സൗദി: ഒളിച്ചോടാന് ശ്രമിച്ച ഭാര്യ ഭര്ത്താവിന്റെ കണ്മുന്നില് വീണുമരിച്ചു
സൗദി: ഒളിച്ചോടാന് ശ്രമിച്ച ഭാര്യ വീണ് മരിച്ചു. ഭര്ത്താവിന്റെ പീഡനങ്ങളില് നിന്ന് രക്ഷപ്പെടാന് ശ്രമിച്ച 20 വയസുകാരിയ്ക്കാണ് ദാരുണ അന്ത്യം ഉണ്ടായത്. സൗദിയിലെ ജാസന് പ്രവിശ്യയിലാണ് സംഭവം. 20കാരിയായ മൊറോക്കന് യുവതിയാണ് സ്വദേശിയായ ഭര്ത്താവില് നിന്നും രക്ഷപ്പെടാന് ശ്രമിച്ചത്.
ഭര്ത്താവില് നിന്നും കഠിനമായ ശാരീരിക പീഡനങ്ങളാണ് യുവതിയ്ക്ക് ഏറ്റുവാങ്ങേണ്ടി വന്നത്. ഇതിനെതുടര്ന്നാണ് യുവതി രക്ഷപ്പെടാന് ശ്രമിച്ചതും ഇത് മരണത്തില് കലാശിച്ചതും. പീഡനങ്ങള്ക്കെതിരെ പ്രതികരിയ്ക്കാന് തുടങ്ങിയതോടെ ഭര്ത്താവ് യുവതിയെ പൂട്ടിയിട്ടു.
എങ്ങനെയും വീട്ടില് നിന്നും ഭര്ത്താവില് നിന്നും രക്ഷപ്പെടണമെന്ന് യുവതി തീരുമാനിയ്ക്കുകയായിരുന്നു. പൂട്ടിയിട്ട മുറി തുറന്ന സമയത്താണ് താമസിയ്ക്കുന്ന കെട്ടിടത്തിന്റെ രണ്ടാം നിലയില് നിന്നും രക്ഷപ്പെടാനെന്നോണം യുവതി താഴേയ്ക്ക് ചാടിയത്. എന്നാല് നട്ടെല്ല് പൊട്ടുകയും ഗുരുതരമായ പരിക്കേല്ക്കുകയും ചെയ്തു.
രണ്ട് ദിവസത്തിലധികം യുവതി ആശുപത്രിയിലായിരുന്നു. തിങ്കളാഴ്ച ആരോഗ്യനില വഷളായതിനെത്തുടര്ന്ന് മരിയ്ക്കുകയും ചെയ്തു. ആശുപത്രിയില് വച്ച് മൊറോക്കന് എംബസി ഉദ്യോഗസ്ഥര് യുവതിയ സന്ദര്ശിച്ചു. യുവതിയെ പീഡിപ്പിയ്ക്കുകയും മരണത്തിന് പോലും ഇടയാക്കുകയും ചെയ്ത ഭര്ത്താവിനെതിരെ നിയമനടപടി സ്വീകരിയ്ക്കുമെന്ന് അധികൃതര് അറിയിച്ചു.