'ഈ ടിപ്പൊന്നും പോര', കലിപ്പിൽ ഡെലിവെറിക്കെത്തിയ യുവതി, ഭക്ഷണം നൽകാതെ പോയി, വൈറൽ വീഡിയോ

Updated: Wednesday, March 8, 2023, 23:54 [IST]

ഭക്ഷണം വീട്ടില്‍ ഡെലിവറി ചെയ്യുന്നവര്‍ക്ക് ടിപ് കൊടുക്കുന്നത് പലരും ചെയ്യുന്ന മര്യാദയാണ്. കൊടുക്കുന്ന വ്യക്തിയാണ് എത്ര ടിപ് എന്ന് തീരുമാനിക്കുക. ടിപ് പോര എന്ന് ആരും പരാതി പറയാറില്ല. എന്നാല്‍ ഇവിടെ സംഭവിച്ചിരിക്കുന്നത് അതാണ്. ടിപ് കുറവാണെന്ന് പറഞ്ഞ് പ്രശ്‌നമുണ്ടാക്കുക മാത്രമല്ല ഇവിടെ ഡെലിവറിക്ക് എത്തിയ ആള്‍ ചെയ്തിരിക്കുന്നത്, ഭക്ഷണം കൊടുക്കാതെ തിരിച്ച് പോവുക കൂടിയാണ്. സംഭവത്തിന്റെ വീഡിയോ സോഷ്യല്‍ മീഡിയയില്‍ ചര്‍ച്ചയായിരിക്കുകയാണ്.

ഭക്ഷണം ഡെലിവര്‍ ചെയ്യാന്‍ എത്തിയത് ഒരു യുവതിയാണ്. ഇവര്‍ വീട്ടില്‍ എത്തി ഡോര്‍ ബെല്‍ അടിക്കുന്നത് മുതലാണ് വീഡിയോയിലുളള ദൃശ്യങ്ങള്‍. ബെല്ലടിച്ച ശേഷം ഇവര്‍ വീട്ടിലുളള വ്യക്തിയോട് പുറത്തേക്ക് വരണമെന്നും തനിക്ക് സംസാരിക്കാനുണ്ടെന്നും പറയുന്നു. താന്‍ ഇവിടേക്ക് ഭക്ഷണവുമായി വന്നത് 40 മിനുട്ട് വണ്ടി ഓടിച്ചാണ് എന്നും അതിനാല്‍ ഇപ്പോള്‍ തന്നെ ടിപ് പോര എന്നുമാണ് ഇവരുടെ പരാതി. 8 ഡോളര്‍ അതായത് 650 രൂപയായിരുന്നു യുവതിക്ക് നല്‍കിയ ടിപ്.

ഓര്‍ഡര്‍ ചെയ്ത ഭക്ഷണത്തിന് വേണ്ടി തനിക്ക് ലോംഗ് ഐലന്‍ഡ് വരെ പോകേണ്ടി വന്നുവെന്നും അതിന് ശേഷം ഡെലിവറിക്കായി സ്മിത് ടൗണിലേക്ക് 40 മിനുറ്റ് യാത്ര ചെയ്താണ് എത്തിയത് എന്നും യുവതി പറയുന്നത് കേള്‍ക്കാം. എന്നാല്‍ സ്മിത്ത് ടൗണിലേക്ക് അത്രയും ദൂരം യാത്ര ഇല്ലെന്ന് വീട്ടുകാരന്‍ മറുപടി നല്‍കുന്നു. നിങ്ങള്‍ വണ്ടി ഓടിച്ച് നോക്കണമെന്നും അപ്പോള്‍ ദൂരം മനസ്സിലാകുമെന്നും താന്‍ പന്ത്രണ്ടര മൈല്‍ യാത്ര ചെയ്തുവെന്നും യുവതി പറയുന്നു.

നിങ്ങള്‍ എന്തൊക്കെയാണ് പറയുന്നതെന്നും താന്‍ 8 ഡോളര്‍ ടിപ് നല്‍കിയിട്ടുണ്ടെന്നും വീട്ടുടമ പറഞ്ഞതോടെയാണ് യുവതി ഭക്ഷണവും എടുത്ത് ഇറങ്ങിപ്പോയത്. താന്‍ ഭക്ഷണം തിരിച്ച് ഏല്‍പ്പിക്കാന്‍ പോവുകയാണ് എന്നും പറഞ്ഞായിരുന്നു യുവതി പോയത്. ഡ്രൈവര്‍ മാന്‍ എന്ന യൂട്യൂബ് ചാനലില്‍ ആണ് ഈ വീഡിയോ പോസ്റ്റ് ചെയ്തിരിക്കുന്നത്. ഇതുവരെ 1.5 മില്യണ്‍ പേര്‍ ഈ വീഡിയോ കണ്ടിട്ടുണ്ട്.