സലാലയില്‍ ഗര്‍ഭിണിയായ മലയാളി നഴ്സ് കൊല്ലപ്പെട്ട നിലയില്‍, പാകിസ്താനി അറസ്റ്റില്‍

മസ്‌ക്കറ്റ്: സലാലയില്‍ മലയാളി നഴ്‌സിനെ കൊല്ലപ്പെട്ട നിലയില്‍ കണ്ടെത്തി. അങ്കമാലി കറുകുറ്റി സ്വദേശി ചിക്കു റോബര്‍ട്ട് (28) ആണ് മരിച്ചത്. ഫ്‌ളാറ്റിലെ മുറിയില്‍ രക്തത്തില്‍ കുളിച്ച് കിടക്കുന്ന നിലയിലായിരുന്നു മൃതദേഹം. വെട്ടേറ്റോ കുത്തേറ്റോ മരിച്ചതാണെന്ന് സൂചന. മസ്‌ക്കറ്റിലെ ഇന്ത്യന്‍ കോണ്‍സുലര്‍ ആണ് വിവരം സ്ഥിരീകരിച്ചത്.

രാത്രി പത്ത് മണിയ്ക്ക് ഡ്യൂട്ടിയ്ക്ക് പോകേണ്ടതായിരുന്നു. എന്നാല്‍ പത്ത് മണി കഴിഞ്ഞിട്ടും ചിക്കുവിനെ കാണാതായതോടെ ഭര്‍ത്താവ് അപ്പാര്‍ട്ട്‌മെന്റില്‍ എത്തി. രക്തത്തില്‍ കുളിച്ച നിലയില്‍ യുവതിയെ കണ്ടെത്തുകയായിരുന്നു.യുവതി അഞ്ചുമാസം ഗര്‍ഭിണിയായിരുന്നു.

സുല്‍ത്താന്‍ ഖാബൂസ് ആശുപത്രിയിലേയ്ക്ക് മൃതദേഹം മാറ്റിയതായും ഇന്ത്യന്‍ കോണ്‍സുലര്‍ മന്‍പ്രീത് സിംഗ് പറഞ്ഞു. ആശുപത്രിയിലെത്തിയപ്പോഴേയ്ക്കും യുവതിയുടെ മരണം സ്ഥിരീകരിച്ചിരുന്നു. സംഭവവുമായി ബന്ധപ്പെട്ട് പാകിസ്താനി അറസ്റ്റിലായതായി സ്ഥിരീകരിയ്ക്കാത്ത റിപ്പോര്‍ട്ടുകളുണ്ട്. കൂടുതല്‍ വിവരങ്ങള്‍ അറിവായി വരുന്നതേയുള്ളൂവെന്ന് ഇന്ത്യന്‍ കോണ്‍സുലേറ്റും പറഞ്ഞു.

English summary

Malayali nurse found dead in Oman.