അടിച്ചു മോനെ! യുഎഇ ലോട്ടറി നറുക്കെടുപ്പില്‍ മലയാളി വനിതാ ഡോക്ടര്‍ക്ക് 10 മില്യണ്‍ ദിര്‍ഹം സമ്മാനം!

നിഷിതയുടെ പേരില്‍ ഭര്‍ത്താവെടുത്ത കൂപ്പണിനാണ് സമ്മാനം ലഭിച്ചിരിക്കുന്നത്.

അബുദാബി: യുഎഇ ലോട്ടറി നറുക്കെടുപ്പില്‍ വീണ്ടും മലയാളിക്ക് സമ്മാനം. കേരളത്തില്‍ നിന്നുള്ള ഡോക്ടറായ നിഷിത രാധാകൃഷ്ണ പിള്ളയ്ക്കാണ് 10 മില്യണ്‍ ദിര്‍ഹം സമ്മാനം ലഭിച്ചത്. 17.5 കോടി രൂപ നറുക്കെടുപ്പിലൂടെ ലഭിച്ചതിന്റെ ഞെട്ടലിലാണ് നിഷിതയും കുടുംബവും. നിഷിതയുടെ പേരില്‍ ഭര്‍ത്താവെടുത്ത കൂപ്പണിനാണ് സമ്മാനം ലഭിച്ചിരിക്കുന്നത്.

അച്ഛന്‍ വിളിച്ചു പറഞ്ഞപ്പോഴാണ് ലോട്ടറി നറുക്കെടുപ്പില്‍ സമ്മാനം ലഭിച്ചെന്ന കാര്യം അറിയുന്നത്, അച്ഛനെയാണ് അവര്‍ ആദ്യം സമ്മാനം ലഭിച്ച വിവരമറിയിച്ചത്. എന്നാല്‍ ആരെങ്കിലും കബളിപ്പിക്കാന്‍ വേണ്ടി വിളിച്ചാതാകുമെന്നാണ് ആദ്യം കരുതിയതെന്നും പിന്നീടാണ് സംഭവം സത്യമാണെന്ന് മനസിലായതെന്നും നിഷിത പറഞ്ഞതായി ലൈവ് മിന്റ് റിപ്പോര്‍ട്ട് ചെയ്യുന്നു. ദുബായില്‍ ഡോക്ടറായി പ്രാക്ടീസ് ചെയ്തിരുന്ന നിഷിത ഇപ്പോള്‍ ഭര്‍ത്താവിനോടൊപ്പം അമേരിക്കയിലാണ്.

ലോട്ടറിയിലെ ഏറ്റവും ഉയര്‍ന്ന സമ്മാനത്തുകയായ 10 മില്യണ്‍ ദിര്‍ഹം സ്വന്തമാക്കുന്ന രണ്ടാമത്തെയാളാണ് നിഷിത. നിഷിതയുടെ ഭര്‍ത്താവ് സ്ഥിരമായി ലോട്ടറി നറുക്കെടുപ്പില്‍ പങ്കെടുത്തിരുന്നു. നിഷിതയുടെ പേരില്‍ ഭര്‍ത്താവെടുത്ത കൂപ്പണിനാണ് സമ്മാനം ലഭിച്ചിരിക്കുന്നത്. അന്‍പതോളം കൂപ്പണുകളാണ് ഭര്‍ത്താവ് നിഷിതയുടെ പേരില്‍ ഓണ്‍ലൈനിലൂടെ സ്വന്തമാക്കിയിരുന്നത്.

സ്‌കോളര്‍ഷിപ്പ് ലഭിച്ചതിനെ തുടര്‍ന്നാണ് നിഷിതയും കുടുംബവും അമേരിക്കയിലേക്ക് പോയത്. അമേരിക്കയിലാണെങ്കിലും യുഎഇയിലാണ് തങ്ങള്‍ സന്തോഷത്തോടെ ജോലി ചെയ്തതെന്നും, എത്രയും പെട്ടെന്ന് യുഎഇയിലേക്ക് തന്നെ മടങ്ങാനുള്ള പദ്ധതിയുണ്ടെന്നും നിഷിത പറഞ്ഞു. സമ്മാനത്തുക ഉപയോഗിച്ച് എന്തുചെയ്യുമെന്ന കാര്യം ഇതുവരെ തീരുമാനിച്ചിട്ടില്ലെന്നും അവര്‍ വ്യക്തമാക്കി. നറുക്കെടുപ്പില്‍ നേരത്തെ മലയാളി യുവാവായ ശ്രീരാജ് കൃഷ്ണനും സമ്മാനം ലഭിച്ചിരുന്നു. 7 മില്യണ്‍ ദിര്‍ഹമായിരുന്നു അദ്ദേഹത്തിന് ലഭിച്ചത്.

English summary

Indian doctor from Kerala wins over Rs17.5 crore lottery in UAE