തോല്‍പ്പെട്ടിയില്‍ അടക്കം രൂക്ഷമായ കാട്ടാന ശല്യം, ബത്തേരിയില്‍ യുവാവിനെ ആക്രമിച്ചു

Updated: Saturday, May 18, 2024, 1:47 [IST]

സുല്‍ത്താന്‍ ബത്തേരി: വയനാട്ടില്‍ കാട്ടാന ശല്യം രൂക്ഷമാകുന്നു. തോല്‍പ്പെട്ടിയില്‍ അടക്കം വ്യാപകമായ നാശനഷ്ടങ്ങളാണ് ഉണ്ടായിരിക്കുന്നത്. സുല്‍ത്താന്‍ ബത്തേരിയിലെ ചെതലയത്ത് കാട്ടാനയുടെ ആക്രമണത്തില്‍ യുവാവിന് ഗുരുതരമായി പരുക്കേറ്റു. കാട്ടുനായ്ക്ക കോളനയിലെ രമേശനിനാണ് പരുക്കേറ്റത്. ബന്ധുവീട്ടില്‍ നിന്ന് കോളനിയിലെ വീട്ടിലേക്ക് നടന്നുവരികയായിരുന്നു രമേശ്.

ഈ സമയം റോഡിന് സമീപത്തെ കൃഷിയിടത്തില്‍ നില്‍ക്കുകയായിരുന്നു കാട്ടാന ആക്രമിക്കുകയായിരുന്നു. ആന തുമ്പിക്കൈ കൊണ്ട് രമേശിനെ അടിച്ചിടുകയായിരുന്നു. വീഴ്ച്ചയില്‍ ഇയാളുടെ മൂന്ന് വാരിയെല്ലുകളാണ് ഒടിഞ്ഞത്. മുഖത്തും തോളെല്ലിനുമെല്ലാം സാരമായി പരുക്കേറ്റിട്ടുണ്ട്.

റോഡില്‍ വീണ രമേശിനെ ആന വീണ്ടും ആക്രമിക്കാന്‍ ശ്രമിച്ചെങ്കിലും ഈ സമയം ഓട്ടോറിക്ഷയിലെത്തിയ ഒരാള്‍ ഹോണ്‍ മുഴക്കിയതോടെ ആന പിന്തിരിയുകയായിരുന്നു. അതേസമയം തിരുനെല്ലി പഞ്ചായത്തിലെ തോല്‍പ്പെട്ടിയില്‍ കാട്ടാന ശല്യം രൂക്ഷമായിരിക്കുകയാണ്.

കഴിഞ്ഞ ദിവസം പുലര്‍ച്ചെയോടെയാണ് തോല്‍പ്പെട്ട ഗവണ ഹൈസ്‌കൂളിലെ കുട്ടികളുടെ കൃഷിയിടത്തിലെത്തിയ കാട്ടാന ഒരു മണിക്കൂറോളമാണ് ഇവിടെ ചെലവിട്ടത്. നൂറോളം വാഴകളാണ് കാട്ടാനകള്‍ നശിപ്പിച്ചത്. ഇവിടെയുള്ള ചുറ്റുമതിലും ആന തകര്‍ത്തു. തോല്‍പ്പെട്ടി, നരിക്കല്ല്, അരണപ്പാറ, ചേകാടി, വെള്ളറപ്രദേശങ്ങളിലാണ് കൂടുതലായും ആനശല്യമുള്ളത്.

വ്യാപകമായ കൃഷിനാശമാണ് കാട്ടാനകള്‍ കാരണം സംഭവിക്കുന്നത്. നെടുന്തന, കക്കേരി, നായ്ക്കട്ടി എന്നിവിടങ്ങളിലെ കാട്ടുനായ്ക്ക കോളനികളിലും ആനകള്‍ കൂട്ടമായി എത്തുന്നുണ്ട്. ഇവിടെ പ്രദേശവാസികള്‍ക്ക് പകല്‍ നേരങ്ങളില്‍ പോലും പുറത്തിറങ്ങാന്‍ കഴിയാത്ത സാഹചര്യമാണ് ഉള്ളത്.

കര്‍ണാടക വനാതിര്‍ത്തി കടന്നാണ് ഈ ആനകള്‍ എത്തുന്നത്. ചക്ക സീസണായതും ആനകള്‍ പ്രദേശത്ത് തമ്പടിക്കാന്‍ കാരണമായിട്ടുണ്ട്. വനംവകുപ്പ് പക്ഷേ ഇക്കാര്യത്തില്‍ കാര്യക്ഷമമായി ഇടപെടുന്നില്ലെന്ന് പരാതിയുണ്ട്. ബേഗൂര്‍, തോല്‍പ്പെട്ടി എന്നിങ്ങനെ രണ്ട് റേഞ്ചിന് കീഴിലാണ് ആനശല്യം രൂക്ഷമായിട്ടുള്ള പ്രദേശങ്ങള്‍. വനംവകുപ്പ് തമ്മിലുള്ള അതിര്‍ത്തി തര്‍ക്കങ്ങള്‍ ഫോറസ്റ്റ് ജീവനക്കാരുടെ നാട്ടുകാരും തമ്മിലുള്ള വാക്കേറ്റത്തിന് കാരണായിരിക്കുകയാണ്.