ബഹറിനില്‍ ഉച്ചവിശ്രമ നിയമം നിലവില്‍ വന്നു

Updated: Thursday, July 2, 2015, 9:46 [IST]

മനാമ: രാജ്യത്ത് ചൂട് കൂടിയ സാഹചര്യത്തില്‍ പുറം ജോലികളില്‍ നിന്നും തൊഴിലാളികളെ മാറ്റി നിര്‍ത്തുവാന്‍ സര്‍ക്കാര്‍ കൊണ്ടു വന്ന ഉച്ച വിശ്രമ നിയമം ബഹറിനില്‍ ജുലൈ ഒന്നു മുതല്‍ നിലവില്‍ വന്നു. കമ്പനികള്‍ നിയമം കര്‍ശനമായി പാലിക്കണമെന്നും നിയമ ലംഘകര്‍ക്ക് കടുത്ത ശിക്ഷ അനുഭവിക്കേണ്ടി വരുമെന്നും മന്ത്രാലയം മുന്നറിയിപ്പു നല്‍കി.

അടുത്ത രണ്ടു മാസക്കാലമാണ് ഉച്ച വിശ്രമ നിയമം നടപ്പിലാക്കുന്നത്. വരും ദിവസങ്ങളില്‍ രാജ്യത്തിന്റെ വിവിധ ഭാഗങ്ങളില്‍ കര്‍ശന പരിശോധന നടത്താനും മന്ത്രാലയം പദ്ധതി തയ്യാറാക്കിയിട്ടുണ്ട്. ചൂടിന്റെ കാഠിന്യം കൂടുന്ന ഉച്ചയ്ക്ക് 12 മുതല്‍ വൈകീട്ട് 4 വരെയാണ് പുറം ജോലികളില്‍ ഏര്‍പ്പെടുന്നതില്‍ വിലക്ക് ഏര്‍പ്പെടുത്തിയിരിക്കുന്നത്.

തൊഴിലാളികളുടെ ആരോഗ്യവും സുരക്ഷയും ഉറപ്പു വരുത്തുന്നതിനു വേണ്ടിയാണ് ഗള്‍ഫ് രാജ്യങ്ങളില്‍ ഉച്ച വിശ്രമ നിയമം നടപ്പിലാക്കുന്നത്. മൂന്ന് മാസത്തെ തടവിനു പുറമെ ഓരോ തൊഴിലാളിയുടെ പേരിലും 500 മുതല്‍ 1000 ദിനാര്‍ വരെ പിഴ ഈടാക്കാനാണ് മന്ത്രാലയം തീരുമാനിച്ചിരിക്കുന്നതെന്ന് ബഹറിന്‍ തൊഴില്‍ മന്ത്രി ജമീല്‍ ഹുമൈദാന്‍ വ്യക്തമാക്കി.