തൃശൂരുകാർക്ക് ആ'ശ്വാസം'; വായു ഗുണനിലവാര സൂചികയിൽ രാജ്യത്ത് നാലാമത്, കേരളത്തിലെ ഏറ്റവും സുരക്ഷിതം

തൃശൂർ: ദേശീയ വായുഗുണനിലവാര സൂചികയിൽ നാലാം സ്ഥാനം തൃശൂർ നഗരം. പട്ടികയിൽ കേരളത്തിൽ നിന്ന് ആദ്യ സ്ഥാനത്തെത്തിയത് തൃശൂരാണ്. ഏറ്റവും നല്ല വായു ഉള്ള പന്ത്രണ്ട് നഗരങ്ങളുടെ പട്ടികയിൽ കേരളത്തിൽ നിന്ന് ഇടംപിടിച്ചത് തൃശൂർ മാത്രമാണ്. മലിനീകരണ നിയന്ത്രണ ബോർഡിന്റെ കണക്ക് പ്രകാരം വായുഗുണനിലവാര സൂചികയിൽ 50 പോയിന്റോ അതിൽ താഴെയോ നേടുന്ന നഗരങ്ങളാണ് മികച്ചവയുടെ പട്ടികയിൽ ഉൾപ്പെടുന്നത്.

തൃശൂരിന് 44 പോയിന്റുകളാണ് ലഭിച്ചത്. ഇന്നലെ വൈകീട്ട് വരെയുള്ള കണക്കുകൾ പ്രകാരമാണ് തൃശൂരിന് അഭിമാനകരമായ നേട്ടം സ്വന്തമായത്. രാജ്യ തലസ്ഥാനമായ ഡൽഹി അടക്കം രൂക്ഷമായ വായുമലിനീകരൻ പ്രതിസന്ധി അനുഭവിക്കുന്ന വേളയിലാണ് തൃശൂരിന് ഈ നേട്ടം സ്വന്തമായത് എന്നതാണ് ഏറ്റവും ശ്രദ്ധേയമായ കാര്യം.

തിരുവനന്തപുരത്തെ വായു ഗുണനിലവാര തോത് തൃപ്‌തികരം എന്ന ഗണത്തിലാണ് പെടുന്നത്. കേരളത്തിലെ മറ്റ് നഗരങ്ങളൊന്നും പട്ടികയിൽ ഇടം നേടിയിട്ടില്ല. നിലവിൽ തൃശൂർ നഗരത്തിലെ വായുവിൽ അപകടകരമായ തോതിൽ കാർബൺ മോണോക്സൈഡ്, നൈട്രജൻ ഡൈ ഓക്സൈഡ്, സൾഫർ ഡൈ ഓക്സൈഡ് എന്നിവ ഇല്ലെന്നാണ് റിപ്പോർട്ട് വ്യക്തമാക്കുന്നത്.

തൃശൂർ കോർപ്പറേഷൻ ഗ്രൗണ്ടിൽ നിന്നാണ് വായുഗുണനിലവാരം പരിശോധിച്ചത്. തിരക്കേറിയ സമയങ്ങളിൽ പോലും തൃശൂരിലെ വായുഗുണനിലവാരം ഭേദപ്പെട്ട നിലയിലാണെന്നാണ് റിപ്പോർട്ട് സൂചിപ്പിക്കുന്നത്. നിലവിൽ തൃശൂരിന് മുന്നിലായി പട്ടികയിൽ മൂന്ന് നഗരങ്ങൾ മാത്രമാണ് ഇടം പിടിച്ചിരിക്കുന്നത്.

കൂട്ടത്തിൽ ഏറ്റവും മുൻപന്തിയിൽ നിൽക്കുന്നത് നോർത്ത് ഈസ്‌റ്റ് മേഖലയിൽ നിന്നുള്ള മിസോറാമിലെ ഐസ്വാൾ ആണ്. മലിനീകരണം ഏറ്റവും കുറവുള്ള നഗരമായി കണക്കാക്കുന്ന ഐസ്വാളിന് ഇന്നലെ 26 പോയിന്റാണുള്ളത്. രണ്ടാമത് അസമിലെ നഗാവ്, മേഘാലയയിലെ ഷില്ലോങ്, കർണാടകയിലെ വിജയപുര എന്നിവയും തൃശൂരിന് മുന്നിലുണ്ട്.

ഏറ്റവും നല്ല വായു ഉള്ള നഗരങ്ങളുടെ പട്ടികയിൽ തൃശൂരിനൊപ്പം ചാമരാജ് നഗർ, കാഞ്ചീപുരം, കോലാർ, നൽബാരി, തഞ്ചാവൂർ, മംഗലാപുരം, ബാഗൽകോട്ട് എന്നിവയും ഇടം നേടിയിട്ടുണ്ട്. കർണാടകയിൽ നിന്നുള്ള നഗരങ്ങളാണ് പട്ടികയിൽ കൂടുതലുള്ളത് എന്നതാണ് ശ്രദ്ധേയം. നോർത്ത് ഈസ്‌റ്റും മലിനീകരണ തോതിൽ പിന്നിൽ നിൽക്കുന്ന മേഖലയാണ്.

അതേസമയം, ഏറ്റവും ഒടുവിൽ പുറത്തുവന്ന ദേശീയ വായുമലിനീകരണ സൂചിക പ്രകാരം രാജ്യത്ത് ഏറ്റവും മോശം സാഹചര്യമുള്ളത് തലസ്ഥാന നഗരമായ ഡൽഹിയിൽ തന്നേയാണ്. ഇന്ന് രാവിലെ രേഖപ്പെടുത്തിയ കണക്കുകൾ പ്രകാരം ഡൽഹിയിലെ വായുഗുണനിലവാരം വളരെ മോശം ഗണത്തിൽപ്പെടുന്നതാണ്. 379 പോയിന്റുകളാണ് രേഖപ്പെടുത്തിയിരിക്കുന്നത്.

English summary

Thrissur Bags Fourth Position In National Air Quality Index, Becomes Safest In Kerala.