ഖത്തര്‍ അമീര്‍- ഫ്രഞ്ച് പ്രസിഡന്റ് കൂടിക്കാഴ്ച

Updated: Monday, May 4, 2015, 9:52 [IST]

ദോഹ: ഇന്ന് (തിങ്കളാഴ്ച) ദോഹയിലെത്തുന്ന ഫ്രഞ്ച് പ്രസിഡന്റ് ഫ്രാന്‍സ്വ ഒലാദ് ഖത്തര്‍ അമീര്‍ തമീം ശൈഖ് തമീം ബിന്‍ ഹമദ് അല്‍താനിയുമായി കൂടിക്കാഴ്ച നടത്തും. ഫ്രാന്‍സില്‍ നിന്നും 2570 കോടി റിയാലിന്റെ റാഫേല്‍ ഫൈറ്റര്‍ ജെറ്റുകള്‍ വാങ്ങുന്നതുമായുള്ള കരാറില്‍ ഇരു രാജ്യങ്ങളും തമ്മില്‍ ഒപ്പ് വെക്കുമെന്ന് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു. ഫ്രഞ്ച് വിദേശ കാര്യ മന്ത്രി ലോറന്റ് ഫാബിയാസും പ്രസിഡന്റ്‌നെ അനുഗമിക്കുന്നുണ്ട്.

ലോകത്തിലെ ശക്തരായ രാജ്യങ്ങളിലൊന്നായ ഫ്രാന്‍സുമായുള്ള ഖത്തറിന്റെ കൂടിക്കാഴ്ച അന്താരാഷ്ട്ര മാധ്യമങ്ങള്‍ ഏറെ പ്രാധാന്യത്തോടെയാണ് നോക്കിക്കാണുന്നത്. ഖത്തറുമായുള്ള സൈനീക വിമാന ഇടപാടിനെ കുറിച്ച് ഏതാനും ദിവസങ്ങള്‍ക്ക് മുമ്പ് തന്നെ വാര്‍ത്തകള്‍ വന്നിരുന്നു. അറബ് ഉച്ചകോടിയില്‍ പങ്കെടുക്കാന്‍ സൗദിയിലെത്തുന്ന ഫ്രാന്‍സ്വ ഒലാദ് ദോഹയില്‍ എത്തി അമീറുമായി കൂടിക്കാഴ്ച നടത്തുമെന്നും വാര്‍ത്തകളില്‍ സൂചനയുണ്ടായിരുന്നു.

ഫ്രാന്‍സിലേക്ക് ഖത്തറില്‍ നിന്നുള്ള നിക്ഷേപം വര്‍ദ്ധിപ്പിക്കാനും ഇരുരാജ്യങ്ങളും തമ്മിലുള്ള തന്ത്രപരമായ ബന്ധം കൂടുതല്‍ മെച്ചപ്പെടാനും സന്ദര്‍ശനം വഴിവെക്കുമെന്ന് ലോറന്റ് ഫാബിയാസ് മാധ്യമ പ്രവര്‍ത്തകരോട് വ്യക്തമാക്കി. ഫ്രഞ്ച് കമ്പനിയായ ദസാള്‍ട്ട് ഏവിയേഷനാണ് റാഫേല്‍ ഫൈറ്റര്‍ ജെറ്റുകള്‍ നിര്‍മ്മിക്കുന്നത്.