ദുബായിലെ കനത്ത മഴയില്‍ കാര്‍ അപകടത്തില്‍പ്പെട്ട് 4 വയസ്സുകാരന്‍ കൊല്ലപ്പെട്ടു

ഷാര്‍ജ: ഞായറാഴ്ച രാവിലെ ദുബായ് എമിറേറ്റുകളില്‍ പെയ്ത കനത്ത മഴയില്‍ കാര്‍ അപകടത്തില്‍പ്പെട്ട് നാല് വയസ്സുകാരന്‍ കൊല്ലപ്പെട്ടു. ഏഴംഗ കുടുംബം സഞ്ചരിച്ചിരുന്ന കാറിന്റെ നിയന്ത്രണം നഷ്ടപ്പെട്ടാണ് അപകടം സംഭവിച്ചത്.

അപകടത്തില്‍ നാലു വയസ്സുകാരന്‍ സംഭവ സ്ഥലത്ത് വെച്ച് തന്നെ മരിക്കുകയായിരുന്നു. മറ്റ് ഏഴ് പേര്‍ക്കും ഗുരുതരമായ പരിക്ക് സംഭവിച്ചിട്ടുണ്ട്. കാര്‍ തിരിക്കാന്‍ ശ്രമിക്കുന്നതിനിടയിലാണ് അപകടം സംഭവിച്ചത്. മഴ കാരണം മുന്നിലുള്ള റോഡ് കാണാന്‍ പോലും സാധിക്കാത്ത അവസ്ഥയിലായിരുന്നു.

അപകടത്തില്‍പ്പെട്ട കാറില്‍ നിന്നും കുട്ടി തെറിച്ച് പുറത്ത് വീഴുകയായിരുന്നു. കാര്‍ കുട്ടിയുടെ ദേഹത്ത് കയറിയാണ് മരണം സംഭവിച്ചത്. മറ്റുള്ളവരെ അല്‍ ഖസ്സിമി ആശുപത്രിയില്‍ പ്രവേശിപ്പിച്ചു.

ശനിയാഴ്ച വൈകീട്ടോടെ ആരംഭിച്ച മഴ ഞായറാഴ്ച ശക്തി പ്രാപിക്കുകയായിരുന്നു. ദുബായ്, ഷാര്‍ജ, ഫുജൈറ, റാസല്‍ഖൈമ തുടങ്ങിയ സ്ഥലങ്ങള്‍ ഇപ്പോഴും വെള്ളക്കെട്ടിലാണ്.

English summary

Child killed, 7 family members hurt in Sharjah rain accident