കമ്പനി ജോലി വിട്ട് ബംഗളൂരുവില്‍ സമൂസ വില്‍പ്പനയിലേക്ക്: ഇന്ന് മാസ വരുമാനം 45 കോടി

Updated: Thursday, March 16, 2023, 14:03 [IST]

രുചിയിലും കൂട്ടുകളിലും പ്രദേശങ്ങള്‍ക്ക് അനുസരിച്ച് വ്യത്യാസം ഉണ്ടെങ്കിലും ഇന്ത്യക്കാരുടെ ജനപ്രിയ ലഘുഭക്ഷണങ്ങളില്‍ ഒന്നാണ് സമൂസ. താരതമ്യേന കുറഞ്ഞ വിലയില്‍ തട്ടുകടകളിലും റെയില്‍വേ സ്റ്റേഷനുകളിലുമൊക്കെ ധാരാളമായി സമൂസ ലഭിക്കുന്നത്. സമൂസ വിറ്റ് ജീവിതം മുന്നോട്ട് കൊണ്ടുപോവുന്ന നിരവധി ആളുകള്‍ നമുക്ക് ചുറ്റുമുണ്ട്. ഇവരെല്ലാം തന്നെ വലിയ തോതിലുള്ള വരുമാനം ഇല്ലാതെ ചെറിയ ലാഭത്തില്‍ മാത്രം പ്രവർത്തിച്ച് പോവുന്നവരാണ്. എന്നാല്‍ ഇതില്‍ നിന്നും വ്യത്യസ്തമായ ഒരു കഥയാണ് ബെംഗളൂര ആസ്ഥാനായി പ്രവർത്തിക്കുന്ന ദമ്പതികള്‍ക്ക് പറയാനുള്ളത്.

നിധി സിങ്ങും ഭർത്താവ് ശിഖർ വീർ സിംഗുമാണ് കഥയിലെ താരങ്ങള്‍. ഇരുവരും 2016-ലാണ് ബെംഗളൂരുവിൽ തങ്ങളുടെ സമൂസ ഷോപ്പ് ആരംഭിക്കുന്നത്. ഉയർന്ന ശമ്പളമുള്ള കോർപ്പറേറ്റ് ജോലിക്ക് പകരം സമോസ വിൽക്കാൻ ഈ രണ്ട് വിദ്യാസമ്പന്നരും തീരുമാനിച്ചപ്പോള്‍ സംശയത്തോടെ നോക്കിയവരും എതിർപ്പ് ഉന്നയിച്ചവരും നിരവധിയായിരുന്നു. എന്നാല്‍ ഇപ്പോൾ അവർ കോർപ്പറേറ്റ് ജോലിയേക്കാള്‍ കൂടുതൽ സമ്പാദിക്കുന്നു എന്നുവെന്നതാണ് യാഥാർത്ഥ്യം.

മാധ്യമ റിപ്പോർട്ടുകൾ പ്രകാരം, 'സമൂസ' വിറ്റ് ദമ്പതികൾ പ്രതിദിനം 12 ലക്ഷം രൂപയാണ് സമ്പാദിക്കുന്നത്. കച്ചവടത്തിനായി ഒരു വലിയ അടുക്കളയുടെ സ്ഥലം ആവശ്യമാണെന്ന് തോന്നിയപ്പോൾ, ഇരുവരും അവരുടെ അപ്പാർട്ട്മെന്റ് വിറ്റ് ആ പണം കൊണ്ട് ബെംഗളൂരുവിൽ ഒരു ഫാക്ടറി വാടകയ്‌ക്കെടുത്തായിരുന്നു പ്രവർത്തനം. ഹരിയാന സ്വദേശികളായ ദമ്പതികള്‍ താമസിയാതെ 80 ലക്ഷം രൂപ മുടക്കി ഒരു വലിയ അടുക്കള നിർമ്മിക്കുകയും പ്രവർത്തനം വിപുലീകരിക്കുകയും ചെയ്തു.

'സമോസ സിംഗ്' എന്നപേരില്‍ ആരംഭിച്ച സ്ഥാപനം പതിയെ ജനങ്ങളുടെ ഇഷ്ട ഭക്ഷണ കേന്ദ്രമായി മാറുന്നതാണ് പിന്നീട് കണ്ടത്. റിപ്പോർട്ടുകൾ പ്രകാരം, സമോസ സിംഗ് പ്രതിമാസം 30,000 സമൂസകൾ വിൽക്കുന്നു, അവയുടെ വിറ്റുവരവ് 45 കോടി രൂപയാണ്, അതായത് പ്രതിദിനം ഏകദേശം 12 ലക്ഷം രൂപ.

കുരുക്ഷേത്ര സർവകലാശാലയിൽ നിന്ന് ബയോടെക്‌നോളജിയിൽ ബി-ടെക് പഠിക്കുന്നതിനിടെയാണ് ശിഖറും നിധിയും ആദ്യമായി കണ്ടുമുട്ടുന്നത്. ആ കണ്ടുമുട്ടല്‍ പ്രണയത്തിലേക്കും പിന്നീട് വിവാഹത്തിലേക്കും നയിച്ചു. ഹൈദരാബാദിൽ നിന്ന് എംടെക്കിന് ശേഷം ചേർന്ന ബയോകോണിൽ പ്രിൻസിപ്പൽ സയന്റിസ്റ്റായിരിക്കെയാണ് ശിഖർ ജോലി ഉപേക്ഷിച്ചതെന്നും റിപ്പോർട്ട് വ്യക്തമാക്കുന്നു. ഗുരുഗ്രാം ആസ്ഥാനമായുള്ള ഫാർമ കമ്പനിയിൽ ബിസിനസ് ഡെവലപ്‌മെന്റ് അസോസിയേറ്റ് ജോലി ചെയ്യുമ്പോഴായിരുന്നു നിധി ജോലി ഉപേക്ഷിക്കുന്നത്.

Vastu Tips: സൂര്യന്‍ അസ്തമിച്ചതിന് ശേഷം ഇക്കാര്യങ്ങള്‍ ചെയ്യാനേ പാടില്ല, ചെയ്താല്‍...