Viral video: ജീവനറ്റ ഇണയുടെ അരികിൽ നിന്നുമാറാതെ പക്ഷി; പിന്നീടുള്ള രംഗം നിങ്ങളുടെ ഹൃദയം തകർക്കും

Updated: Friday, June 23, 2023, 15:18 [IST]

മറ്റൊരാൾക്ക് പറഞ്ഞ് മനസ്സിലാക്കി കൊടുക്കാൻ പറ്റാത്ത ചില വികാരങ്ങൾ ഉണ്ട്. സ്‌നേഹവും അടുപ്പവും, സഹാനുഭൂതിയും അനുകമ്പയുമൊന്നും വാക്കുകൾ കൊണ്ട് നമുക്ക് പ്രകടിപ്പിക്കാൻ പറ്റുന്നവയല്ല. അത് അനുഭവിച്ച് തന്നെ അറിയണം. ഇപ്പോൾ സോഷ്യൽമീഡിയയിൽ വൈറലായിക്കൊണ്ടിരിക്കുന്ന ഒരു വീഡിയോ ഈ വികാരങ്ങളൊക്കെ ഉൾക്കാെള്ളുന്ന ഒന്നാണ്. കണ്ണ് നിറയാതെ നമുക്ക് ഈ വീഡിയോ കണ്ടുതീർക്കാൻ കഴിയില്ല.

ഐഎഫ്എസ് ഓഫീസറായ സുശാന്ത നന്ദയാണ് ട്വിറ്ററിൽ ഈ വീഡിയോ പങ്ക് വെച്ചിരിക്കുന്നത്. രണ്ട് പക്ഷികളെ നമുക്ക് വീഡിയോയിൽ കാണാം. അതിൽ ഒരു പക്ഷി ജീവനറ്റ് കിടക്കുകയാണ്. രണ്ടാമത്തെ പക്ഷി ജീവൻ നഷ്ടപ്പെട്ട് കിടക്കുന്ന തന്റെ ഇണയക്ക് അരികിൽ നിന്ന് മാറാതെ നിൽക്കുകയാണ്. സംഭവം ഷൂട്ട് ചെയ്യുന്ന മനുഷ്യൻ ആ പക്ഷിയെ മാറ്റാൻ ശ്രമിക്കുന്നുണ്ട്.

എന്നാൽ ആ പക്ഷി അവിടെ തന്നെ നിൽക്കുകയാണ്. എന്നാൽ അവസാനത്തെ കാഴ്ച ഹൃദയഭേദകമായിരുന്നു. ജീവനറ്റ് കിടക്കുന്ന പക്ഷിയെ ഒട്ടിപ്പിടിച്ച് കുറേനേരം അവിടെ തന്നെ നിന്ന ഇണപ്പക്ഷിയും അവിടെ തന്നെ ജീവൻ നഷ്ടപ്പെട്ട് വീഴുകയാണ്. ഒടുവിൽ ഒരു കുഴിയിൽ തന്നെ ആ രണ്ട് പക്ഷികളെ അടക്കുന്നതും വീഡിയോയിൽ കാണാം.

ട്വിറ്ററിൽ പങ്കു വെച്ചിരിക്കുന്ന വീഡിയോ നിരവധി പേരാണ് കണ്ടത്. ഈ വീഡിയോയ്ക്ക് താഴെ ഇപ്പോഴും കമന്റുകൾ വന്നുകൊണ്ടിരിക്കുകയാണ്. ഇണയെ നഷ്ടപ്പെട്ട വേദന കൊണ്ടാണോ ആ പക്ഷിക്കും ജീവൻ നഷ്ടപ്പെട്ടത് എന്ന ഒരാളുടെ സംശയത്തിന് അതേ എന്നായിരുന്നു സുശാന്ത നന്ദ മറുപടി നൽകിയത്.

ഈ കാഴ്ച കണ്ടുനിൽക്കാൻ സാധിക്കുന്നില്ല എന്നാണ് മറ്റാെരാളുടെ കമന്റ്. മനുഷ്യരുടെ ജീവിതത്തിൽ മാത്രം അല്ല താങ്ങായും തുണയായും അവരുടെ പങ്കാളികൾ ഉണ്ടാവുക എന്ന കാര്യം ഈ വീഡിയോ കാണുമ്പോൾ ബോധ്യപ്പെടും എന്നാണ് മറ്റൊരാളുടെ കമന്റ്, മനുഷ്യർക്കിടയിൽ പോലും കാണാത്ത സ്നേഹം ആണ് ഈ കുഞ്ഞ് പക്ഷികൾക്കിടയിൽ കണ്ടത് എന്നായിരുന്നു മറ്റൊരു കമന്റ്.

സ്നേഹത്തിന്റെ സങ്കീർണ്ണതകൾ നമുക്ക് ഒരിക്കലും പൂർണ്ണമായി മനസ്സിലാക്കാൻ കഴിഞ്ഞേക്കില്ലെങ്കിലും, എല്ലാവർക്കും അവരുടെ മനസ്സിൽ വികാരങ്ങൾ ഉണ്ട് എന്നതിന്റെ ഓർമ്മപ്പെടുത്തലാണ് ഈ ഹൃദ്യമായ വീഡിയോ എന്നാണ് ഒരാൾ പറഞ്ഞത്. ആഴത്തിലുള്ള ബന്ധത്തിന്റെ തീവ്രതയാണ് ഈ വീഡിയോയിൽ കാണുന്നതെന്നാണ് മറ്റൊരാളുടെ കമന്റ്.

വീഡിയോ കാണുവാനായി ഈ ലിങ്കിൽ ക്ലിക്ക് ചെയ്യുക