തൃശൂർ പൂരം കലക്കിയതിന് പിന്നിൽ രാഷ്ട്രീയ ലക്ഷ്യമെന്ന് സുനിൽകുമാർ; മുഖ്യമന്ത്രിക്ക് പങ്കുണ്ടെന്ന് മുരളീധരൻ

Published: Tuesday, September 3, 2024, 10:44 [IST]

തൃശൂർ: ഇത്തവണത്തെ തൃശൂർ പൂരം അലങ്കോലമായതുമായി ബന്ധപ്പെട്ട് പിവി അൻവറിന്റെ ആരോപണങ്ങൾ ഏറ്റുപിടിച്ച് സിപിഐ നേതാവ് വിഎസ് സുനിൽകുമാർ. പൂരം അലങ്കോലമാക്കിയതിൽ പോലീസിന് പങ്കുണ്ടെന്നാണ് സുനിൽകുമാർ ആരോപിക്കുന്നത്. കോൺഗ്രസ് നേതാവ് മുരളീധരനാവട്ടെ ഒരുപടി കൂടി കടന്ന് വിമർശനം മുഖ്യമന്ത്രിക്ക് നേരെ തൊടുത്തുവിടുകയും ചെയ്‌തിട്ടുണ്ട്‌.

മുഖ്യമന്ത്രിയുടെ അറിവോടെയാണ് സംഭവം നടന്നതെന്നും എഡിജിപി അജിത്കുമാറിന് ഇതിൽ പങ്കുണ്ടെന്നും മുരളീധരൻ ചൂണ്ടിക്കാട്ടി. രാഷ്ട്രീയ ലക്ഷ്യത്തോടെയാണ് പൂരം അലങ്കോലമാക്കിയതെന്നാണ് വിഎസ് സുനിൽകുമാർ പറഞ്ഞത്. അതിന് നേതൃത്വം കൊടുത്തതാരായാലും പുറത്തുവരണം. എഡിജിപി അജിത്കുമാറിന് പങ്കുണ്ടോ എന്നത് നേരിട്ടറിയില്ല. അൻവർ പറഞ്ഞ വിവരമേ ഉള്ളൂവെന്നും സുനിൽകുമാർ പറഞ്ഞു.

പൂരം കലക്കിയത് യാദൃശ്ചികമായല്ലെന്നാണ് അദ്ദേഹം പറഞ്ഞത്. പോലീസ് മാത്രമല്ല, പൂരത്തിന്റെ നടത്തിപ്പുകാർക്കും ഇതിൽ പങ്കുണ്ട്. അന്ന് നടത്തിയ അന്വേഷണ റിപ്പോർട്ട് സർക്കാർ പുറത്തുവിടണം. രാത്രിയിൽ ലൈറ്റ് ഓഫ് ചെയ്യാൻ ആരാണ് തീരുമാനിച്ചത്?. പൂരം കലക്കിയത് തിരഞ്ഞെടുപ്പിൽ ഗുണം ചെയ്‌തില്ലെന്നും സുനിൽകുമാർ മാധ്യമങ്ങളോട് പറഞ്ഞു.

എഡിജിപിയെ ബന്ധപ്പെടുത്തി ഒരു കമന്റ് പറയാനില്ലെന്നും സുനിൽകുമാർ ചൂണ്ടിക്കാട്ടി. അന്വേഷണ റിപ്പോർട്ട് പുറത്തുവിടണമെന് ആവശ്യപ്പെട്ട് മുഖ്യമന്ത്രിക്ക് കത്ത് നൽകാനാണ് സുനിൽകുമാറിന്റെ തീരുമാനം. റിപ്പോർട്ട് പുറത്തുവിട്ടാലേ ചേരയാണോ മൂർഖനാണോ എന്നറിയൂവെന്നും സുനിൽ കുമാർ മാധ്യമങ്ങളോട് സംസാരിക്കവേ വ്യക്തമാക്കി.

തൃശൂർ പൂരം കലക്കിയത് മുഖ്യമന്ത്രിയുടെ അറിവോടെയാണെന്നാണ് കെ മുരളീധരൻ ആരോപിച്ചത്. എഡിജിപി എംആർ അജിത്കുമാറിന്റെ നേതൃത്വത്തിലാണ് ബിജെപിയെ സഹായിച്ചതെന്നും മുരളീധരൻ ചൂണ്ടിക്കാട്ടി. ഇതാണ് അജിത്കുമാറിനെതിരെ നടപടി എടുക്കാതിരിക്കാനുള്ള കാരണമാണെന്നും മുരളീധരൻ ആരോപിച്ചു.

അതേസമയം, കഴിഞ്ഞ ലോക്‌സഭാ തിരഞ്ഞെടുപ്പിൽ തൃശൂർ മണ്ഡലത്തിൽ സുരേഷ് ഗോപിക്ക് വിജയമൊരുക്കിയത് എഡിജിപി എംആർ അജിത് കുമാറാണെന്ന ആരോപണവുമായി പിവി അൻവർ കഴിഞ്ഞ ദിവസം രംഗത്ത് വന്നിരുന്നു. സുരേഷ് ഗോപിയും അജിത് കുമാറും തമ്മിൽ അടുത്ത ബന്ധമാണെന്ന് അൻവർ ആരോപിച്ചിരുന്നു.

വിഎസ് സുനിൽ കുമാറിന് അനുകൂലമായി നിന്ന മണ്ഡലത്തിൽ പോൽലീസിന്റെ പൂരം കലക്കലോടെയാണ് സുരേഷ് ഗോപിക്ക് അനുകൂലമായ വികാരമായുണ്ടായതെന്നും അൻവർ ആരോപിച്ചിരുന്നു. ഒരു ജൂനിയർ ഓഫിസർ മാത്രമായ് എസിപി അങ്കിത്‌ അശോക് സ്വന്തം താൽപര്യത്തിൽ ഇക്കാര്യത്തിൽ ഇടപെടില്ലെന്നും അൻവർ ചൂണ്ടിക്കാട്ടിയിരുന്നു. ഇതോടെയാണ് ഇടത് കേന്ദ്രങ്ങളിൽ ഉൾപ്പെടെ ഈ വെളിപ്പെടുത്തൽ ചർച്ചയായത്.

Published On September 3, 2024