ഡിഎസ്എഫില് മലയാളികള്ക്ക് മെഗാസമ്മാനം
ദുബായ്: ദുബായ് ഷോപ്പിംഗ് ഫെസ്റ്റിവല് മെഗാസമ്മാനം രണ്ട് മലയാളികള്ക്ക്. രണ്ട് കാറുകളും (ക്യുഎക്സ് 60, ജി25) ഒരു ലക്ഷം ദിര്ഹവുമാണ് സമ്മാനം. കണ്ണൂര് സ്വദേശികളായ നൗഷാദ് മാവുള്ള പറമ്പത്ത്, രാജേഷ് മോടോകണ്ടിയില് എന്നിവര്ക്കാണ് സമ്മാനം ലഭിച്ചത്. അടുത്ത സുഹൃത്തുക്കളായ ഇവര് ഒരുമിച്ച് പണം നല്കിയാണ് 250 ദിര്ഹം നല്കി സമ്മാന കൂപ്പണ് വാങ്ങിയത്.
സമ്മാനം ലഭിച്ചെന്ന വാര്ത്ത രാജേഷിനും നൗഷാദിനും അവിശ്വസനീയമായിരുന്നു. ഇരുവരും കൂടി പണം നല്കിയാണ് നൗഷാദിന്റെ പേരില് കൂപ്പണ് വാങ്ങിയത്. ഒന്പത് വര്ഷമായി ഇവര് ദുബായില് എത്തിയിട്ട്. നാട്ടിലായാലും നൗഷാനും രാജേഷും എപ്പോഴും ഒരുമിച്ചാണ്. ദുബായില് ഒരു മുറിയിലാണ് ഇവര് താമസിയ്ക്കുന്നത്.
ആത്മാര്ത്ഥ സൗഹൃദത്തിന് ലഭിച്ച സമ്മാനമാണിതെന്നാണ് നൗഷാദിന്റെ പ്രതികരണം. ദുബായില് ഒരേ ഷോപ്പിലെ ജീവനക്കാരാണ് ഈ സുഹൃത്തുക്കള്. സമ്മാനം ലഭിച്ചകാര്യം നാട്ടില് ബന്ധുക്കളെ അറിയിച്ചെങ്കിലും തുക വെളിപ്പെടുത്തിയിട്ടില്ലെന്ന് നൗഷാദ്. സമ്മാനമായി ലഭിച്ച കാറുകള് വില്ക്കാനാണ് ഇവരുടെ തീരുമാനം. അതിന് ശേഷം മുഴുവന് പണവും ഉപയോഗിച്ച് ഒരു ബിസിനസ് തുടങ്ങണം.
സമ്മാനടിക്കറ്റിന് 250 ദിര്ഹമാണ് വില. സ്വര്ണക്കടകള്, പ്രധാനപ്പെട്ട ഷോപ്പിംഗ് മാളുകള്, പെട്രോള് സ്റ്റേഷനുകള്, ഗ്ളോബല് വില്ലേജുകള് എന്നിവയില് നിന്ന് ടിക്കറ്റ് വാങ്ങാം.