'തോണിയിറക്കി, ഞങ്ങളും തയ്യാറായി, മുമ്പ് പ്രദേശം മഴയിൽ മുങ്ങിയിരുന്നു'; കലാഭവൻ മണിയുടെ സഹോദരൻ

'മുമ്പ് പ്രദേശം മുങ്ങിയിരുന്നു,തോണിയിറക്കി,ഞങ്ങളും തയ്യാറായി; കലാഭവന്‍മണിയുടെ സഹോദരന്‍

തൃശൂർ: തൃശൂരിൽ മഴ ശമനമില്ലതെ തുടരുകയാണ്. ചാലക്കുടി പിഴയിൽ ഒന്നര മീറ്ററോളം ജലനിരപ്പ് ഉയരാൻ സാധ്യതയുണ്ടെന്നാണ് മുന്നറിയിപ്പ്. താഴ്ന്ന പ്രദേശങ്ങളിൽ താമസിക്കന്നവരോട് മാറി താമസിക്കാൻ അറിയിപ്പ് നൽകി കഴിഞ്ഞു. ചാലക്കുടിയിൽ അതീവ ജാ​ഗ്രതാ നിർദ്ദേശമാണ് നൽകിയിട്ടുള്ളത്.

കലാഭവൻ മണിയുടെ നാടായ ചേനത്ത് നാട്ടിൽ നാട്ടുകാർ തോണിയിറക്കി തയാറായിരിക്കുകയാണ്. ഉച്ചയ്ക്ക് ശേഷം ഈ പ്രദേശത്ത് വലിയ രീതിയിൽ വെള്ളം ഉയരാനുള്ള സാധ്യത മുന്നിൽകണ്ടാണ് തയാറെടുപ്പുകൾ നടത്തുന്നത്. ജനങ്ങളെല്ലാം ആശങ്കയിലാണെന്ന് കലാഭവൻ മണിയുടെ സഹോദരൻ ആർഎൽവി രാമകൃഷ്ണൻ പറഞ്ഞു.

2018 ൽ ചേനത്ത് നാട് പ്രദേശം ആകെ മുങ്ങിയിരുന്നു. ഇന്നത്തെ ആവസ്ഥ ആശങ്കയുണ്ടാക്കുന്നുണ്ട്. പ്രദേശത്ത് നിന്ന് മാറേണ്ട അവസ്ഥയാണ്. ഞങ്ങളെല്ലാം വീട്ടിൽ നിന്ന് സാധനങ്ങളല്ലൊം സുരക്ഷിത സ്ഥാനത്തേക്ക് മാറ്റി,ഞങ്ങളോട് മാറി താമസിക്കാനാണ് പറഞ്ഞിരിക്കുന്നത്.-ആർഎൽവി രാമകൃഷ്ണൻ, ട്വന്റിഫോർ ന്യൂസിനോട് പറഞ്ഞു. ചാലക്കുടി പുഴയിൽ അതിശക്തമായ ഒഴുക്കുണ്ടാകും എന്നും ജനങ്ങളെല്ലാവരും അതീവ ജാഗ്രത പുലർത്തണം എന്നും റവന്യു മന്ത്രി കെ രാജൻ പറഞ്ഞിട്ടുണ്ട്. പറമ്പിക്കുളം, പെരിങ്ങൽക്കുത്ത് ഡാമുകളിൽനിന്നും നിലവിൽ വലിയ അളവിൽ വെള്ളം പുറത്തേക്ക് ഒഴുകുന്നുണ്ട്. ഈ സാഹചര്യത്തിൽ ചാലക്കുടി പുഴയുടെ തീരത്തുള്ളവർ എത്രയും പെട്ടെന്ന് മാറി താമസിക്കണമെന്നും മന്ത്രി നിർദ്ദേശിച്ചു.

ഒഴുക്ക് കൂടിയത് ഗൗരവതരമാണെന്നും പുഴയുടെ സ്വഭാവം അനുസരിച്ച് മാറാമെന്ന് ആളുകൾ കരുതരുത്. എത്രയും പെട്ടെന്ന് മാറാൻ തയ്യാറെടുക്കണം. ജില്ലാ ഭരണകുടത്തിന്റെ നിർദ്ദേശങ്ങൾ അനുസരിക്കണം. അതേസമയം അനാവശ്യമായ ഭീതി ഉണ്ടാക്കരുതെന്നും മന്ത്രി പറഞ്ഞു. ആളുകളെ ക്യാമ്പുകളിലേക്ക് മാറ്റാൻ വാഹനങ്ങൾ തയ്യാറാക്കിയിട്ടുണ്ട്. രാത്രിയാകുന്നതിനു മുമ്പ് പരമാവധി ആളുകളെ സുരക്ഷിതമായ കേന്ദ്രങ്ങളിലേക്കു മാറ്റേണ്ടതുണ്ടെന്നും മന്ത്രി പറഞ്ഞു.

അതേസമയം, സംസ്ഥാനത്ത് വീണ്ടും അതിതീവ്ര മഴ മുന്നറിയിപ്പ്. 8 ജില്ലകളിലാണ് ഇന്ന് കേന്ദ്ര കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചിരിക്കുന്നത്. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, കണ്ണൂർ എന്നീ ജില്ലകളിലാണ് ഇന്ന് അതിതീവ്ര മഴയ്ക്കുളള മുന്നറിയിപ്പ്. ഒറ്റപ്പെട്ടയിടങ്ങളിൽ അതിതീവ്രമായ മഴക്കുള്ള സാധ്യത ആണ് പ്രവചിച്ചിരിക്കുന്നത്. 24 മണിക്കൂറിൽ 204.5 mm യിൽ കൂടുതൽ മഴ ലഭിക്കാനാണ് സാധ്യത.

ഇന്ന് അഞ്ച് ജില്ലകളിൽ ഓറഞ്ച് അലർട്ടും കേന്ദ്ര കാലാവസ്ഥാ വകുപ്പ് പ്രഖ്യാപിച്ചിട്ടുണ്ട്. കൊല്ലം, മലപ്പുറം, കോഴിക്കോട്, വയനാട്, കാസറഗോഡ് ജില്ലകളിൽ ആണ് ഇന്ന് ഓറഞ്ച് അലർട്ടുളളത്. അതേസമയം ഇടുക്കി, കോഴിക്കോട്, വയനാട്, കണ്ണൂർ, കാസർഗോഡ് എന്നീ ജില്ലകളിൽ നാളെ കാലാവസ്ഥ വകുപ്പ് ഓറഞ്ച് അലേർട്ട് പ്രഖ്യാപിച്ചിട്ടുണ്ട്. തിരുവനന്തപുരം ജില്ലയിൽ ഇന്ന് യെല്ലോ അലർട്ടാണ് നിലവിൽ ഉള്ളത്.

English summary

Kerala Rain: Kalabhavan Mani's Brother RLV Ramakrishnan Opens Up About The Crisis