രദ്ധയിലേക്ക്... ചെങ്കല്ല് സര്‍വീസിന് അനുമതിയുണ്ടായിട്ടും വഴിനീളെ ഒരു വിഭാഗം ഉദ്യോഗസ്ഥരുടെ ചെക്കിങും ഫൈനും കാരണം ബുദ്ധിമുട്ടിലായ ഒരു ഡ്രൈവറുടെ ജീവിക്കാന്‍ വേണ്ടിയുള്ള പ്രതിഷേധം എന്നാണ് പ്ലക്കാര്‍ഡില്‍ എഴുതിയിട്ടുള്ളത്. 150ലേറെ തവണ പിഴ കൊടുക്കേണ്ടി വന്നിട്ടുണ്ടത്രെ. കുടുംബം പട്ടിണിയിലായ അവസ്ഥയിലാണ് പ്രതിഷേധിക്കാന്‍ തീരുമാനിച്ചത്.

കൈകാണിച്ചാല്‍ പോലീസ് 500 രൂപ ഉറപ്പായും വാങ്ങും. ആര്‍ടിഒ ഉദ്യോഗസ്ഥര്‍ 5000 മുതല്‍ 12000 രൂപ വരെ പിഴയിടും. ജിയോളജി വകുപ്പ് 25000 രൂപ വരെയും. ഒരുമാസം ലോറി പിടിച്ചുവയ്ക്കുകയും ചെയ്യും. ഗള്‍ഫില്‍ വാഹനം ഓടിക്കാന്‍ ഇത്രയും പ്രയാസം നേരിട്ടിരുന്നില്ല. വാഹനവുമായി റോഡിലിറങ്ങിയാല്‍ പോലീസ് പിടിക്കുന്ന അവസ്ഥയാമിപ്പോള്‍ എന്നും റിയാസ് പറയുന്നു.

English summary

Lorry Driver with Placard which describe Fine imposed by Police in Malappuram; Video goes Viral