വിമാന നിരക്ക് വര്ധന: കേന്ദ്ര വ്യോമയാന മന്ത്രിക്ക് മുഖ്യമന്ത്രി കത്തയച്ചു
തിരുവനന്തപുരം: കേരളത്തിലേക്കുള്ള വിമാന നിരക്കുകള് കുതിച്ചുയരുന്ന സാഹചര്യത്തില് അടിയന്തര ഇടപെടല് ആവശ്യപ്പെട്ട് മുഖ്യമന്ത്രി പിണറായി വിജയന് കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യക്ക് കത്തയച്ചു. നിലവിലെ വിമാന നിരക്ക് മലയാളികളെ ഏറെ വലയ്ക്കുന്നതാണെന്ന് അദ്ദേഹം കത്തില് ചൂണ്ടിക്കാട്ടി.
ഓണം സീസണ് പ്രവാസികള് ധാരാളമായി കേരളത്തിലേക്ക് വരുന്ന സമയമാണ്. ആഘോഷങ്ങള്ക്കായി നാട്ടിലെത്താനാഗ്രഹിക്കുന്ന പ്രവാസികള്ക്കും ഇതര സംസ്ഥാനങ്ങളിലുള്ള മലയാളികള്ക്കും കനത്ത തിരിച്ചടിയാണ് ഈ നിരക്ക് വര്ധന. വിമാന നിരക്ക് ഉയരുന്നത് കാരണം പലരും കേരളത്തിലേക്കുള്ള യാത്രകള് മാറ്റിവെക്കുന്ന സാഹചര്യമുണ്ടെന്നും മുഖ്യമന്ത്രി കത്തില് വിശദീകരിച്ചു.
ആവശ്യമെങ്കില് ആഗസ്ത് 15 മുതല് സെപ്തംബര് 15 വരെയുള്ള കാലളവില് യുഎഇയില് നിന്ന് പ്രത്യേക ചാര്ട്ടേഡ് വിമാനം ഏര്പ്പെടുത്തുന്നതിന് നടപടികള് സ്വീകരിക്കണമെന്നും മുഖ്യമന്ത്രി ആവശ്യപ്പെട്ടു. വിമാന ടിക്കറ്റ് നിരക്ക് വിഷയം ചര്ച്ച ചെയ്യാന് കഴിഞ്ഞ ദിവസം മുഖ്യമന്ത്രിയുടെ അധ്യക്ഷതയില് യോഗം ചേര്ന്നിരുന്നു.
Click it and Unblock the Notifications
Sign in with Google