ഫുജൈറ,ബസിന് തീപിടിച്ചു,കുട്ടികള്‍ രക്ഷപ്പെട്ടു

By Meera Balan

Published: Monday, March 3, 2014, 11:33 [IST]

ഫുജൈറ: ഓടിക്കൊണ്ടിരുന്ന സ്‌കൂള്‍ ബസിന് തീപിടിച്ചു. ഡ്രൈവറും അധ്യാപികയും ചേര്‍ന്ന് ബസിലുണ്ടായിരുന്ന മുഴുവന്‍ കുട്ടികളെയും രക്ഷിച്ച് വന്‍ ദുരന്തം ഒഴിവാക്കി. 34 നഴ്‌സറി വിദ്യാര്‍ഥികളാണ് ബസില്‍ ഉണ്ടായിരുന്നത്. മാര്‍ച്ച് 2 ഞായറാഴ്ചയാണ് സംഭവം നടക്കുന്നത്. എമറാത്ത് അല്‍ യൂ ആണ് വാര്‍ത്ത റിപ്പോര്‍ട്ട് ചെയ്തത്.

ഞായറാഴ്ച രാവിലെ സ്‌കൂളിലേയ്ക്ക് കുട്ടികളുമായി സഞ്ചരിച്ച ബസാണ് അപകടത്തില്‍ പെട്ടത്. ബസില്‍ നിന്ന് പുക ഉയരുന്നത് ശ്രദ്ധയില്‍പെട്ട മറ്റ് യാത്രക്കാരാണ് ഡ്രൈവറെ വിവരം അറിയിച്ചത്. ഉടന്‍ തന്നെ ഡ്രൈവര്‍ വാഹനം നിര്‍ത്തുകയും അധ്യാപികയുടെ സഹായത്തോടെ ബസിലുണ്ടായിരുന്നു കുട്ടികളെ പുറത്തിറക്കുകയും ചെയ്തു. കുട്ടികള്‍ എല്ലാവരും പുറത്തിറങ്ങിയതിന് ശേഷമാണ് ബസില്‍ തീ ആളിപ്പടര്‍ന്നത്.

പുക ഉയരുന്നത് കണ്ടിരുന്നെങ്കിലും തന്റെ ബസില്‍ നിന്നാണെന്ന് കരുതിയില്ലെന്ന് ഡ്രൈവര്‍. മുന്നില്‍ പോയ കാറില്‍ നിന്നുയര്‍ന്ന പുകയാണെന്നാണ് ഇദ്ദേഹം കരുതിയത്. പുതുതായി പുറത്തിറക്കിയ ബസാണ് കത്തിയമര്‍ന്നതെന്ന് റിപ്പോര്‍ട്ട്. സുരക്ഷ ഉദ്യോഗസ്ഥര്‍ എത്തി ബസിലെ തീയണച്ചു.

ഡ്രൈവറുടേയും അധ്യാപികയുടേയും സമയോചിതമായ ഇടപെടല്‍ കൊണ്ടാണ് വന്‍ ദുരന്തം ഒഴിവായത്. പ്രദേശത്ത് ഇത്തരത്തിലുള്ള സംഭവങ്ങള്‍ മുന്‍പ് റിപ്പോര്‍ട്ട് ചെയ്യപ്പെട്ടിട്ടില്ലെന്നാണ് പൊലീസ് പറയുന്നത്. കുട്ടികള്‍ വന്‍ ദുരന്തത്തില്‍ നിന്ന് രക്ഷപ്പെട്ടതിന്‍റെ ആശ്വാസത്തിലാണ് അവരുടെ ബന്ധുക്കളും സ്കൂള്‍ അധികൃതരും

Published On March 3, 2014