കാര് നമ്പറിനായി 60 കോടി, ഇപ്പോള് മൊബൈല് നമ്പറിനായി ചെലവിട്ടത്!! ഇയാള് വീണ്ടും ഞെട്ടിച്ചു!!
ഇന്ത്യന് ബിസിനസുകാരനായ ബല്വീന്ദര് സാഹ്നിയാണ് ഒരിക്കല്ക്കൂടി വാര്ത്തകളില് ഇടംനേടിയത്
ദുബായ്: ഇഷ്ടനമ്പറിനായി കോടികള് വാരിയെറിഞ്ഞ് ലോകത്തെ തന്നെ ഞെട്ടിച്ച ഇന്ത്യന് വ്യവസായി ബല്വീന്ദര് സാഹ്നി വീണ്ടും ഇതാവര്ത്തിച്ചു. ഇഷ്ടപ്പെട്ട മൊബൈല് നമ്പര് ലഭിക്കുന്നതിനു വേണ്ടി ലേലത്തില് എട്ടു കോടി പത്തു ലക്ഷം രൂപയാണ് ഇയാള് ചെലവഴിച്ചത്. 058-8888888 എന്ന നമ്പറാണ് എട്ടു കോടിയില് അധികം രൂപയ്ക്ക് സാഹ്നി കൈക്കലാക്കിയത്.
ഈ നമ്പര് സ്വന്തമാക്കുകയെന്ന ലക്ഷ്യത്തോടെ തന്നെയാണ് ലേലത്തിനു പോയത്. മറ്റൊരു നമ്പറും ആവശ്യവുമില്ല. ആഗ്രഹത്തിന് ഒരു പരിധിയും താന് വയ്ക്കാറില്ലെന്നും അദ്ദേഹം പറഞ്ഞു.
നേരത്തേ തന്റെ റോള്സ് റോയ്സ് കാറിന് ഇഷ്ട നമ്പര് ലഭിക്കുന്നതിനു വേണ്ടി 60 കോടി ചെവിട്ടതോടെയാണ് സാഹ്നി വാര്ത്തകളില് ഇടംപിടിക്കുന്നത്. പുതുതായി കൈക്കലാക്കിയ മൊബൈല് നമ്പര് സ്വകാര്യ ആവശ്യത്തിന് ഉപയോഗിക്കാനാവില്ലെന്ന് സാഹ്നി പറഞ്ഞു. നമ്പര് സ്വന്തമാക്കി മണികൂറുകള്ക്കകം നിരവധി കോളുകള് ഈ നമ്പറിലേക്കു വന്നതായും അദ്ദേഹം കൂട്ടിച്ചേര്ത്തു.