ചികിത്സിയ്ക്കാന്‍ പണമില്ല 'മകനെ' കൊണ്ട് അച്ഛന്‍ ഭിക്ഷയെടുപ്പിച്ചു

ദുബായ്: ഏഴ് വയസുകാരനായ കുട്ടിയെ കൊണ്ട് ഭിക്ഷയെടുപ്പിച്ച യെമന്‍ യുവാവ് അറസ്റ്റില്‍. ബധിരനും മൂകനുമായ കുട്ടിയെ കൊണ്ട് ഭിക്ഷയെടുപ്പിയ്ക്കുകയായിരുന്നു 37കാരനായ യുവാവ്. കുട്ടി തന്റെ മകനാണെന്നാണ് യുവാവ് അവകാശപ്പെടുന്നത്. ഭിക്ഷയെടുപ്പിച്ചതല്ലെന്നും കുഞ്ഞിന്റെ ചികിത്സയ്ക്കായി പണം കണ്ടെത്തുന്നതിന് വേണ്ടിയാണ് ദുബായിലെത്തിയതെന്നും യുവാവ്.

കോടതിയില്‍ ഹാജരാക്കിയ യുവാവ് ദുബായില്‍ അനധികൃതമായി താമസിയ്ക്കുകയാണെന്ന് കണ്ടെത്തി. ദുബായിലെത്തിയാല്‍ കുഞ്ഞിന് മെച്ചപ്പെട്ട ചികിത്സ ലഭിയ്ക്കുമെന്നും ഒട്ടേറ സന്നദ്ധസംഘടനകള്‍ സഹായിക്കുമെന്നും താന്‍ കരുതിയതായി യുവാവ്. ഭിക്ഷയെടുക്കുന്നതിനിടെയാണ് കുട്ടിയെ പൊലീസ് കണ്ടെത്തിയത്. രാത്രിയാണ് കുഞ്ഞിനെ കൊണ്ട് ഭിക്ഷയെടുപ്പിച്ചിരുന്നതെന്ന് പൊലീസ്.

കേള്‍വി ശക്തിയും സംസാരശേഷിയും ഇല്ലാത്ത കുട്ടിയാണെന്നാണ് പൊലീസില്‍ പ്രതി പറഞ്ഞിരുന്നത്. എന്നാല്‍ വൈദ്യപരിശോധനയില്‍ കുട്ടിയ്ക്ക് കേള്‍വി ശക്തിയുണ്ടെന്ന് കണ്ടെത്തി. മാത്രമല്ല യുവാവ് കുട്ടിയുടെ പിതാവല്ലെന്നും കണ്ടെത്തി. കുട്ടികളെ കടത്തിക്കൊണ്ട് വന്ന ഭിക്ഷയെടുപ്പിയ്ക്കുന്നയാളാണ് യുവാവെന്നാണ് സംശയം. കേസില്‍ വിചാരണ തുടരും.

English summary

Father accused of forcing 'son' to beg in UAE