ദുബായ് ഷോപ്പിംഗ് ഫെസ്റ്റിവലില് നിന്ന് ഇന്ത്യക്കാരന് 1കിലോ സ്വര്ണം സമ്മാനം
ദുബായ്: അവധിക്കാലം ആഘോഷിയ്ക്കാന് ദുബായിലെത്തിയ ഇന്ത്യക്കാരനായ യുവാവിന് ദുബായ് ഷോപ്പിംഗ് ഫെസ്റ്റിലിന്റെ ഭാഗമായ നറുക്കെടുപ്പിലൂടെ ഒരു കിലോ സ്വര്ണം സമ്മാനമായി ലഭിച്ചു. കരണ് പിതാനി (21) എന്ന യുവാവിനാണ് ഒരു കിലോ സ്വര്ണം സമ്മാനമായി ലഭിച്ചത്.
ദുബായ് ഷോപ്പിംഗ് ഫെസ്റ്റിവല് ഉള്പ്പടെയുള്ളവ കാണുന്നതിനാണ് ഗുജറാത്ത് സ്വദേശിയായ കരണ് ദുബായില് എത്തുന്നത്. സഹോദരിയുടെ വിവാഹമായതിനാല് മീന ജൂവല്ലറിയില് നിന്നും രണ്ടായിരം ദിര്ഹത്തിന് കരണ് സ്വര്ണം വാങ്ങി. തുടര്ന്ന് ലഭിച്ച സമ്മാന കൂപ്പണുകള് പൂരിപ്പിച്ച് ബോക്സില് നിക്ഷേപിച്ചു.
ഞായറാഴ്ചയാണ് യുവാവിനെ ഞെട്ടിച്ച് കൊണ്ട് നറുക്കെടുപ്പ് സമ്മാനം ലഭിയ്ക്കുന്നത്. സമ്മാനം ലഭിച്ചുവെന്ന ഫോണ്കോള് തനിയ്ക്ക് വിശ്വസിയ്ക്കാനായില്ലെന്ന് കരണ് പറയുന്നു. ദുബായ് കാണാനെത്തിയ തനിയ്ക്ക് സമ്മാനം ലഭിച്ചതില് സന്തോഷമുണ്ടെന്നും ദുബായ് സ്വപ്നങ്ങളുടെ നഗരമാണെന്നും കരണ് പറഞ്ഞു.
എന്നാല് ഇത്രയും സ്വര്ണം ഇന്ത്യയിലേയ്ക്ക് കൊണ്ടു വരുമ്പോള് അതിന് എത്രത്തോളം തുക നികുതി നല്കണം എന്നതിനെപ്പറ്റിയുള്ള ആശങ്കയിലാണ് ബിസിനസുകാരന് കൂടിയായ ഈ യുവാവ് . അധികം വൈകാതെ കരണ് നാട്ടിലെത്തും .