മുസ്ലിം ബ്രദര്‍ഹുഡ് പ്രവര്‍ത്തകര്‍ കുറ്റക്കാരെന്ന്

യുഎഇ: മുസ്ലിം ബ്രദര്‍ഹുഡുമായി ബന്ധമുണ്ടെന്ന കേസില്‍ പിടിയിലായ 30 പേര്‍ കുറ്റക്കാരാണെന്ന് ഫെഡറല്‍ സുപ്രീം കോടതി കണ്ടെത്തി. കേസില്‍ 24 പേര്‍ക്കെതിരെ വിധി പുറപ്പെടുവിച്ചു. മൂന്ന് മാസം മുതല്‍ അഞ്ച് വര്‍ഷം വരെ തടവ് ശിക്ഷയ്ക്കാണ് വിധിച്ചത്. മുസ്ലീം ബ്രദര്‍ഹുഡിന്റെ പ്രവര്‍ത്തനങ്ങള്‍ യുഎഇയിലും നടത്തുന്നതിനായി സംഘടന രൂപീകരിയ്ക്കാന്‍ ശ്രമിച്ചു എന്നതിനാണ് ഇവരെ അറസ്റ്റ് ചെയ്തത്

കേസില്‍ മുഴുവന്‍ പ്രതികളെയും വിസ്തരിയ്ക്കുക്കയും സാക്ഷിമൊഴി രേഖപ്പെടുത്തുകയും ചെയ്തിരുന്നു. വിദേശികളായ പ്രതികളെ അവരുടെ തടവ് ശിക്ഷ പൂര്‍ത്തിയാക്കിയതിന് ശേഷം നാട് കടത്തും.

കേസില്‍ മുഖ്യപ്രതിയായ മെദാത്ത് രാജാദ് അബ്ദെള്ള അമ്മറിന് അഞ്ച് വര്‍ഷത്തെ ശിക്ഷയ്ക്ക് വിധിച്ചു. സലാഹ് ഫരാജ് ദൈഫള്ളഅല്‍ മല്‍ഹാതാനി, സലാഹ് മുഹമ്മദ് റിസാഖ് അല്‍ മഷാദ്, ഇബ്രാഹിം അബേല്‍ അസീസ് ഇബ്രാഹിം അഹമ്മദ്, മുരാദ് മുഹമ്മദ് ഹമീദ് ഒത്മാന്‍ ബതാവി, ഒത്മാന്‍ അബ്ദേല്‍ റഹ്മാന്‍ സുലിമാന്‍ മക്തീസ്, അല്‍ സയ്യീദ് അവാദ് ഹിഫ്‌നി മൗസ, ഹമാദ അബ്ദെല്‍ അസീസ് അബ്ദെല്ഡ മഖ്‌സൂദ്, സലേഹ് മുഹമ്മദ് സലേഹ് അല്‍ ധുഫൈത്രി എന്നിവര്‍ക്ക് നാല് വര്‍ഷത്തെ തടവ് ശിക്ഷയാണ് വിധിച്ചത്.പ്രതികളുടെ പ്രവര്‍ത്തനം സമൂഹത്തിന്റെ സുരക്ഷയെ ബാധിയ്ക്കുമെന്ന് പ്രോസിക്യൂഷന്‍ കോടതിയെ അറിയിച്ചു.