അത്തം പിറന്നു,പതിനൊന്നാം നാള്‍ തിരുവോണം !!

അത്തം പിറന്നു. സാധാരണ പൊന്നോണമെത്താന്‍ പത്തു നാളാണെങ്കിലും ഇത്തവണ തിരുവോണമെത്തുക പതിനൊന്നാമത്തെ ദിവസമാണ്. തൃക്കേട്ട നാള്‍ രണ്ടു ദിവസം വരുന്നതിനാലാണിത്. ഓണക്കാലത്തിന്റെ സമൃദ്ധിയും ഐശ്വര്യവും ഓര്‍മ്മിപ്പിച്ച് അത്തം പിറന്നതോടെ ഇനി പൂക്കളുടെ ആഘോഷങ്ങളാണ്.

ഇന്ന് മാര്‍ക്കറ്റില്‍ ലഭിക്കുന്ന പൂക്കള്‍കൊണ്ടാണ് മിക്കവരും പൂക്കളം തീര്‍ക്കുന്നതെങ്കിലും പൂക്കളില്‍ ഒന്നാമനായിരുന്ന തുമ്പപൂവ് തന്നെയാണ് ഗ്രാമങ്ങളില്‍ ഓണത്തിന് ഇന്നും താരം. ആദ്യ ദിവസം പൂക്കളത്തില്‍ ഒരു നിരപൂവ് മാത്രമാണുണ്ടാവുക. രണ്ടാം ദിവസം രണ്ടു ദിനം പൂവുകളും മൂന്നാം ദിവസം മൂന്നു നിര പൂവുകളും ഉപയോഗിച്ച് പൂക്കളം തീര്‍ക്കും.

ഇങ്ങനെ പത്താം ദിനമെത്തിയാല്‍ നിറങ്ങള്‍ കൊണ്ട് സമ്പന്നമായ പൂക്കളമായിരിക്കും ഓരോ വീട്ടുമുറ്റത്തും ഒരുങ്ങുക. അത്തം നാളില്‍ ആരംഭിക്കുന്ന തൃപ്പൂണിത്തറ അത്തച്ചമയ ഘോഷയാത്ര പ്രധാന ആഘോഷമാണ്. കൊച്ചി രാജാക്കന്മാരുടെ ആസ്ഥാനമായിരുന്ന തൃപ്പൂണിത്തുറയില്‍ രാജവാഴ്ച്ചയുമായി ബന്ധപ്പെട്ട ചടങ്ങായിരുന്നു അത്തച്ചമയം.

1949 ല്‍ ആഘോഷം നിര്‍ത്തലാക്കിയെങ്കിലും പിന്നീട് ഈ ആഘോഷം ജനകീയ പങ്കാളിത്തത്തോടെ വീണ്ടും തുടരുകയായിരുന്നു. സപ്തംബര്‍ 19 വരെ നടക്കുന്ന ഈ ആഘോഷത്തിന്റെ ഈ വര്‍ഷത്തെ സമാപന സമ്മേളനം മന്ത്രി കെ ടി ജലീല്‍ ഉദ്ഘാടനം ചെയ്യും. മട്ടന്നൂര്‍ ശങ്കരന്‍ കുട്ടിമാരാരുടെയും സംഘത്തിന്റെയും തായമ്പകയടക്കമുളള ഒട്ടെറെ കലാവിരുന്നുകളും ആഘോഷത്തിന്റെ ഭാഗമാണ്‌.

English summary

atham today,the onam celebrations begins